¹ La'ei Yudas, pelayani Yesus Kristus* ma soungangi Yakobus, antage jimo sanu pinileangge ma no'asayaninu Allah Siama, kangkai sanu piniara untukei Yesus Kristus. ² Ambo'onya asasayange, damai sejahtra, ma melabinu asasayange antage'oe. ALLAH MEHUKUME JIMO SANU MOGUTU SALAH ³ So-soungaange no'asayani, lia'e pepeese mongusaha tutuu monulise antage'oe tentaange a'salamatote kangkai,lia'e merasai parlu monulise antage'oe ma momongi'oe bala li'oe berjuange tu-tutuu untuke imane sanu pineilua'e seinsange untuke seendenye antage too-too mokudus*. ⁴ Pa, too-too matantu nensio'ome labai inotouange, injoo'e jimo sanu la'e luulu tinantua'ome untuke nohukume, too-too sanu labai e'iman sanu monyala gunakane anugrahnu Allah te untuke mo'opuase napsu ma labai seilu sosoungonye Penguasa ma Siopu te, Yesus Kristus. ⁵ Lia'e malani momaingate'oe sabii inotouangomome tutuu, onjo Siopu nonyalamata'ome umato-Nye kangkai neluana'ejimo la'e petunu Mesir, tapi inancura'o-Nya jimo sanu lauje momaracaya. ⁶ Injopa, mala'ikat-mala'ikate sanu lauje mataate antage batas-batasu kuasanu jimo, tapi molinjo'i sanu popomoiyaangu jimo, binato'angonyo-Me kangkai rante seende-endenye lilalongu o'nopange sanu moonope tutuu untuke pohakimane bia antagoma'e eleo giombang. ⁷ Aio'e teule Sodom* ma Gomora* kangkai kota-kota lio'e, sanu mo'opuase ambo-ambo'e lilalongu me'eseiluane ma nolilihule napsu sanu labai paila'e, nonanggungome hukumannu wapi seende-endenye mebali contoh. ⁸ Seliliome injoo'e teulea too-too injeine, moranua'e nuupionggu jimo, molehui batangan, lauje monarima kekuasaane, ma monagore jojoo sanu momulia. ⁹ Mikhael lome, nu penghulu nu mala'ikat, watu ne'oungkulane kangkai seetan* tentange mayati Musa*, lauje barani momeilua'e pegombo'e majaa'e kangkaiio, boi negombo'e, "Ambo'onya Siopu moungkule li'oe!" ¹⁰ Tapi, penyesaate injeine mo pa'ajaa'e so'al-so'ale sanu labai nootoinu jimo, sanu nootoinu jimo boi la'e pepeihu'e, selilio binaatang sanu lauje adaange akal. La'e so'al-so'ale ineine jimo mongacura'e. ¹¹ Cilakama jimo! Jimo nonuute jalange sanu ilampani Kain, injopa molilihule kangkai mosonsouge asasala sanu pinogutuni Bileam, ma nagansinge lantarane pepeihu'e selilioi Korah. ¹² Jimo injeine selilio lehu lilalongu perjamuannu sayangoome, sanu u'minange goote kangkai'oe lauje mo'ootoi mohule, boi ambo-ambo'onya pa nopadulinye. Jimo selilio luunge sanu lauje mongkoni ujang, sanu nosumpala'u bayal anima'e u'ma'e. Jimo selilio puunu ayu sanu lauje mehua watu musimonye, mate doinsange, ma nohuhute kangkai lalinye. ¹³ Jimo selilio balayangu dagate sanu maganas, sanu mehuyoa'e ajajaa'u ambo-ambo'u jimo. Jimo selilio binaatang-binaatange sanu melologe, sanu antage'io moonope tutuu siniapa'ome untuke seendenye. ¹⁴ Tentaange too-too injeinimei Henokh, turunane e'pepituana'onye la'ei Adam, no ramale, "Siopu modua'e kangkai lihua'u too-Nye mokudus, ¹⁵ untuke monjalana'e pohakimonye antage jojoo too; mehukume jojoo too majaa'e antage jojoo too majaa'e pepeihu'onye sanu nopogutunu jimo kangkai cara sanu majaa'e,ma antage jojoo pegombo'e makasar sanu ginombo'a'ome la'e too odosa sanu majaa'e antage Allah." ¹⁶ Jimome too-too sanu seilu mengeluu, mongi-ngintuge a'sasala, ma monuru'e hawa napsunu ambo-ambo'u jimo; jimo giombange nganga ma monjile too taninye bala ma'agaade keuntungan. POMATUJU MA NU NASEHAT ¹⁷ So-soungaange sanu u'asayani, haruse nolambotomia nuga sanu pineilua'ome nu rasul-rasul* Siopu te, Yesus Kristus. ¹⁸ Jimo negombo'ome kangkai'oe, "Watu pongopusu juniaa, adaanga topo nagor sanu boi monuru'e napsunu jimo sanu majaa'e." ¹⁹ Jimo me too-too sanu nongogutu mesansalaane, monuru'e napsunu juniaa, ma lauje adaange Roh*. ²⁰ Tapi, li'oe, so-soungaange sanu u'asayani, baunga ambo-ambo'oome li babo'u imanoome sanu tututuu mo suci ma pesusuyanggoma lilalongu Roh Kudus*. ²¹ Piaraia ambo-ambo'oome lilalonggu a'sayangu Allah kangkai medaange rahmatu Siopu te, sanu mongkoni antage tutuhuange seende-endenye. ²² Po'oolusa nyaa antage jimo sanu maragu-ragu, ²³ salamata'too taninye kangkai mongago jimo la'e api. Antage jimo taninye po'itaa'a a'sasayange sanu notuutinu o'hule, kangkai labai seilu pakeanu jimo sanu nolehuinu hawa napsu nu juniaa. PUJI-PUJIANE ANTAGE ALLAH ²⁴ Antage Liio, sanu mokuasa monjaga'oe lauje manahu ma mopodua'e'oe labai macacate li tolonu takhta kemulia'ano-Nye kangkai a'dandalane giombang. ²⁵ Antage so-souna'onye Allah, la'emaei Kristus Yesus, Siopu te, kemulia'ane, ke'agungane, O'uige, ma kuasa a'alendanu watu: luulu, a'alaine, dua'e seende-endenye. Amin*.