¹ Wo nenuk ne'ebeng noon, gan yo o'yon de gahal tebel hok i'ni geten, i'gin de rohani yo, i'gi i'ni gawar ma roh barai ge'glul. De a'ga ge na naman, a'wa i'ni ge'glul nang. ² Tokor yo i'gi u'te mo moy i'gin yo Kristus gr huih ge'glul. ³ Gan yo o'yon de i'ni u'huih a'gel nang de hok yo o'yon nang, yo ga gi'ih ge tin a'ak. ⁴ Made pe kreyang yo pangkol pa ge'ur, koih odi ga ge'ur u'ohok u'o'duil dema i'ni ebeng go to ganal. ⁵ Pe tokor yo, pi pang kokol an put. ⁶ Abe ga Lahtal ge huih nok poih yo med na'gan nok poih yo ga gawai ma i'ninok de u'ge huih yo digen. ⁷ Iyeh i'ni gin ak nang, Lahtal yo hok go kukuih yah nabe i'gi midin tek yo bo i'gi u'migil. ⁸ I'ninok bulya ge'glul midin tek bo ga bulya ge nok ge'yah bo ga med. De i'ninok de Roh ge'glul midin tek, yo ga Roh i'e'es gomi mi gen wa pole. ⁹ Nagan nok poih godal yo u'el nang. Gen a'gai ge midi u'hid, pi u'med u'pun. ¹⁰ Gan yo we, ge yel o yeh bo pi nok poih geten ma riyal gen, pe keluarga de iman gomi mi. ¹¹ Nabe na'aloin ma egen, de i'ge ur yo na nenatan angkol puih aloin. ¹² I'ninok de i'ni ge nok poih de bulya ge u'huih u'meteng lam yo, i'ni ge ulya yo i'gin sunat de i'ni. We godal yo hok kob ai'nang demi salib Kristus. ¹³ I'ni de gin sunat di hok i'ni Hukum Taurat ge'glul nang, deho i'ni ge kir-kir i'gin di i'gin sunat, de bo i'ni a u'ohok au o'doil. ¹⁴ Na hok u'nohok u'nodoil nang, deho pe Lahtal Yesus Kristus ge salib gomi mi. Ge salib bo odi bulya yo, i'ni u'salib ma nen, nan i'ni ma bulya gen. ¹⁵ Mu sunat e munang e ge nok yeh nang. Ge ninok yo i'ninok haba. ¹⁶ I'ninok de i'a'al aturan yong golam, go mateh nok poih Lahtal ge, ma i'ni taher, atal Israel Lahtal ge i'ninok di ataher. ¹⁷ Ge u'gihib yo, iye i'ninok hok nin sus geten nang, nan na Yesus ge tanda-tanda we ni'ihmi. ¹⁸ Ne nuk ne'ebeng noon, anugerah Tuhan Yesus Kristus yo roh nai a'go. Adob.