¹ Wou i'gin i'ninok de Galilea bod kmuk, abe nuk o go mimi, bo e'gebet a'gin u e'rem igeneh. Yesus Kristus bar gen g'dan mi i'ni gin salib di igel nang. ² Nagan nuk na e'ge gatang boge? I'gi Roh med e a'da Hukum Taurat ge glul he nang bo iman ge glul. ³ A'ga bod yah? I'gi Roh ge glul a'gai, he wed ong i'gi bulya ge bo puin u'gihib. ⁴ Klik mikal obay de i'gotohok, yo mu hai-hai. ⁵ Roh de ga ma e'gen, mujizat de ma i'ni gawar mi godal yo, Hukum Taurat ge glul e iman de i migih. ⁶ Go ham a'gai Abraham de ga Lahtal ge huih u werep bo nagan endob Lahtal ma'gen. ⁷ A'gagel mang, i'ninok de ge iman go, yowe Abraham ge ul a'kal. ⁸ Kitab Suci ge huih, mak'na po'mi Lahtal u'huih a'bang i'ninok de hok Yahudi nag di i'eben mang. A'da aspomi injil Abraham u ge huih bang e'hek de bulya mi i a'al nok poih med. ⁹ I'ni de iman go, bo Abraham ibal berkat med. ¹⁰ I'ninok de Hukum Taurat ya milam, yo ga m'kal bo gotohok. ¹¹ Bo wed yong mu pagel mang, Hukum Taurat ge glul, Lahtal gen m'ra gadan u'nuk di hok i'eben nang. ¹² Bo Hukum Taurat yo iman e'ele tatar meteh, ge mi gawar i'ninok de Hukum Taurat ge glul bo i'ni i'es. ¹³ Hukum Taurat ge kutuk yo Kristus ga teben a'gai deho mi oloin a'gai, i'ninok de salib mi hil yo ga a'klok e'ber. ¹⁴ De Yesus Kristus go mimi, yoho Abraham genok ge poih gen a'gai i'ninok de hok Yahudi nang o'noon di gohid, bo pe iman, Roh de i'ni u'totemein yo pi med a'gai. ¹⁵ Ni'nuk ne'ebeng, ne mih ne meteh e idil ta'kad bo na u'egentub, te mein tem de yeh a'gai ong. Pin i'ninok mamang e'egen temen tem de yeh a'gai i'ninok nok di iyeh u go utang nang. ¹⁶ Te men tem de wed Lahtal gama Abraham e ul dat ge huih, Lahtal ga hok ul dat noon ge huih nang. I'ninok bar ge ul ge dat di nang, e'ul dat di nang de Kristus gi'ih bo mi. ¹⁷ Ne nebet u'rem Hukum Taurat de tun eska ut kartong de yeh a'gai. Lahtal ge temen tem de ye ik, i'eben a'gai, go gihin yah. ¹⁸ Nagan de Hukum Taurat ge glul yo teme'me a'gai yo hok. Temen tem ge glul nang. Deho temen tem nuk yo Abraham bo gen. ¹⁹ Tu oyon odi Hukum Taurat gayeh, pe dos pe gahal odi Hukum Taurat yo ga'ten gen a'gai ul dat u'hid ge u'tamein ge glul. Hukum Taurat yo malaikat e u'huih. ²⁰ Deho nabe i'ni tanar mi go lam go meteh yo hok i'ni unuk ge ben nang, Lahtal yo unuk. ²¹ Yo ho, Hukum Taurat e Lahtal ge temein tem nok ga tewal enang, hok nang. Hukum Taurat yo magen de pa pi'es ge nok poih yo Hukum Taurat le ad. ²² Deho, Kitab Suci nagan kar'nuk u'hap u'magar odi i'ninok de dos gahal gaya lam. Bo de Yesus Kristus ge temein yo ya i'ni de iman gogo yo bo gen. ²³ Mak'na de iman a'da manang, pin yong Hukum Taurat bo ge glul gen a'gai iman yo i'ni u'te huih. ²⁴ Gan o'ge bo, odi Hukum Taurat ga to jaga to belenta ge Kristus a'u ad de pin yong iman ge glul pi eben mang. ²⁵ Wed yong iman ad a'gai, Hukum Taurat ga hok ga to jaga to belenta nang. ²⁶ Yesus Kristus gomi mi, i'gi a'al Lahtal ge Ul a'kal mang. ²⁷ I'gi a'al de mak'na Kristus mi i'gin baptis yo i'gi Kristus gomi mi a'gai. ²⁸ I'ninok Yahudi, we i'ninok Yunani mu malai e nang e om'kne, o'kne i'gi a'al munuk Yesus Kristus gomi mi. ²⁹ I'gin de Kristus gomi mi a'gai, i'gon yo Abraham ge tayad temein ge ahli waris ge temein ge glul.