¹ Helama Tona Ie nga ti Yudas. 1 Ngati Yudas, ana an'nu Yesus Kristus, Tuahhu Yakobus. ta wie pa ro do alla ta piddi ro Deo Ama, nga do jaga peluje na tu Yesus Kristus. ² do nga lua Henao, rowi lua ruba dhara, helama tona ie, nga lema mone ae ruba dhara Muri na tu mu. Deo do ta wolo ro do tao hala. ³ Tuahhu-tuahhu dhei ya, ya dho dhei pela'arui tarra-tarra ta bhuke wie mu jhara lua helama tona ie natu di helau-lau. ya ta bhuke nga li amii pa mu mii ta perui anni mu pa lua manno kaho mu, do alla ta wie he wari lohe la lodho do nami-mii ne, pa ddau-ddau dhei No. ⁴ rowi dho era ne dhau-dhau do maho dhara-dhara nga dho'o toi ri mu. ro hekke ne dhau do alla ta pe ato pettekke rai uru ta wolo. ddau-ddau na harre addho do parahajha, ddau do alla ta jhagge pehale ne lua hajha dhei Muri pa ngi'u ro, mii ta petobe dhei ihi kuri raiwawa, jhe ro do addo do wae ta hamme Yesus Kristus, wata No ke ne Mone Kuaha pereda pad hari-hari dhou. ⁵ Ya dhei ta pekebaddi wari mu, maji lema ta do alla ta toi ri mu, rowi Muri di do alla ta pehelama ana-ana ddau dhei No nga ti ihi rai Mesir, tapulara pa dhai leto pemadde ne ddau-ddau do dho parahajha. ⁶ henge lema ne malaikat-malaikat do dho wae ta pekako ie pa kuaha higa do era pa ro, do alla ta petato ro Muri di. do alla ta akki ro rate, mii ta wolo ke ro pa dhara rao-ai do peloro, pa awe do jajhe ro Deo. ⁷ Minaharre lema nga Sodom nga Gomora, nga Rae-rae do peumu he, do tao lai-lai ne apa kerewe pa lua hoi peg'giri do dho petu, hakku ta wolo ke ro para rao-ai do peloro ne, tu ta jadhi lai pehewina tu hari-hari ddau. ⁸ Minaharre lema ke ne ddau-ddau na he, ddau do parahajha nga lai-lai ni ro, perra'i ngi'u ro hoi, nyakke lua kuaha, nga kare menihe ne lai-lai do megala. ⁹ Mikhael le miha, do kattu nga ti hari-hari na Ju Deo, pada dhara no ta pehala nga wango, jhara lua ngi'u Musa do alla ta made, banni dho Mikhael ta pali ne likara menihi pa wango ne, tapi ne henao no nga li pali no: Muri ne do ta banni nga au. ¹⁰ tapulara ne ddau-ddau do abba ddau lara lai huli do pali kara menihi ne lai-lai do adho do toi ri ro, wata ne do toi rowi ro, lai-lai do era pa dhara penge ro he we, helau mii baddha dho'o era yang nga lai penge do ie. ¹¹ lai apa ke pa ro ! alla ke ri ro ta pedute ne loro djara do narro ri Kain. nga lema do penarro ne lua huli nga apa nga kerewe do tao ro Bileam; jhe pe ele wewo mii do tao ri Korah. ¹² Ne ddau-ddau do na harre, mii rra'i pa dhara lai pehewina mu, ro do nga'a helau nga mu do lala ihi-ihi dho'o bhule nga mekae dhara, jh mola ta penge ngi'u ro miha we miha. halla do ke ro mii merammu dho'o wie ajjhi do wi'o ri ngallu la mii-mii. hala le dho ma ke ro mii ajhu do dho bhule nga wue, majji lema ta pa awe wue wo ajhu, made due wari, je dho bhette ne amo ne harri alle. ¹³ helau ke ro mii kolo nawa dahi do banni, do kehabbha woro puddi, do mina harre leke ro ne kehabbha pengadde ne wue ai ro do pemekae dhara ddau. ro he halla do ke mii, motto-motto do era pa kerabba guru rai do rihi meliri dhara ne, lohe la lodho do nami mii ne. ¹⁴ jhara ddau do mina harre, Henokh pidu lapi huhu ddau nga ti Adam, do uru he do ngadi ta pedai: Heleo, do ta dakka Muri nga tabbha-tabbha ddau deo do mmau do megala. ¹⁵ tu ta ma happo halla hari-hari ddau; do ta wolo ro ri Muri ne ddau do apa do kerewe taga wui ai wue tao ro do halla. jhe lema hari alle li pedai do apa do kerewe do alla ta pedae ro ddau-ddau do nga hala ludhu pada hedapa Deo. ¹⁶ Ne ddau-ddau na harre, do peggu peggallo, do kale-kale hala ddau do wala, do pedutu lai tao nga pe ro do tobbho ro harro nga menyilu; ddau do bbla ubba hegara, do jhore ddau mii ta nara ro lua mangngi. ¹⁷ Tuahhu-tuahhu dhei ya, henge we ne lipedai ngati rasul-rasul Muri di, Yesus Kristus. ¹⁸ do alla ke ro ta pepeke pa mu, " Pa awe pe dakka rahi raiwawa, do ta dakka ne ddau-ddau do ta mamari menyorre mu, ddau do pedute nge dhei ngi'u ro tobbho ro harro nga menyilu", ¹⁹ ro he ke do pedubbhu pehaggi - petala wala ddau, do pedute ne lai dhei ngi'u ro tobbho ro lu dhei raiwawa, nga ro dho'o bhule ng henga Deo. ²⁰ tapulara, Tauhhu-tuahhu dhei, kako kaddi we mu pada dhara parahajha mu di do wo ie ne, jhe habbajha pada dhara henga Deo. ²¹ Murimada we mu loro-loro pa dhara hajha nga dhei Deo, pa dhara mate ke ri mu ne lua ruba dhara, Yesus Kristus, Muri di. do ta wie pa mu ne muri mada do peloro-loro. ²² Pedhelo we ro mu ne lua ruba dhara mu na tu ddau do kebba'a ade he. ²³ Pehelama ne ddau he ngati dhara rao-ai. penaja nga ddau-ddau do wala he, jhe pedhelo ne lua ruba dhara, do lere ro lua meda'u, jhe paddhu nga bhara ro do pera'i tongo ri lua dhei ro do nga lubhu harro nga menyilu he. wue waje pa Deo. ²⁴ Wie Deo, do Mone kuaha ta jaga nga meniga mu, mii ta do era nga lua kura nga terujha, do ta aggu mu la hedhapa No do dhida ne nga mengalu nge kehaka dhara. ²⁵ Do titu wata No ke Deo, mone Pehelama di, do pelake jhara Yesus Kristus, muri di, No ke ne do Dhida do kelodo, do ketutu, do higa do pereda rai tare ti petari, titu ju hape ma dhara do na ne, jhe lohe la lodho do nami mii ! Amin.