¹ YO MO TDOKA DE O YAHUDI MANYAWA YA SOWO So de o bi hali, o bi tutuda yahino ia date no de yo temo, " o Israel ma nyawa, o bi Imam de lo o bi Lewi manyawa yo matinga wa de ona o doku ma binyawa. Ona gena o bi Kanaan ma bi nyawa, o Het, o Feris, o Yebus, o Amon, o Moab, O Mesir, de o Amori. ² Ona gena ya tdehe ngopa ngopetdeka o bi nyawa ma so moa no de yo masi petdeka de lo manga ngopa-ngopa ya nau si dago manga oho da tetebi i manadadi da torou sababu i mateke kaa capu de o nyawa-nyawa o daerah ka magena sababu manga tutuda de yo kokuasa ona isi tdotdoma i faeli wa ³ Ipase de o hali manena to ise ai baju de ai juba lo ena gena ta raraca ka de lo ta rapou ma cuna ai sahe ka de ai gu'umi ngohi to goge sababu to hiti ⁴ Kagena de ngohi ka yo ma tolomu o nyawa moi-moi ode ma Jou awi demo ka yo dodomodo sababu o bi nyawa ya u'umu ka magena yo faeli kawa. Ngohi to goge de to sanagi kawa si dago o suba i tutupu ma orasi i matda-madta. ⁵ Ma ora si o suba i tutupu ma matda-matda ka, ngaro ko i matde duma bilasu to maoko. De lo ai baju de ai baju i raraca, de to suba de to bukuku de gia to si doa mangale ma Jou Giki moi ka. ⁶ Ngohi to temo o Jou ngohi ta rasa i matde de ta oku wa ai bio ta tide mangale ngona ka ya Jou, mia dorou moi-moi foloi i kaku ode mia sahe, de mia dorou lo i topu sidago o dipa ka ⁷ Matero i tdotdoma mia ete de mia topora sidago wange manena ngomi o hali i lalamo ka mi gogoge. de mia sala magena, ngomi, o bi kolano, de mia bi Imam ya bi si saraha o daerah ka ma bi kolano ka, ya toto oma ka, ya tatawan ma raba, de yo koko oraka, de mi go gogeleka sidago orasi manena. ⁸ Duma ma nena ma orasi ma Jou Giki moi wo si tatapu awi laha ngomi ka. Una wo mi dongosa ku ngomi o nyawa mi si sosalamati de wo mi hihike o riho da loloha de da tetebi sidago o giki moi mia Jou Giki Moi wa aka mia loko wa tebi de wo mi hike ka o sanangi macunu ngaroko ngomi o gilalo ma raba ka. ⁹ ngomi gena o gilalo. ngaroko o gilalo ma rabaka ma Jou wo mi dongosa wa ngomi. Koma gena lo Awi dodara Wosi lalamo ngomi ka o bi kolano Persia manga sema ka de lo Wa hike ngomi o sanangi mangale ma Jou Awi tahu mia aka li, de i toturaba mi si goko li de mi hike li dadaru da poputuru o Yehuda ka de o Yerusalem ka. ¹⁰ Da bolo mana o kia li mi temo ngona ka ya Jou ? ani bobita gena mia dongosa ka, ¹¹ de ngona no si bobita mote Ani susulo, ni nabi de no temo o doku mio ngongosa mangale ni goge o doku ya fafaja ka de o doku ma duhutu ya fafaja ka. De ya faja magena mangohu ka sidago mangogu ka. ¹² Sababu de magena upa nia hike nia ngopa ngopetdeka ona manga ngopa ya nau ka, de upa nia tdehe ona manga ngopa ngopetdeka mangale to ngini nia ngopa ya nau. upa nia usaha o dame de o sohi ona no ka si dago-dago la mangale ngini ni puturu de nia otdo de o rijiki o tona da loloha no magena de nio dongosa mangale nia waris nia ngopa de nia dano ka sidago-dago. ¹³ Da ngodu i dadi ngomi ka magena mangale mi mamanara i sasala de da totorou i foloi i lamo. Ngaroko komagena Ngona mia Jou nomi hike wa o baha'la mote de mia manara i sasala, duma nomi hike ngomi o barakati madala manena. ¹⁴ Nomi si aku eko hiwa, nako ngomi mia tiho kali ani bobita de mia modo ka o nyawa-nyawa ya fafaja manena ? nomi ngamo wa ngomi no de no mi sotu wa ngomi no si dago ka ngai moi lo wa'ali i oho de i salamati ? ¹⁵ Ya Jou, o Israel ka manga Jou, ngona na i tero si dago ngona nomi tdoha ka ngomi mio oho o oarasi manena koloko o bi nyawa i sosalamati. Nomi nano ngomi, ani sima ka de mia sala moi-moi. Tanu moi wa ya aku yo ma tu umu yo ma oko ani sima ka mangale o hali manena.