¹ Ma taong manonoma ka wo kokuasa o Koresh ma kolano Persia mangale wa ganapu o Jou awi demo o Yeremia wo tetemo ka, o Jou wa garaki o Koresh ma kolano Persia awi sininga la mangale wa aka o pengumuman to una awi daerah kah de wa aka maro o surati ma demo. ² Komanena ma kolano Koresh awi bobita : ma Jou giki moi o soroga ka wosi catu ka ai sahe ku dangodu o bobareta o dunia kah de una woi tumu ngohi mangale ta aka to una awi tahu o Yerusalem ka Yehuda ma tonah kah ³ Nagoona bato ma Jou awi umati mia si dong rabaka dangodu tanu nanga Jou wa tiao. Daloha ona i tagi yo liho o Yerusalem kah o Yehuda ma daerah kah de yo si goko o Israel ka manga Jou awi tahu una magena ma Jou gikimoi o Yerusalem kah. ⁴ Nagoona bato ka i gogoge sih kia kah bato ona yo goge tanu o nyawa kagena lo ya rio de manga Salaka, o guraci, de o arata ma somoa si de manga biara lo ya hike para saja mangale ma Jou awi tahu o Yerusalem kah. ⁵ I tekawa yo maokoli o tutuda-tutuda o gia nongoro o suku Yehuda no, o suku Benyamin no de o Imam de o lewi ma nyawa de nyawa ma Jou wasi gogaraki kah done yo liho lah ya aka de yosi goko ma Jou awi tahu o Yerusalem kah. ⁶ O nyawa-nyawa kegena ya ngodu ya rio ona de manga moi-moi lo hike maro manga salaka, o guraci, manga biara de manga arata ma ija i hahali de o moi-moi magena ya hike de manga sininga ya loha-loha. ⁷ Ma kolano Koresh lo wo si supu o Jou awi tahu no o pakakas kia kah o Nebukadnezar wa a'aho o Yerusalem no de wa hahado ku awi puji-puji ma tahu kah. ⁸ O Koresh makolano Persia wosi supu de awi gia masirete de o Mitredat wa nanano de wa eto mangale o Sesbazar Yehuda kah manga roriri. ⁹ Manena madala : o'bokol guraci ngai moru wange (30) , de o'bokol salaka o'cala moi (1.000), de o'diha ngai monahalo de sio (29). ¹⁰ O udo-udo guraci ngai moru wange (30), de o udo-udo salaka o ratu iha de mogiowo (410), de o cala moi barang ma somoa (1.000). ¹¹ Da ngodu o pakakas guraci de o salaka ma dala o cala motoha de o ratu iha (5.400) Da ngodu ma gena o Sesbaza wa aho ma orasi o nyawa-nyawa yo liho o Babel no de yo ka hika o Yerusalem kah.