VOMUNG PEHANG BA MOLO UUA ¹ Aarenge, aaing Titus angu, naba-naba ba lahatala eomi eamulung angu ba aana malelang vengwaring. ² Nehe mehal ba boma tita ang naung iat mateng senge ini aabetat idiri-iababahi anga vengtahangk, bot iene aaung angu vengjaga, iomi metaua nehe ejahi, bot etatabit iomi lahatela aing venguea. ³ Bot nehe jangu ba memet iila aag naung iat mateng senge ini malekang ilawat-itahi ba hamalang angu vengjagat aaung-aaung bot matubing, ekang nehe ehura ewanauti ekang, bot ekang aarak nat naboa ekang. Aarenge naba ba aaung-hama angu ba ini malekang vengmaring. ⁴ Ening aulang senge, ini bisa nehe jangu ba mehal veng iila jedung daeri sehi ang naung iavomung iapahang senge ini iomi metwa iehal ejahi, bot iomi metma ioal ejahi. ⁵ Bot aabetat idiri-iababahi angu vengtahang, aabetat hamulang-kadulang, kalakat ihava omi angu vengpiling, tening-rawa, bot imehal eamulung, senge lahatala e hier aauug-hama angu nehe ekang ejajahi ening ekang. ⁶ Bot nehe ba jedung kuar sehi ang naung di iavomung iapahang senge ini idiri-iababahi angu vengtahang. ⁷ Na emangpi ba aana omi mi aabeta angu aara malekang karajang aaung angu ba ening senge metena nehe emangpi itubing. Aana nehe avouung-apahang se aana malekang oomi anung-anung, eene aanung angu vengjaga, ⁸ bot mateng hur emolo ba bae akal-kabule jasi ue omimi niang anguba aana vengbanang, senge nehe ba iomi bae ping vengsanang riang ang naung vengmee se ini iavaaloring, base ini bae na jasi iiba vengbanang senge mehe ba iomi bae na jasi iba vengbanang metma piadanat jadi niong. ⁹ Aulang di malea ong naung, na emangpi ba imaraing ana ing gahing iot vengkarajang omimi angu, ini malekang imanaing angu aing vengtou. Ini ekang imanaing angu at natataanang ekang, aarunge ening tatalang senge imanaing angu ana omi sanang. ¹⁰ Ekang taavi ekang, aarunge karajang aaung angu ba ini malekang ening metma imanaing angu etubima senge omi ing vengsanang, bot na emangpi omi mi angu ini bisa lahatala pi aabetang e eela e hur aaung-hama angu e etabi vengbanang. ¹¹ Se, lahatala eomi aaung hama ba manusia emangpi ing ening lohit metma iahalang-iavali ang naung eahalang angu ana matubing iila angu ebele. ¹² Base aabetat bae aaung ening niang, bot nukur jasi ba tomi mi ang naung pi malekang atobang metma piahalang. Jamang vea ba pi omi mi aabeta sehi anga pi malekang aaung angu ba vengpikir bot vengkarajang, aabetat hamulang kadulang bot aabetat lahatala angu ba aing vengtou. ¹³ Eningse Yesus Kristus Ana lahatala e eele e balolu anga omi mi bale hoa, angu metma aaung-hama ening metma ping metma vengmea, bot angase pi ading sehi. ¹⁴ Yesus Kristus angu, Ana Ediri-Ababahi angu metma sadaka ening ping ening lohit metma piahalang-piavoli ang naung emangpi lahalang iila bot Ana ping vengtalail ping metma enehe ening senge aabetat hamulang kadulang, bot karajang aanung angu ba ening alolang niang. ¹⁵ Base Titus, emangpi anga aana malekang metma jamaat ang naung veng iat hubai. Iavomung iapahang senge naba ba aana metma veng iat hubai ang naung ini semongpi eamulung. Nehe iiba jasi-ahala ening se ihapa bot via aaung metma itubing, se aaing ba malekang emongpi angu ening metma iadana angu ebele. Aulang senge nehe iiba ekang eejajahi ening ekang.