FOMUNG PAHANG HULA ABETAT TOMINU TAHANU ¹ Angu ebele nekaku naungba na iing suka, bot nomi iingmi dadanang sehi, iing anguba ening not navera not nomi ot elele aulangba Lahatala anguba omi mu tahit aanamang. ² Na Euodia bot Sintkhe oleva iabanang lot aabetat tominu Lahatala anguba omimi aabeta. ³ Yo, na veng iiabanang, neserang naungba iiomi aaung, ioang moling hengi ing anga naungba nooangmoling Lahatala Ehur aaung hama angu vengmaring, aulang di Klemens bot ne serang karajang eabeungba, lene angu we buku aabetang, angu mi hurak. ⁴ Lahatala omi mi suka navera. Na bale vengbanang suka navera ! ⁵ Aulange oomi ebalea angu, nehe emampi ateing se Lahatala ehoa ama peang iila. ⁶ Oomi angu ekang vang-vang metma na ang naung adana ekang. Aurunge nababa oomi mi dadanangse, metma Lahatala vengemaring, ue eesambajang bot ebanang aaung hama angu omimi. ⁷ Lahatala eaung Ehama ba pi bae ateing niang angu iiat toang pina, bot iiomi iiande angu ana gariang ue Yesus Kristus omi mi. ⁸ Evengtahi mi, kaku naung serang naung emampi ba molo, emampi ba aalus emampiba nehe veng tajaning. emampi angu metma iiomi mi. ⁹ Nababa ini nabungmi vengajar nabungmi medi, nabungmi vengme bot ateing angu emampi vengkarajang aulange Lahatala ba aaung hama e eela angu, iiatoang pina. PAULUS ANA FILIPI MI BANANG TARIMA KASI METMA NEHE BA OMI VENG ANAMANG ANG NAUNG INANG. ¹⁰ Na etatabit suka navera Lahatala omimi, seila evengtahi mi anga iini bale naing veng iiomi aarunge iioras bae veng niang. ¹¹ Na anga na veng banang angu, ualhula na iba ne kurang, arunge aabetat ue kurang eerang omimi angu na vengajar iila. ¹² Kurang eerang angu na ateing iila bot aabetat natoang rae naingveng angu di na ateing ila, uubal barang, niangba malapal tabonggal niangha aabetat seeng veng bot seeng veng niang di emampi angu metma manenang angu na omimi tila. ¹³ SeLahatala ba kuat daeri angu metma manenang angu ebele emampi angu na vengkarajang. ¹⁴ Aulang aarunge iimi aaung ening metma manenang, ue ne kurang eerang angu omi mi tila. ¹⁵ Ingba jemaat Filipi enehe, iina ateing turang na Makedonia aabang eahalang sengilaba halomang-halomang na Lahatala ene Amal veng maring angu, jemaat Filipi ba ne euling na teing bot na Paul metma manenang. ¹⁶ Aulangdi uangu veng bendar Tesalonika mi angu, nababa na parlu anguse iinu panatut metma manenang minu-miaru tila. ¹⁷ Aaurunge na bae neheba na manenang anguba ing valaping niang, aulang aarunge na aaung hamaba metma iuntung ening anguba na valaping. ¹⁸ Emampi angu na medit mi lebe tila. Bot iini na panatut metma Epafroditus enang ot baninghoa metma manenang angu na tarima tila, angase na baba iini panatut metma Lahatala enang omi ot sanang angu edadenang. ¹⁹ Lahatala ba na aing aada aing semba , aing anguba kavasa bisa bot aabetang ejajehing angu Yesus Kristus omi mi base nababa aana parlu angu ana metma maenang. ²⁰ Aung hama metma timang Lahatala enang aulang ejehing emeang. Amin. ²¹ Ni aada haromat anga metma nehe hamulang ang naung emampi inang Yesus Kristus omi mi. Aada haromat metma nekaku naungba iiomi venganamang ba ae nat hama-hamat angami angudi mainang. ²² Nehe hamulang ang naung emampi aada haromat metma maenang, bot neheba kaisar e istana mi karajang ang naungdi, aada haromat metma maenang. ²³ Mutu Yesus Kristus eaung ehama angu, kilang iiroh ba ue iing veng angu at toangpina. Amin.