PAULUS BOT TIMOTIUS E BOMUNG ¹ Naing Paulus bot Timotius, Yesus Kristus emalea, metma neheba Hamulang kadulang uwe Yesus Kristus omimi ba'ae Filipi omiangmi bot metma jamaat ebuang fala bot ejagafala. ² Lahatala esajang gariang bot Mutu Yesus Kristus eamulang e hama iiat toangpina! PAULUS ESAMBAJANG BOT AUNG FENGMBANANG METMA BENDAR FILIPI ADANA ³ Tereng kanap naingfengani nane Lahatala eawung fengbanang. ⁴ Nasambajang metma ingemampi iadana, bot nasmbajang rasat sanang omimi. ⁵ Tangmi karajang hama injil fengmaring ba anametma mainang uwe fed halomang bot anga fengjehi anga. ⁶ Naetatabit nomi metma fenganamang hula aiingba halomang-halomang karajang awung hama anga metma ihahama angami, bot aingba ening awung metma Yesus Kristus eved angu omimi. ⁷ Anguse emamolo angu nandi fengukur awlang metma iadana. Bot ing emampi ae nomimi tila maut hula nabuimi niangba nauwe injil elamal etahi angu fengbanang bot fengmaring aingngangu pikarajang hama-hama uwe Lahatala eawung ehama omimi. ⁸ Lahatala anguba nateing, naetatabit ingemampi ingvengani uwe Yesus Kristus eawung ehama omimi. ⁹ Na sambajang aalang: Awung hama iang atoang bot naateng manggarati. ¹⁰ Awlange ini fengfalail etatabit eaung angu medi. Aulange ivambahi angu hamulang, bot bae jasi niang uwe Yesus Kristus eved omi angu mi. ¹¹ Bot aung hama ehiememang ba ue Yesus Kristus abung hoa angu atoang sengilaba mbaningma Lahatala jajaning. PAULUS EMOLENG ENE AMAL FENGMARING OMIMI ¹² kakanaung serangnaung, nasukat hula iyot atengi nababa naharak ae neambetang omimi anga, taangami angu embele Ene ama elamal etahi angu olatila. ¹³ Awlange istana ejaga vala bot nehe toang ateing hula nahava kaana mi angu metma Yesus Kristus emanami. ¹⁴ Nekaku e neserang efengeleba Lahatala mikuat, angu embele naae hava kaana mi anga malekang ini barenit Lahatala ehur edal angu feng maring ekang takuee mbaliul ekang. ¹⁵ Etatabit, imba'a naung ukur awung omimi. ¹⁶ Ingba iomi awung angu mbaning laimal, maning jahi uwe suka sanang omi mi, bot ini atenghula Ene amal angu fengmaring anguba na'ae mana anga mi ungu. ¹⁷ Sngilase eba omi jasi angu, mbaning lamal mbaning tahi isasuka eamulang, iomi awung niang bot lukur angu ening not mang susat maveng ae hava ka'ana omiangami. ¹⁸ Aulange embili naba ? emamolo ang aalang ini ukur tatalang baening diba Kristus anguba nehe aing palevang bot angu embele nasuka navera ya etatabit nanavera. ¹⁹ Bot na'ateing hula, ibanang omimi bot Yesus Kristus eroh Hamulang pingmoling uwe nababa jadit neambetang omimi angaba ening not lohi. ²⁰ Nepinang anamang ba hula, nabae aloring maniang niang awlang arunge na etatabit fengbaranit awlange, Yesus Kristus angu angaveng bot uwe aing jajaning uwe navambahi omimi mauthula ambeta niangba amina omimi. ²¹ Taangami naing nenomi ambetang angu Yesus Kristus, senge aminang angu neseva. ²² Awlang arunge na etatabit neboaipi anga mi ambeta, anguse nambaning lamal ehi emenang angu ateing. Bot eta amba namalekang fengtalail. Nabae ateing niang. ²³ Ukur aru anga nahamami ahala. Nenomi anguse ambetang ang mbianaila sengilase, Yesus Kristus at hama-hama, bot uangbe lebemianung. ²⁴ Awlang arunge, iingangu nahula niaung na kilang aabetat iiat toang pina. ²⁵ Ukur awung angu embele, ping emampi karajang hama-hama metma suka sanang tomi fenganamang omi angumi. ²⁶ Nabot holang imbele ilase sanang ma' atoang mbaning uwe Yesus Kristus omimi taangami nainganga nembele. ²⁷ Awlang arunge ambetat uwe Ene amal Kristus esuang angu eamulung awlange ta'angmi naholong bale ila ing harak se, bot holong niangdiba, nafengmese hula iini itominu uwe Rohmu omimi bot ukurnu omimi awlange mbaning lamal mbaning tahit hama-hama mbaningma tomi fenganamang uwe Ene ama omi angumi. ²⁸ Neheba iyoang jahi angu ekang feng jakue veng mbaliul ekang, angu efengbanang hula ini tarahak tavetang angu afa'aholong, awlang arunge iing angu salamat metma mainang bot, esuang angu di ba Lahatala ba matubing. ²⁹ Bot Kristus omimi, aung hama angu metma mainang aruge bae hula, aing mikuat anguba emangkolang niang arunge susalala dimetma at hama-hama. ³⁰ Angu embele iindi mbaning ibaning, isenang omimi ta'angmi namilamal namitahi bot iateing omimi nababa naharak anga, bot angase ini fengmese najedung milamal mitahi sehi.