¹ Yakobus , Lahatala bot mutu Yesus Kristus e malea Ana ada metma lelang ari nu bel ta aru ba tibarakang por kanap angu ma inang. OMI A NAMANG ANGU NE ADI E TAPIS ² Ne kaku e ne serang jasi ahala ne metma iadana naba se mang etang e ariak. ³ Aulag ba iini ateing veng banang hula buju e doging ba metma iomi anamang adana angu nabase iini vengtou. ⁴ Kilang e eveng tou omimi angu e bili kudi veng, aulang e molo una bot mi baa mi hili, naiba bae i ganasing niang . ⁵ Aulang arunge, ue ihama mi angu nubaba aung angu e ganasing se ana omi angu ening kanap kanap. seng e metma Lahatala abanang ana eaung angu metma ne toang adana bae hura mananti veng apina niang arunge e aung angu ba ne metma ma enang. ⁶ Arunge, ana Malekang omi angu ening a anamang bot eke vavavang sehi ekang. aulang arunge, nehe ba omi vavavang sehi angu emeng hula tang eumba enar veng boning se ana vava mama angu edadenang. ⁷ Nehe ba aulang angu ana eke veng andet hula Lahatala naiba ma ena ekang. ⁸ Nehe ba omi a aru angu , tening e rama bae ue eabetang omimi niang. KAWASA E MAMOLO ⁹ Aulang ba ne kaku ne serang ba eabetang angu ana ening alolang- alolang angu mi nu se ne ana lebal nehe aing ohit atela , ¹⁰ bot nehe ba kavasa angu mi nu se ne at hela alolang emeng hula napa buma angu edadenang bot ana kudi ue niang. ¹¹ Ved ba poe hipal da angu tutung , bot etatabit herek, napa angu di marota, e buma angu di latak, bot e aung angu di isik. Aulang di ba ne kavasa angu mi nu se e kavasa angu ue niang. GODA SOBA ANGU BAE LAHATALA ABUNG HOA NIANG ¹² Nehe ba ne jasi metma adana di ba ana mang veng tou angu, aung hama metma Eoa, bot Lahatala omi metma e jahi va ila sindal a betang angu ana metma ma enang. ¹³ Nehe ba ne aing soba ana eke veng banang hula , Lahatala ba aing soba, Aulang arunge , Lahatala angu ana bae ne soba niang. ¹⁴ Arunge nehe ba ne soba angu mi nu se ne aing bia aing baraki, va ila e jaling angu ea mulung. ¹⁵ Bot taang mi e suka e mau angu ba ana ea mulung , angse e biliba jasi ahala amba ana veng ajahi, bot jahi ahala angu toang ila se va ila ana aminang angu di vengajahi. ¹⁶ Ne kaku ne serang, Lahatala omimi, nabase eke bir veng a hala ekang. ¹⁷ Sadaka i aung bot e molo, Timang ana atelat huring jara mi at hela , bot eukong e olamana di bae aboi niang bot bae taing telul niang. ¹⁸ Lahatala e jaling angu ea mulung, amal hamulang angu mi Ana tahami e tateni, aulang e nababa amal hamulang mi hoa angu ping metma e mutu ening. LAHATALA ENE AMAL VENG ME , BOT VENG KARAJANG. ¹⁹ Kaku e serang , Yesus omi met te jahi, iini ateing aulange ne nanut user veng me, arunge eke user ma teng bot eke user alil. ²⁰ Arung e nehe ba alil angu ana bae Lahatala e aung angu veng karajang niang . ²¹ Aulang ba e jasi e ahala bot e karita angu aungba bia , seng ila se e diri ening alolang alolang, seng e Lahatala e hur hamulang angu veng me, seng ila se metma omimi taloul, aulang e oramana va ila a betang avening angu harak. ²² Lahatala e hur hamulang angu iini malekang veng karajang, bot eke mang veng me ekang. niang se ia betang omimi angu iini kabule. ²³ Aulang ba, neheba Lahatala e hur hamulang angu, veng me arunge ana bae veng karajang niang se aing angu emeng hula nehe ba apang metma ukong mi apiu angu ede denang. ²⁴ Ana apang angu metma mi apui seng e lamal ila angu se ana apang angu bale veng tajeving . ²⁵ Nehe ba, parenta veng piling angu, ing di bae mida mi ba milihi jedung. e veng banang hula parenta ba tot lohi bot kilang veng tou e veng liu omi angu mi. Aing angu bae metma veng me veng hele bot veng tajeving ening niang. nehe ba ana veng karajarang angu andi Lahatala e aung e hama angu metma e nang. E MOLA ANGU BA BANING LAHATALA VENG SOMBA ²⁶ Nubaba avarasat hula ana etatabit omi metma Lahatala veng somba, arunge ana bae vengani niangse ana bae ajabur angu gariang niang bot ana omi ena kabuke anguse e kalaka angu parasasuma. ²⁷ Timang Lahatala apang adang mi Aing veng somba Aing veng liu bot e jasi e hala veng niang , anguse malekang ali val kakaneng, niang e kalabal ali, ue dilang alil omimi, nabase i uling ia teing , bot ing gariange ing saboi seng e iini eke jasi ahala angu mi abeta ekang.