¹ Na ateyng nababa na ening metma yadana angu, etabit tamadi, bot ingba uwe Laudekia mi, bot nehe emangpi angu bae yapang metma netubing jedung. ² Na hula awulang he yomi lebal tojang, toniku tahana met yakavasa ening uwe Lahatala Kristus Yesus omimi angu yini ateying bot manggarati. ³ omimi anguba kavasa eveng ateying emampi ana veng amang. ⁴ Nababa na veng banang anga hula, nehe abewung eke ying doging met veng ulak bot nehe towang vengmeese,bae molo niang. ⁵ Neboa yipi anga bot noramana bae uwe yathama niang, ngarunge Lahatala e Roh hamulang omomi se na uwe yathama hama KILANG YESUS KRISTUS AMULUNG EJEHING ⁶ Angase ini Yesus Kristus medit me yiLahatala ening ila base kilang omimi abeta. ⁷ yomi anamang ang metma ebariking ening, bot aying mi abeta, emenghula towang met yavomung,yini Lahatala eawung veng banang. ⁸ yava vengani, awulanghe nehe nu eke ying doging, tedot met hur osingba ying metma Roh poralolang omimi yajajala yini eke Yesus Kristus amulang. ⁹ omimi anguba Lahatala ekavasa, emampinmet maenang uwe abetat eboa yipi omomi. ¹⁰ yini ayingmi abeta anguse, uwe vengaring ila, ayingba metma e ong ening, bot kavasa emampi ayingba parenta. ¹¹ Omimi angu ba yingdi iboa amulang ila, uwal manusia atangba metma vengkarajang, ngarunge Yesus Kristus ana turangmi ening ila, ana eboa jasi ahala angu nehe toaing ila. ¹² Jar sarani nehe metma yong tang ilabase, yini Yesus Kristus atamina bot Yesus Kristus abeta, met iomi anamang ening, vengmateng hula Lahatala ekavasa matubing, ana nehe aminang ehamaming bale abeta tila. ¹³ Ahalang avaliba uwe yabua veng anguba, turang mi yini vengaminat ila, angrunge Lahatala ana ingmetma Yesus venghama abetat ila, bot ana piahala emangpi vengampong ila. ¹⁴ Surat uta parenta, untu banga hula ping metma Lahatala venghamua ana venghakang angu Yesus ana venghapat ila. Ana bot vengtou medit doe leut atela venghili. ¹⁵ Doe Leut te venghili ana amina ngrunge bot balea abeta, awulanghe ele balomang angu nawung aing tokung se iyawa aloring. MANUSIA EMATENG ANGU EKE EAMULUNG EKANG ¹⁶ Awulang base nubaba nuhula adange na, niyanghe ved lebal tojang bot uru ved veng somba angu yini eka iying vengkilang ekang. ¹⁷ Emampi angu mang metma elaving ening,Nababa hula uwe hoa angu adana, ngarunge Kristus anguba emamolo. ¹⁸ Neheba avaeningdi, bae moloniyang, bot ingaba malaikat vengsomba angu nawungdi, yini eke vengkilang iyot yiahalang vengtaaning ekang. nehe angu nawungba, poralolang enababa ini iyeng tang ateyingse, ini iyowanguring angu. ¹⁹ Nehe awulang angu, ana baehula, ong angu vengpinat anamang niyang. pi boa, tatang, tia taying tapina metma toonganga wudok, bot emampiangu Lahatala omimi bilang. ²⁰ Poralolang ebuju doging,anguba ening, yini Kristus ataminatila se, etatalang ba,yini emenghula jedung poralolang anga met yimana ening sesi ? bot parenta amulang hula aalang; ²¹ Eke vengpina, eke adang,eke deyi ? ²² Parenta,niyanghe vomung pahangba, manusia metma eela ening angu, piamulung minuse, ana amina. ²³ Parenta awulang angu nawung, nehe omimi wulingse hula, ingba ina iyavaohi bot iyava matubing, aulanghe taying veng somba, bot ini iyava ening alolangdi baemolo niyang base, iboa vengtabang awulang diba hula metma iyabeta vengmea se ebili niang.