¹ salama' hao mai Paulus, to ditahungkung aka' Puang Yesus Kristus, anna hao mai Timotius sola sampeima"ngang, pano Pilemon angkikalemui todiposola mampalambi kara dehata, ² anna pano Apfia solasohong, anna pano Arkhipus solata mengkahang, anna pano jema,a' ang ma'sambayang di dasangmu. ³ Behe anna kamasannangang pano ikalaemu hao mai di Puang Alataala, ambeta, anna hao mai di puang Yesus Kristus. ⁴ Ma'kuhhu'sumanga' loloa' dai di dehata kekukalehai bumo yaling di sambayangku, ⁵ aka' kupolele kapampetahpa'am anna pa'kalemummu yaling di Puang Yesus anna pano di tomasero. ⁶ Kupa'sambayang ingko anna malai paemangammu mahosong anna napunnoio kamanahangang anna ingkanna kamapiaan ang yalingmi i kalaeta pano i Kristus. ⁷ Masannang liua' anna tilolloa' aka' pa'kalemummu solasohongku, inahanna ingkanna tomasero ipasumanga' sumule. ⁸ ka' diantoo, moinna kato kaiyang liu pampetahpa'ku yaling i Kristus anna mala tukangko kupahenta ung babe aka ang pahallu ung babe, ⁹ ampo' aka' pa'kamase, dotang kupalau mating ikalaemu. kodi' ta Paulus dinoa matuama' anna mendahi bura' toditahungkung aka' Kristus Yesus... ¹⁰ Kupemala mating ikalaemu lalupano i ana'ku Onesimus angku lambi' nonge mengea' itahungkung, ¹¹ ang dolu takekuna pano ikalaemu, ampo' inoa kekuna liung noa mating noa pano ikalaeku. ¹² Kusuoingko mating bua inahangku, sumule mating ikalaemu, ¹³ ang setonganna pemala loloa' lasibaha tohho anna malai nabala'io nasohengngia' yaling di tahungkung napobua' ihsinna suha' masero i palambi'. ¹⁴ Monnakatoo dai ungsituhu'i, dai kuaku laku babe aka siamo anna atoi lamapia ang laung pembabeing dai ka' ipahsa, ampo' situhu' pampemalanna inaha. ¹⁵ Umbai diante' suhunna napensaha'io sampai' anna malai sibaha lolokoa' lambi'sapano-panona. ¹⁶ Dinoa tadiang sabua' palli' kale, ampo' mendahing siullu'ta ang dikalemui. Kusa'ding si'da-si'da tama dikalaeku,londonang dio,sihapang sabua' noa toi' sihapang mesa solasohong yaling di Puang Yesus. ¹⁷ Dahi, ponna ke unsanga liua' solasohommu yaling di kapampetahpa'ang, tahimboi inde ta Onesimus sumule sihapang kodi' ang untahimbo. ¹⁸ Ponna ke inang ahae' kasalaang ang nababe diting bahtu' keindang, kodi'dang ang la mantangkung asangnging. Dahi mapia kuuki' kalaeku done indee dianto: ¹⁹ Kodi' Paulus la mambaya' asangnging indanna. Anna dao mangki' la kupakaleha didiona indammu pano di kodi', dianto katuhoammu ang bakahu menandai to sahani. ²⁰ O solasohong, kalemuia' babeingka' indee aka' siullu' ingke yaling Kristus. Kelamalai umpasuhakaa'. ²¹ Suha' inde kuuki' aka' kuinsang la umpembaberintee' samai ang kupalau. Anna kuinsang la mai'di puhake' ang la umbabe. ²² Mesake' ang pahallu kupalau, aka, kuhannuang natahimbo ete' Puang Alataala sambayammua' lambi' natehtea' sumule mating. Kelamalai ungkalemuia' anna tohho sangkaka' di dasammu ke donentoo. ²³ Salama'na are' ta Epafras ang kusibahaing dinne di tahungkung aka' untindo' Kristus Yesus. ²⁴ Salama'na toi solaku ang kusibahaing mengkahang dianto: ta Markus, ta Aristarkhus, ta Demas anna ta Lukas. ²⁵ Pa'kalemunnarang puang Yesus Kristus ang la mambehekoa'.