¹ Nako ne Paulus, ne Yesus Kristus in atel natuin Abalbalat in nekan. Noi tuaf-tuaf aknino anbi kot Efesus, tuaf-tuaf apalsait anbi Usif Yesus Kristus. ² Athoes nok amina noi ki nako Usnenog, hit Amaf, nok Usif Yesus Kristus. ³ Pules noi Abalbalat nok hi Amaf Abalbalat Usif Ne Yesus Kristus, le anfekit athoes anbi nanan nai Kristus nok athoes aknino nako nenogtunan. ⁴ Natuin, inan anbeti kit anbi nanan ne Kristus nako palmenug pahapinan he hit naknino kit nok kat mu'if sanat anbi in matan. Natuin manekan, ⁵ Inan betik kit nako palmenug naiti ko anjali in anah-anah sin natuin ne Yesus Kristus inlomin nok lomit Usnenog. ⁶ Inan mo'el let anfe pulse amasat at hoes sin, le anfelelen nok lum-lum noi kit anbi anah-anah amanekat. ⁷ Anbi In, hit nanan tapeni aosona let anboni In nan aknino nok sakosat noi hai tinhais nok le ho manakem ho mu'in athoes, ⁸ Le Abalbalat athoes nathoebe noi kit nako ale kanan hinef nok le hinlel. ⁹ In naton noi kit In lasij tolog nak inlomin nok inatenab alekot. Anboni athoeb ne Kristus, ¹⁰ le lofa nanaobel anbi in lekug antele he nabua le sa'-sa' anbi Kristus in nanan, anbi le nenogtunan ma le anbi pahapinan. ¹¹ Anbi Kristus, hit tam sa' atam bi he asimo amaus le anbeti kit nako palmenug anmatom nok hitatenab, le hit apmepug le ale sa'-sa' anbi fekat In lomit. ¹² He nati hit ahunut at tao afnekan noi ne Kristus lof le anjali pules-pules anbi in kanan. ¹³ Anbi In, him sa'-sa' le haim nenam lalij le aon amneot, noi lasij beno alekot amneki totis noi ki, ma ampalsai noi, le anmalak neiki Asmanaknino le anta'en kitele. ¹⁴ Asmanaknino anjali futus amaus noi kit, taleka nenog sakosanat natebon noi sin le anjali le anfani an Usnenog In namaosekun-- noi pulse Usnenog in masan. ¹⁵ Nak o na, nako au nen anbi hi nek palsait anbi Usnenog ma aneki noi ale tuaf aknino, ¹⁶ au ka usnas fa piut-piut he toti syukur noi ki lekug i au umnau ki anbi onen-onen. ¹⁷ Au onen he nati asmanaknino anbi hit Usnenog, ne Yesus Kristus, hit Amaf in masan, anfeki hinef ma naklil "on anbi hinef antom in". ¹⁸ Au onen he nati hi matmen natfain ma napeni meusine he nati hi mipeni hinef ma afnekan le anmasel antaman bi inam no'en, In namu'in le anmasel anbi amaus le In masan anfel tuaf-tuaf aknino, ¹⁹ ma abe'if anaeg le katsu' tanef fa noi kit le palsait, on le me le naklil on anbi be'if anae leluf. ²⁰ In be'in anaele'uf i naklil on anbi tabug i inan fenan fan nako ne Kristus nako atoni amamatesen ma natokob anbi In nanukun ane'ug anbi Sonaf nenogtunan, ²¹ le In bi fafon innes nako fekat-fekat, In kuasat, be'if matani, ana aplenat, ma innesi nako kanaf-kanaf lebin mu'i nite, ka nugaf le lekug i, mes anbi lekug-lekug amnemat. ²² In nan mo'e ale sa'-sa' anbi inhaen ma anfe in aon anjalil anakaf noi ale sa'-sa' le anfel noi toslanit, ²³ le in aon ne kun nok mahenu nani sin okoke nok ale sa'-sa'.