V 1 Nameno' sari an parenta aneng uada a'hol, fede' parenta o' name supi uaneng, no' hee parenta aneng hodi Lahtal femi ho, fede' Lahtal supi utub. ² Honife, ano horo parenta aneng lafang, ho hee aiho sa Lahtal O' mateng pa' di lafang, no' hee supi hukung salang fit ho' so bo' mate e' re eng. ³ Fede, name nano' panenho, parenta aneng e' a' no' baroc nene, sobo name nasah panen horo. Honife, ifetang homi maa i e' parenta ubaroc nene? Na o' no'fe panen honie, supi iri utarain, ⁴ fede' supi hodi Lahtal ubaleta puin inono'. Honi sobo mang fede' inasah panen hee, ubaroc fede' parenta nei fanho, o' udume, eme o' pilang a' ra. Supi hodi Lahtal ubaleta, sariho Lahtal o' a' ri ing fail supi a'no' lame med name nasah panen e' re eng. ⁵ Honife, i a' lol a' ta ain, sariho e' Lahtal ei a' ri ing fail horo nene sobo, fede' iom kaka' ai hodi. ⁶ Horoba iridi lafung fali mana, fede' supi hodi Lahtal ubaleta sobo, sari na horo fe supi ukaresang. ⁷ Barpi i med name taro en so hee med en; lafung fali so hee med o' aneng en, don lang ei so hee med o' aneng en, ubaroc ei so hee ubaroc, uada ahol ei so hee ada a' hol med a' ra ham NAME BENG UKARANG HOROFE HUKUNG O' ASEL MATE ⁸ Haai ano horodi o' na ernu tuping nene, honi sobo, nu ukarang am hee, beng hodi ukarang, fede' nameba so name beng ukarangho, Taurat o' Hukung a' no' an am. ⁹ Fede' haai ob bar beng a' ra nasah panen, haai name a' mine, haai na ta'u, haai name o' na ernu iom tameng, med parenta beng sodai a' ra eh honi hee, sobarpi a' ra mateng pa' hoo mi am,"Name beng tofang ukarang mang fede' ibo' mate ukarang eh honi. ¹⁰ Ukarang ho e' nasah panen med so nameno' beng a' raham nene. Honife, ukarang ho, Taurat o' Hukung a' no' an. ¹¹ Hoodi honi, i o' sel ho a' hol honife, fed hoo i tar eh so hee ihir toh, asel fed hoo, il luling o' sel mang fanang bi' med tere eng, sobo e' mang fede' aai nang pi O' a'tino' bit honi nene am. ¹² Dil paka talai am, med dil lel fanang am, honife ma honie, paka ei panen a' ten ernu ho pi med few, sobo lel ei nei balep horofe pi med puin. ¹³ Ma honie pi fetang tari u ada a'hol mang fede' dil lel mi honi, e' diang tang hufang tabur nene, e' ob bar o' ta'u dur a'ri ing fail nene, e' tebarobe tetaba' tom puin tata ain nene. ¹⁴ Honi sobo, Tuhan Yesus Kristus med ei a' no' sobo haai obo' mate ho a' lelang a' bubung puin ei i' nung ho a' ta ain e'.