HALOW SURA' O ASEL MATE TURLO
1
Nub Ai pec hei omi itito afetang he'e, sorga om tining rameng od bo' om mi.
2
Med, nadun he'e malaikat pir itito Lahtal araham mitufeh, med huling mate itito name supi en
3
No', malaikat bengnu ma dortatoh*, mahen apew eleme masnu sapuin; mahen few o' naernu name med en, honie sa name bolang tofang o' aome pa' ara med dor mas kadere mate araham tufeh ho tameng.
4
Horo', mahen few o' bano' med name bolang o' aome pa' barpi malaikat atang homi mid Lahtal apong adang holemid.
5
No' he'e, malaikat mahen few elemeho med, sa dorta afail med mi sa few pali' mate tahel; horo he'e alepang he'e burang da'ud dil mer tafufui toh.
HULING MATE AAINANG SAM OMIUT NAME APU
6
Ho no' he'e, malaikatba huling mate itito puinho sari utaro' huling apu.
7
Malaikat aainang sei huling apu he'e, noi es med afail e fui sara talol; name u'huin pali' mate tahol, horo pali' habuden mimate, ti lelang ernu med banang lew fail oh.
8
Malaikat o' mialo sei huling apu he'e, nanu mang fede' doi afail honi name few tang lehel; tang habuden mate sano' fui,
9
horo he'e nafetang ernu tang om miho min oh, med kapala tanglol tofang po' butung.
10
Malaikat o' mitow sei huling apu he'e, ibing matenu huring talol afail honi, muj tofang med sei engtapir tofang lehel.
11
Ibing mateho ani Apsintus. Horo, sei mitofang sano' apsintus, name tofang min, fede' seiho maarkio am.
12
Malaikat o' miut sohuling apu he'e, fed habuden mate, ulhabuden mate, ibing habuden mate hod te'eng, paka oh, dil lel dil paka, dil pakadi honi.
13
No' nadun med ma'eh he'e, marubain matenu burang ham homi lil lame eh, samateng amang mulang ubangho, "Sah karang, min male, taru' malot, iri pali' matetaho iraham, fede' huling mate o' mitow malaikat bengnuso foil apu ano' amang."