HALOW SURA' O' ASEL MATE ERNU FALING TIEINU
1
No' hee, name amang bolang bolang na maeh, mangfede' name lubung mate sorga mi honi, supi ubangho,
"Lahtal utarain!
Il luling,
lel madal, med aneng afen pi Lahtal o'na,
2
fede' Sa a'hal a'bul lap sa panen abul abul;
med Sa no' ham med name sah mate panen puin pali' mate a'sahain, med o'name baleta ernu o'fui herho, Sa o'abor o'den med ai sah panenho enam."
3
O' mialomi,
supi ubangho,
"Lahtal utarain!
Ai sah panen o' abano' mid sam so em a'meng."
4
No', tumo' pir ernu faling alo* med nafetang pirutho, fa'ur muding, supi Lahtal kadere mate tamieh uada ahol, ubang,
"Atino!* Lahtal utarain!"
5
No', name amang pa' kadere mate ta maeh,
"Pi Lahtal utarain, iriba Ari ubaleta sobarpi,
kaai eme mate, A'ri uada ahol!"
NUB AI OB MED O'DIANG PUIN
6
No', na alepang hee name lubung mate amang, mangfede' afe mate honi, mangfede' arib mate da'ud honi,
ubang,
"Lahtal utarain!
Fede', Lahtal Tutung Kufa' parenta puin.
7
Mapi loil asal bad herang,
med Ano' mate ano' lafining, fed Nub Ai ob med o'sel miam,
med O'ob salelang sabubung a'danang am.
8
Name fen afel bala huring mer med en puin am, fede sari fen ho, name bolang ernu o'panen a'bul."
9
No', malaikatho nara mateng, "Na hoo hul: 'Nameba maring med ho' Nub Ai o'diang mi na'de ho tofang lu'ung med!"' No', safoil nara mateng ubang, "Hoo, mateng pa' abul Lahtal mihel."
10
No', na malaikat e'fa sel mi fa'ur muding uada ahol. Hobo, sa nara mateng, "Ahaai naho panen e', fede naridi name baleta o'rupa ari honi, med odiailbar bengba Yesus o'matengpa' apuin dume honi. Lahtalfe uada ahol, fede Yesus o'mateng pa' ho roh na'hol dil maeh.*"
NAME KUDA AFEL TAMIH
11
No', nadun hee sorga sari during, med kuda afelnu hel; Ainu tamieh ani A'lol ataain med Abul, med a'bul om mi Sa abul lap ahal lap, med malipuin.
12
E'fail mangfede' ahuring honi, E'lafung hide tofang tamang, med A'ni ara hul o'lmeng, sobo name pirnudi a'hol nene, sailalho Sa'riso sona ahol.
13
Sa kodba foi mibalam ho ma, med A'niho Lahtal O'fompa'.
14
Soldaj sorga miho barpi A'taain, supi kuda afel ta barpi, med afen afel bolang bala bala sari an puin.
15
Nei hudingnu A't om mihel, sa puin bang ernu beh par. Sa dob na ol puin supi parenta. Sa Lahtal tutung kufa' o'baneha mate a'ri'ing fail om mi anggur ding.
16
O'kod mate med A'potho ani hoo tahul: AFEN MID AFEN BENG E'MOTA, TUANG MID TUANG BENG E'MOTA.
17
No', nadun hee malaikat nu fed om mitufeh. Sa hiw lelang ernu luling ham lil eh ho o'lofe, "Ma, tau'nung honie Lahtal o' na'de mate a'taain,
18
honie i afen ernu o'hir, soldaj o'mate o'hir, name kufa' o'hir, kuda ernu med namih o'hir, nameno' sobarpi o'hir, i a'de, sariho name ilmang, name karesang aai, name kaai med name mate sobarpi i o'hir ade."
19
No' nadun hee, sari binangtaho, afen ernu pali' mate ta, med supi o'soldaj tofang supi ta' unung no', supi Ai kuda afel tamieh ho, med O'soldaj supi ara mali puin.
20
Horo hee, binangtaho name a'puin, o'nabi a'bul neneba, na utahoir panen binangta apong adang homi, puin name tofang a'ra se ahal lol hodi name apuin, med supiba o' utub med, fa binangtaho uada ahol hodi name apuin. Supi sobarpi sofetang fetang name few tang afail huring talol eh ho lehel.
21
Med o' ameh ho, neiba Ai kuda afel ta at mihel ho, puin supi amine, horo hee, hiw lelang ernu supi o'hir ade ato' in.