HALOW SURA' O' ASEL MATE ERNU FALING IFIHING
1
O' utub matenu burangta nadun ahol, pi utahoir, malaikat pir itito kumba pa' itito sari an, sari hoo kumba o'amujmi, fede' kumba itito om mi horofe, Lahtal o' ari'ing fail o' ohmi.
2
No nadun hee, tang hukung lel honi sobo afail ara om mi, med supiba binangta med o'patung, med ani o'taanpa' ano' molengho, tang ukung lel adi homi toh pir, supi Lahtal o' e'dang sari an.
3
Supi Musa Lahtal ubaletaho,* o'dal pa' puin dal, med Nub Ai o'dal pa' di puin dal o'pa'ho:
"Lahtal mate lafining, O karesangho barpi somimate pi utahoir,
ho Tuhan, Lahtal So kufa'.
Bang ernu o'afen, O lame so mulang abul.
4
Anoso maa e Elbaroc nene, ho Tuhan
med e' Ani utarain nene?
Fede, Ari horo mi bolang.
Bang ernu ho' Apong adang homi Ari uada ahol,
fede' Ei mulang te'engho A ano' lelam."
5
Na hoo barpi no', nadun hee Lahtal O'bang sorgamiba, mi o'fompa' umateng eiho sari during.
6
Malaikat pir ititoba kumba sari anho, Lahtal O'bang homi hel, fen afel bala, huring madal puin, med nofang ai mas sabaangle.
7
Nafetang pirut anai homi, pirnu tu'ai mas pa' itito med malaikat pir ititoho en, sari tuaiho, Lahtal fetang em so em a'mengho, o' a'riing o'fail afeng.
8
Lahtal O'bang om bolangho, Lahtal mate lafining tutung kufa O'bano' afeng; honie malaikat pir itito o' kumbaho oh dai honi hee, name pirnudi Lahtal O'bang omho lemid sah.