YOHANES O SURA' ASEL ( 18 ) ERNU FALING TURLO
1
Yesus mang na afang rat ho'o ubang no', Sa So sakola aiybar arasam Kidron mol den leam. Hemang bo' rupa eleme nu homi, horo Yesus So sakola aiybar ara lemid.
2
Yudas, sakola aiy nu ba om sah Yesus araham ho, sari hemang rupa ho ahol, asel Yesus seiy sakola aiybar nun ara hemomi ta'unung eh.
3
Yudas, mang soldaj lubung nu med no' he'e, imam-imam olafung u baleta eiy med Farisi hinung, pan tub, muh teiybar med balep puin ho' hemang rupa ho leho'
4
Yesus, Sa ahol bite na an-an ma' arupa' araham fe, fa apong tur toh horo supi atan, "Anofe i lap eh so?"
5
Supi O mateng abor' "Yesus Nazaret mi ho." Yesus supi aramateng, "Nari horo Yesus." Med Yudas ba omsah Araham ho, supi ara toh.
6
Ho araham Yesus ubang ho, "Nari horo Yesus." name nun ho sol holong ol fa'aiy ta hel.
7
Horo he'e, Yesus foiy supi atan, "Ano fe i lap eh so?"
Supi O mateng abor, "Yesus Nazaret mi ho."
8
Yesus mateng abor, "Na u iramateng am Nari horo Yesus. Fe, mangfede' i Nari lap so, soho nine No sakola aiybar nun ho sabor sam."
9
Na ho'o arafe honie sa Yesus o mateng pa' ba Sa ubang am ho ano' an: "Ma na barpi ba A med Nenam ho, nu di e nabung suhuin nene.'
10
Simon Petrus, ba ney nu puin, so ney baring med Imam Mate o u baleta eiy ho araham adi-din, horo ba baleta oname afel tani lol ho hor; Imam mate o ubaleta eiy ho ani Malkhus.
11
Horo, Yesus Petrus aramateng, "Neiy ho med o tep om mi! Cawan ba Nimang med Nenam ho'o, ahal Na musti na feso?"
YESUS ARASAM HANAS OLAP
12
Horo he'e, Romawi o soldaj nun med soldaj o mate nun foiy med Yahudi hinun u baleta o name nun, Yesus apuin med apec,
13
Supi Yesus fitsam Hanas fe sotur abung, kayafas o ob, ba tun om homi Imam mate puin ho.
14
fe kayafas horo fom pahang med yahudi hinung ara mateng bite, na o mina'tino' he'e bite namenu min so serang araham. PETRUS E YESUS U SOFO NENE
15
Simon Petrus med sakola aiy beng di nu ara. Sakola aiy beng ho Imam Mate ahol, fe sa Yesus ara Imam mate eleme elafeng o hemang lemid.
16
honi sobo, Petrus luling mi toh, mong sear abung. horo he'e, sakola aiy beng ho, ba Imam mate ahol ho, sabor luling lehel ob bar se'ar buang eiy ho ara hu'tang, horo he'e Petrus aramid.
17
Horo, ob bar ba se'ar buang eiy ho Petrus atan, "Ahal dari di Aiy ho o sakola aiy nu?"
Petrus mateng abor, "E nene!"
18
Mang afaiy akala no' Baleta o name med Soldaj o mate hemo mi toh asel sel ho' araham olamail ma'ab bi, horo supi sari pauw. Petrus di supi ara toh e sari pauw.
IMAM MATE YESUS ATAN
19
Horo he'e, Imam Mate Yesus O sakola aiybar med O gur pel eiy ho uta'ain.
20
Yesus o mateng abor, "Na hu'tang lel puin fa pali'mate ho araham am. Na gur pel eh ho, mong a'ome bang nun, med lahtal o Bang, no' yahudi hinung mi ta'unung eleme homi. Na e tafuning-tafuning hu'tang eh nene.
21
Mi taro'ni eiy fe i Natan? ta'ayin so honi he'e, supi ba maeh alepang na naba fe u supi ara mateng am horo atan; supi ahol nabafe Na u supi ara mateng am."
22
Hoaraham Yesus mateng honi eh, aiy na buang nu homi tufeh ho apong fa' mi par horo ubang ho, "O rupa honin so A imam Mate o mateng abor?"
23
Yesus o mateng abor, "Bite Na nanu u hu'tang ahal am so honi he'e, utub ema o'ahal taromi so; sobo bite na u hu'tang eh ho abul, mi taro'ni eiy fe i Nari par?"
24
Horo, so Yesus apec meng honi, Hanas tahow Imam Mate Kayafas en.
PETRUS FOIY YESUS U SOFO NENE
25
Ho araham ho, simon Petrus daiy toh e sari pauw eh. Horo, supi atan, "ahal aridi Name ho o sakola aiy nu so?" Petrus kalufe horo mateng abor bite, "Enene."
26
Imam Mate o baleta eiy nu, sari ho name ba Petrus afel hor ho o tenang el, ubang ho, " Na edun he'e ahal aridi Araham-ham mong hemang rupa homi?"
27
Petrus foiy ara kalufe minu ta'am, fe so horo he'e hiuw u'le.
YESUS ARASAM PILATUS OLAP
28
Horo he'e, supi Kayafas eleme mi Yesus arasam abul ahal bang leam, ho araham daiy lalami bi, fe supi horo di e abul ahal bang om ho lemid nene, hunie supi ha'aiy sepur e, honife Paskah o na'de no.
29
horo, pilatus luling lehel supi olap e supi atan," Naba fe i puin name ho'o ano' ahal?"
30
Supi mateng abor ara mateng ubang ho, "Bite Name ho'o e name ari'ing nene, ni ma' e fito' abung nene."
31
Pilatus supi ara hu'tang, "Sariho fitsam e hi hukung puin o' abul o' ahal lap." Yahudi hinung nun ho mateng abor, "Sariho e ni hukung ho araham te'eng nene, bite namenu hukung amine fe ho."
32
Ho'o ara fe hunie sa, Yesus o mateng pa' ho ano' an, ba outub bit bite, Sa mi orupa taro' ni.
33
Horo, Pilatus sabor mid abul ahal bang om lemid Yesus olofe, e' Atan, "Ahal Ari Yahudi hinung o Afen?"
34
Yesus mateng abor, "Ahal ta'ayin pa' ho ari fe mi ho' so, eme ahal name beng so Nari ho u aramateng?"
35
Pilatus ubang ho, "Ahal nari yahudi hinung? bang pali', med O imam-imam o lafung so alorang med nen. naba fe a panen am?"
36
Yesus ubang ho, "Neleme nelafeng e pali' mate ho'o ta nene. sobo bite Neleme Nelafeng pali' mate ho'o ta. No baleta o name musti u te-teng u lafang, hunie Nari ha'aiy nalorang Yahudi hinung en e. honi sobo, Neleme Nelafeng e pali' mate ho' o ta nene."
37
Pilatus ubang ho, "Honie, Ari ho Afen aiy nu so?" Yesus mateng abor, "Ariso ubang bite Nari ho afen aiy nu. ho'o ro eiy araham horo u nafain, med ho'o ro eiy araham horo Na ho' pali' mate ta, honie na o abul fe u mateng u lurung. Nameno' nun ba na o abul mi ho' ho, namang pa' alepang."
38
Pilatus aramateng,"Na o abul faleng ho naba?" fe, hu'tang honi no', pilatus luling lehel Yahudi hinung olap, horo supi aramateng, "Na' o ahal nu di, na e abung ahol nene.
39
sobo, i asala nu ho ara, bite hair mate Paskah ho'o, na musti hukung o namenu ano' il fe. honin fe, ahal i inung honie na 'Yahudi hinung o Afen' ho'o ano' il?"
40
Supi foiy mateng abor beat bite, "Ha'aiy Name ho ano' ill e, sobo Barabas!" Barabas ho he'e name ta'u sah nu.