YOHANES O SURA' ASEL MATE ( 15 ) ERNU FALING IFIHING
1
Yesus ubang ho, "Nari ho'oro anggur asel o atino' med Nimang ho u buang, u karesang eiy.
2
O abale Nabung nun ba o pir, opa' ha'aiy ho, Sa feuw, med abale nun ba o pir, o pa' ara ho, Sa ano' bolang, hunie sa o abale ho o pir, o pa' hil foiy mi lafoh.
3
Iri ho so atino' bolang am asel fompa' ho Na u ira hu'tang am.
4
Ma Nom mi ieleme med honie Na iom mi. Orupa abale ho so bo-bom solo hil sah, honi sobo sa anggur asel u toh fe, mangfede' iri di orupa honi hil sah, honi sobo i nom mi ieleme med fe.
5
Nari ho'oro anggur o asel med iri ho, o' abale nun. Nameno' nun ba eleme nom mi med Na ara om mi he'e sa hil o pa' lafoh, i nanu di panen sah asel i e nara nu nene.
6
Mangfede' namenu e eleme e nom mi nene, name few mangfede' ti abale honi horo he'e ta'at; name ta'unung feuw afaiy om lehel, horo he'e faiy oh.
7
sobo, i so nom mi ieleme med eh med No mateng pa' iom mi seleme med, naba horo di iom uma i bang, honi he'e name med ien.
8
Na ho'o eiy araham name Nimang ano' mate lafining, sari ho mangfede' i hil obir lafoh honin he'e, iriho No sakola aibar."
YESUS PARENTA HONIE SARI UKARANG
9
"Mangfede' Nimang Nari ukarang am honi, honin horo fe Naridi iri ukarang am; so No ukarang om horo mi ieleme med.
10
Mangfede' i No parenta ho alol ata'ain barpi, i No ukarang om mi ieleme med, mangfede' Na Nimang o parenta alol ata'ain med O ukarang om mi neleme med.
11
Na an-an ho'o Na u ara hu'tang honie No bad herang ara om mi sano' afeng
12
Ho'oro no parenta: I musti iri ukarang, mangfede' Na iri ukarang am honi.
13
Ukarang den e mimate fa namenu o ukarang ba solaman med so tenang elbar ere'eng honi nene.
14
Iri horo No tenang el bar mangfede' i no parenta ba na u ihow ho alol ata'ain.
15
Na e iolofe baleta o name nene, asel baleta o name ho naba fe o tuang panen sa e ahol nene. Honin sobo, Na iolofe tenang el asel barpi ba Na Nimang abung ma'eh, Na u ara hu'tang am.
16
I' e nari tara' nene, honin sobo nariso iri tara' med ieleme mi' amihing honie i sam opir ara, opir ho so honi eh, honin e mang naba horo di i Nani puin Nimang abang, Sa musti med en.
17
Ho'oro no parenta: I musti iri ukarang fe!" YESUS SO SAKOLA AIY BAR ANO' NAUMA
18
"Mangfede' pali'mate om iye bune, i' ahol bite pali' mate iye bune daey ta ho, pali'mate misutur om Nebune am.
19
Mang fede' iri pali' mate mi ho', sa musti pali' mate so na ukarang; sobo asel i' e pali' mate miho' nene, honi sobo Na pali' mate mi ari tara' am, asel horo eiy fe pali' mate iye bune.
20
mateng pa' ba Na u ira mateng am ho uma: ' Name baleta eiy ho mi mate so tuang emota sah'. Mangfede' supi Nari beh Nari par am honi he'e, supi di ari beh ari par. Sobo supi No fom pa' ho alol ata'ayin honi he'e, supi di o mateng pa' ho alol ata'ayin.
21
Honi sobo, barpi ho supi panen araham, aselba Nani horo. fede' supi Aiy ba nahow ho e ahol nene.
22
Mangfede' Na eho' e, naho ubang supi araham nene, honi he'e supi o doc ha'aiy. Honin sobo fed ho'o supi o panen aten fa doc araham ho ha'aiy.
23
Name ba om nebune, sari di om Nimang e bune.
24
Mangfede' Na e karesang ernu ba name beng panen daiy ho supi anaiy homi panen nene, supi e doc ho med nene. Honin sobo, fed supi dun aholam sobo supi om so Nari e med Nimang ebune eh.
25
Sobo, fompa' ba hul Taurat O sura' om mi ho supi ano' an fe: 'Supi om nebune sobo o asel ha'aiy.'
26
Mangfede' o iri muling eiy ho', ba Na Nimang abung ahow ho' iyolap ho, sariho Roh abul ba Nimang mi ho', Sa musti Nari u hu'tang.
27
Med iri di ma' u hu'tang asel i' a'aiynang mi Nara tohuiyl am."