YOHANES O SURA' ASEL MATE ( 14 ) ERNU FALING UT
1
"Ha' aiy iom baroc banibung e; Lahtal O atino' fe bit, Naridi No atino' bit.
2
Nimang O bang mi mih tar eleme tofang, mang fede' e honi nene, na ma' u aramateng am asel nasam hunie eleme nu utaro' iere'eng.
3
Mangfede' Na sam e eleme nu utaro' ere'eng, Na foi Nabor ho' irasam Nolap sam honie Na ara taromi he'e, iridi ara homi.
4
Med, iri di ahol se'bur ba Na lol sam eiy ho."
5
Horo, Tomas Aramateng, "Tuhan, A taro lol sam ni e' ahol nene, taro'ni fe sari se'bur ho ni ahol?"
6
Yesus aramateng, "Nari ho'oro fe se'bur o abul, med o fetang eiy. Ano horo di sam Nimang olap sam sah, mang fede' sa e Nalaiy nene.
7
Mangfede' i Naholam, honi he'e Nimang di i' ahol; Fed ho'omi ho, i Nimang ahol am med i' Edun ahol am."
8
Filipus Aramateng, "Tuhan, Imang ho u nietub, horo di rupa sanang ma niraham am."
9
Yesus o mateng abor, "Filipus Na ira lufang mengam ho'o i e Nahol daiy? Anoso dun Nahol am, sa dun Nimang di ahol am, taro'ni fe i ubang bite, 'Imang ho u nietub?
10
Ahal i e o atino' bit daiy bite Na Nimang om mi med Nimang ara Nom mi? Matengpa' nun ba Na u arahu'tang am, Na e no bo-bom nom alol bit nene, sobo Nimang ba ara Nom mi horo So karesang ho akala.
11
O atino' bit Naraham, bite Na ara Nimang om mi med Nimang ara Nom mi; ha'aiy so faleng he'e, o atino' bit asel karesang nun horo eiy ere'eng.
12
Na Nom abul puin, ara mateng, name ba no atino' bit, karesang ernu ba Na panen, sari di ma' panen; med karesang o mi mate ho'o araham barpi sa panen, asel Na sam Nimang olap.
13
Naba fe i Nani puin bang, ho Na musti panen honie Omang ano' mate lafining Aiy om mi.
14
Mang fede' i Nani puin naba fe bang Naraham, na musti alol panen. ROH BOLANG U PAHA'
15
"Mang fede' i Nari ukarang, i No parenta ho barpi ata'ain.
16
Na ma' Nimang abang e, Sa o iri muling beng med ien, honie Sa ira tohuil so em,
17
Sariho Roh abul ba pali' mate u sa'ain, asel pali' mate e dun ahol nene med e' Ahol nene; sobo i Ahol asel Sa ira tohuil, med Sa ara i afah mi.
18
Na e i'ad mangfede' name alama'u honi nene, Na musti iolap ho so.
19
E lufang nene, Pali' mate e dun nahol nene am, sobi iri ma' dun Nahol; asel Na fetang, iri di musti fetang.
20
Sel ho mi he'e, i ma' ahol bite Na Nimang om mi, i ara Nom mi, med Na ara iom mi.
21
Anoso No parenta ho apuin med alol panen, sa Nari ukarang; med name ba Nari ukarang musti Nimang ukarang, med Na ukarang araham, honie Na Nari med etub."
22
Yudas, ba e Iskariot nene ho, Aramateng, "Tuhan, mitaro'ni eiy fe A Ari med nietub e pali' mate etub nene?"
23
Yesus omateng abor med ubang ho, "Mangfede' namenu Nari ukarang, sa musti no fompa' ata'ain; honie Nimang sariho ukarang, med Ni musti ho olap ho' ara mih, ara tar.
24
Honi sobo, name ba e Nari ukarang nene, e no fompa' ata'ain nene. Med, fompa' ba i maeh e Nari mi ho' nene, sobo Nimang ba u nahow ho mi ho'.
25
Ho araham Na daiy ira eh ta ho, afang rat nun na u ira mateng oham.
26
Honi sobo, o iri muling eiy ho, sariho Roh Bolang, sari horo Nimang nani mi tahow, Sa na afang rat u ari gur pel, med sa ano' uma fa afang rat ba Na u ara hu'tang am ho araham.
27
Il luling no' ham Na med en ara tuhuil; il luling no' ham Na med en, e mang fede' pali'mate en horo fe Na en nene. ha'aiy om ho ano' baroc banibung eme ano' bibil dada' nene.
28
I maeh ham sariho na uiramateng bite, 'Na musti sam, med na musti foiy ho' iolap ho.' sobo i Nari ukarang, honi he'e i bad herang asel Na sam Nimang olap, fede' Nimang mi mate nemota.
29
Fed naho e ara daiy Na u ara hu'tang am, honie mi se-seh naho ara, i o atino' bit.
30
Na e na o lafoh u ara hu'tang nene am asel Malang pali'mate eiy ho ho' maeh. O malang apite' di e Nemota nene.
31
Honi sobo honie pali'mate ahol bite na Nimang ukarang, na panen orupa mangfede' Nimang u nari parenta honi. toh ema, mae pi ho'o mi sam."
30
Na foiy ara hu'tang lafoh nene am asel pali mate o kufa' ho'o ho' ma eh. Sari o kufa' ho e naraham nene.
31
Hunin sobo honie sa pali' mate ahol bite na Nimang esah. Na akala orupa mang fede' Nimang u nahow huni, Toh e' pi ho' omi tabor."