YOHANES O SURA' ASEL ERNU FALING ( 13 ) TOW
1
Hair mate Paskah ho lefa dai he'e, Yesus ahol bite, Sa ma' pali' mate ad atain Sa sam somang olap, Sa mang so pali'mate ta u karang no', Sa supi ukarang sam so amuj.
2
Dilpana o na'de om homi eh honi he'e, setang Yudas Iskariot, Simon o aiy ho om halup, honie Yesus asahain lap.
3
Yesus, ho araham Sa ahol, Omang na ernu alorang atang om mi am, med Sari ho Lahtal mi ho', musti sabor Lahtal olap sam,
4
na'de om homi sa sahir toh So kod mate hing, Sa napah afel bala puin Saheng apec.
5
Horo he'e, Sa seiy abor med baskom mi no', sa so sakola aibar e'fa hafo', no' napah afel bala Aheng mi apec eh ho puin luh ano' lairang.
6
Horo, sam Simon Petrus mi, Simon Petrus Yesus atan, "Tuhan A ne'fa hafo' so?"
7
Yesus mateng abor aramateng ubang ho, "Naba fe Na akala eh, fed ho'o i e pahang nene, sobo selnu mi i ma' pahang am."
8
Petrus ubang ho, "A e ne'fa hafo' eiy nene!" Yesus mateng abor, "Mang fede' na e e'fa hafo' nene, a' e nanu di nafah om mi med nene."
9
Simon Petrus Aramateng ubang ho, "Honin so he'e Tuhan, ha' aiy ne'fa solo e, sobo natang med nelafung pir di!"
10
Yesus ara mateng bite, "Name ba so foiy am ho, sa mang se'fa fe hafo' sobo bolang oham. ari ho bolang am, sobo i e so barpi bolang daiy.
11
Asel Yesus ahol anoso ma' om asahain, horo eiy fe Sa ubang ho, "I e so barpi belang nene."
12
Horo, Yesus so sakola aibar nun ho mang e'fa hafo' no', Sa foiy so kod mate ho mang, sabor seleme mi mih, Sa supi ara mateng, "Naba fe Na panen ho'o i o lel ahol em ha'ai?
13
I bite nariho Guru med Tuhan. Ho abul bite Nari ho Guru med Tuhan.
14
Mang fede', Nari horo fe Tuhan med i Guru, e' fa hafoam so, iri di musti iri tulang ie'fa hafo'.
15
Asel, na o utub med ien am, honie iri di akala orupa Na akala iraham honi.
16
na nom abul-abul puin ira hu'tang, name baleta o name e mi mate so tuang emota nene, eme tangfal o name, e mi mate name ba name ahow tangfal ho emota nene.
17
Mangfede' na nun ho'o i barpi aholam, i panen honi he'e hal tafoiy irita.
18
Iraham so barpi Na e u hu'tang nene. Na ahol ano ma-mang fe na ale' tara' am, sobo Sura' bolang o pa' ho'o uil ano' an fe, 'Name ba No roti ade ho se'uda atel ma naraham.'
19
Naho e ara daiy fed na ara mateng, honie ho araham naho ara am he'e, i o' atino' bit bite Nari ho'oro Sari.
20
Abul-abul, Na u aramateng, anoso name ba Na ahow tangfal ho med ano' seiy, he'e sa Nano' seiy; med name ba Nari med ano' seiy, he'e nameba na ahow tangfal ho sa med ano' seiy."
YESUS AIY BA ARI FAIY FE HO U MARING
21
Yesus mang mateng honi no', Roh O tanut omi hu'tang, "Abul-abul na u ira hu'tang, namenu ara ira sa musti Nari faiy."
22
Sakola aiybar sedun araip-aramid horo supi om upir fa anofe Sa u hu'tang eh so ho araham.
23
Sakola aiy nu Yesus adel uab mih. Sari horo Sakola aiy nu ba Yesus sona ukarang bi'.
24
Horo he'e, Simon Petrus farufing nu akala araham hunie sa Yesus atan anofe sa bit eh so.
25
Horo sakola aiy ba yesus adel uab mieh ho Yesus atan, "Tuhan, sari aiy ho ano so?"
26
yesus Mateng abor ubang ho, "Sari aiy ho, aiy ba Na roti habuden ho'o bal no' med en." Horo, samang roti habuden ho bal no, Yesus med Yudas ba, Simon Iskariot o aiy ho en.
27
Yudas mang roti habuden ho med no' , Setang om lemid. Horo fe, Yesus ara hu'tang, "Naba fe amau panen so honin he'e, hanoang panen!"
28
Supi ba sara mih na'ade eh ho Namenu di e pahang nene, mitaro'ni eiy fe Yesus nahoni bit Yudas araham.
29
supi pirnu alo otanut he'e, Yudas so ma' seng pati' puin horo fe Yesus aramateng bite "Na an-an o pi perlo eiy ho fel hair mate ere'eng," eme ahow naden med name sah lahal en.
30
Fe, mang roti habuden med horo he'e, so horomi Yudas luling lehel sam; sel ho araham ho dil di paka am.
YESUS SO MIN U HU'TANG
31
Yudas mang lame he'e, Yesus ubang ho, "Fed ho' oro Nameno' Aiy ano' mate lafining osel med Yesus a'lai Lahtal Ano' mate lafining.
32
Mang fede' Om fe mi Lahtal Ano' mate lafining, he'e hanoang ano' mate lafining.
33
Noaiy bar nun, Na ira ham-ham eh, mi pane'le ta he'e. I ma' Nari lap, mangfede' Na u Yahudi hinung ara hu'tang am honi, fed na u iri di ira hu'tang, 'Na tarofe leam am he'e, i ho' ma sah.'
34
Na parenta habar nu ien, hunie i iri u karang, mang fede' Na iri u karang am honi, hunin e iri di iri u karang.
35
ano' honi e, name tofang ahol bite iri ho no sakola aiybar, fede' iri di iri u karang."
YESUS PETRUS ANO' NA UMA
36
Simon Petrus Yesus atan, "Tuhan, A ma' taro fe leam?"
Yesus o mateng abor, "Taro fe na leam, i fed na ta'ain sah, sobo minumi i ma' nata'ain am."
37
Petrus Atan, "Tuhan, mitaro'ni eiy fe fed ho'o mi na Ata'ain sah? Na no laman med a'eng alorang med Ere'eng!"
38
Yesus mateng abor, "A o laman med a'eng alorang med Nere'eng? Na nom abul-bul puin ara hu'tang, hiuw e u'le nene, mang fede' a' e nara kalufe mitow daiy."