1
Paskah o'hair mate talang dai hee,Yesus sam Betaniaba, Sa mi Lazarus a'no' fetang ho lam.
2
. Hemomi name dil paka o' na'de utaro'no' Marta baleta,sobo Lazarus supi o'u'ding loteho,Yesus a'ra ham ham meja ta mieh.
3
. Horo hee Maria sei manem o'fali mate butiling nu med Yesus e'fa ta u'huin no'sa selafung ari'nemang puin luh a'no'la' irang. Mang horo bang om ho manem mipir.
4
. Sobo Yudas Iskariot,O'sakola aiba den daita Ari failho ubang ;
5
. naba eife sei manem ho fail rib rat tow med honie,o' sengho med name sah lahal e'dalam nene?
6
. Sa ubang honiho,haai sa name sah lahal ukarang nene. Sa ubang honi fede' sariho seng o'pati'ai puin, honie seng med pati'ho miam hee sa med no'.
7
. Horo Yesus ubangho ; Ai ob hoe'hap nene. Sa naho panen sano'taro' alap med Napot ei e're eng.
8
. Fede' name sah lahalho ara ira sei masing,sobo Nari hoo,e' ira sei masing nene.
IMAM O' KAPAL NUN OM LAZARUS A'MINE UMA.
9
Yahudi lubung mate ma'eh hee,Yesus a'ra Betania mieh,horo supi sam hemo leam,supi e'Yesus solo usam nene sobo,supi sam ho Lazarusba Yesus a'no' fetangam hodi e'dun usam.
10
. No' imam hinung o' kapal nun supi gahain honie,Lazarus hodi a'minefe.
11
. Fede' Lazarus ei a'raham horoba,Yahudi tofang supi el teeng,supi fa Yesusfe o'a'tino' bit.
YESUS SAM YERUSALEM MIHO,MANG FEDE AFEN HONI.
12
Midilel name tofangba hair mate leho'ho me'eh hee,Yesus ho' Yerusalem leho'eh,
13
. horo supi ti beh med,supi sam o'se mitoh a'danang, Yesus mang ho'horo hee,supi a'ra bad a'ra herang,supi lofe id ubangho ; Aiba Lahtal ani puin ho'maho,tofang luung Arita,sari horo Israel o'afen.
14
. Keledei bownu supi medam horo hee,Yesus mid tamih,mang fede'hul olmeng ba ubangho ;
15
. Yerusalem o'nameno' ernu,haai baroc e! E'dun,Iafen sa keledei bownu tamih ho'eh ma eh.
16
. Mi aainang hee,o'sakola aibar sari na hoo o'lel barpi a'hol nene sobo,Yesus name mang a'foh a'tel hee supi a'hol,na ernu hoo,barpi a'ra hul ol meng,no' hee barpi supi panen med e're eng am.
YESUS EI A'RAHAM HO,NAME TOFANG UMATENG.
17
Horofe,name tofangba sel homi Yesus sa Lazarus o'lofe lafo om mihel sa a'no'fetang hee supidi a'raho, supi Yesus o'panenho umateng med name tofang en ma eh.
18
. Horo name tofang apano'fa Yesus a'raham fede' supi ma eh hee,Sariso na utahoirho panen.
19
. Horo Farisi hinung sara mateng a'ra ip a'ra mid ubangho ; Idai e'dun, nabafe pi ugahainho, e'mimeng nene. E'dun,pali'mate barpi a'taain oham.
YESUS MIN MED FETANGHO SA UMATENG.
20
Selho a'raham,Yunani hinungdi,a'ra supi a'nai homi,supidi sam hair mateho o'aome leam.
21
. Supi sam Filipus a'hol,sari ai hoo,Betsaida ba mong Galilea pali'miho o' name,supi a'ra mateng ; Tuang,niom sam Yesus a'hol uma.
22
. Filipus sam Andreas a'ra mateng horo hee,Andreas med Filipus sam Yesus a'ra mateng.
23
. Yesus supi a'ra mateng,Nameno'ai a'foh a'tel o'sel miam.
24
. Na ira mateng, mang fede' ala a'failnu e'muj faai om lehel min nene,honi hee so a'fail nu'le eh,sobo mang fede ala a'failho min honi hee,sa a'fail beng med uta tofang o'sah.
25
. Nameba so aeng e'sah ho o'aeng suhuin,sobo nameba pali'mate hoota so aeng e'sah nene honi hee,sa so aeng ugariang med fetang so em e're eng.
26
. Mang fede namenu nari ubaleta honi hee,sa uil Nata'ain,Na a'ra taromi honi hee,Noname baleta hodi ara homi,mang fede'namenu Nari ubaleta,sari aiho Nimang uada a'hol.
YESUS SO MIN UMATENG.
27
Fed hoo,No laman o'tanut sari buir. Nabafe maa Na ubang? Nimang,fed hoomi A Nano' il honi eme? Sobo sari horo ei a'rahamba,Na ho'.
28
. Nimang, Aniho a'no' mate a'no' lafining. Horo hee name a'mang pa'Sorga mihel ubangho, Na naniho a'no' mate a'no' lafining am,Na foil a'no' mate a'no' lafining ta.
29
. Name tofang homi tufeh ho ma eh,supi ubangho, aribso da'ud,sobo beng ubangho, malaikat nuso a'ra matengam.
30
. Yesus ubangho, name a'mang pa'ba i ma eh hoo,e'Nere eng nene sobo,irife iere eng.
31
. Fed hooro,pali'mate o'a'bul o'a'hal lap,fed hooro pali'mate o'aneng o'afen a'tetel aralil.
32
. Mang fede'pali'mate hoota Nano' lafining honi hee,nameno'Na barpi a'biing Nolapma.
33
. Yesus mateng hoo bitho,Sa minho mang fede'naba honi o'utub.
34
Name tofang a'ra mateng,Taurat sura'mi ni maeh am sariho, Kristus a'ra em so em, taro'nife A ubang Nameno'aiho a'no' lafining? Nameno' aiho anoso?
35
Yesus supi ara mateng, Lelho ara ira e'lufang nene am.Lel sodai ara eho, ilel om homi lame honie, paka haai iri med ano'sei e', fede'nameba paka lol lameho,sa tarofe lol sa e'a'hol nene.
36
. Lelho imed iei a'no'am hee, lelho o'a'tino'bit honie,ino'lel ai bar. Sa mateng honi no'Yesus sam supi el tafuning.
YAHUDI HINUNG OINU E'YESUS O'A'TINO'BIT NENE.
37
Masiki Yesus na utahoir tofang supi a'pong a'dang homi panen am sobo,supi e'Yesus o'a'tino' bit nene.
38
. sobo honie,sa nabi Yesaya o'mateng pa' ano' an; sariho ubang ; Tuhan,ni mateng lame pali'mate mipir hoo,maa ano ualepang? Med Lahtal,atangho anofe e'tub am?
39
. Horoba supi e'o'a'tino'bit nene fede' Yesaya ubangho ;
40
. Sa supi e'fail a'no'sah am,med supi om sa a'no'adobe am,honie supi haai se'fail puin dun na'hol nene,med supi omupir,no'supi sabor honie Na supi a'no' birang.
41
. Yesaya na hoo barpi ubang fede'Yesus o'mate o'lafining sa a'hol,med Ei a'raham horo sa ubang.
42
. Naba honi sobo,bu ang aneng tofang Yesus o'a'tino'bit,sobo supi Farisi hinung el baroc horofe,supi e'bit a'lel nene,fede' supi barocho,maa mong aome bangmi honi hee,name supi e'bit a'no' sah sah.
43
. Fede'supi nameno' ei no'ham horo supi i'nung med,sobo Lahtal eiho,supi saain.
NAMENO'O'ABUL O'AHAL LAP YESUS UMATENG.
44
No' Yesus lofe ubangho ; Nameba No a'tino'bitho,supi e'No a'tino' bit nene sobo,Aiba Nahow ho' horofe supi o'a'tino' bit.
45
. Med nameba dun Naholho,Aiba Nahow ho'horofe supi dun a'hol.
46
. Na ho'am hoo,Na lel fitho'pali'mate hoo ta, honie ano No a'tino' bit,honi hee,sa e' paka om mi nene.
47
. Mang fede'namenu sa No matengpa' alepang sobo,sa a'lol a'taain nene,Na e' o'a'bul a'hal lap nene fede',Na ho' hoo,Na e' pali'mate hoo o'a'bul o'ahal lap nene sobo,Na ho'hoo,pali'mate a'no' il a'no' luling.
48
. Anoso Nari bahut no'hee No matengpa' e'med nene honi hee,mong zamang o'a'mujmi hee,fompa' Na ubang eh horofe,o'a'bul o'a'halho lap e'dun.
49
. Fede' Na e'nom a'lol mateng nene sobo,Nimangba Nahow ho'horo parenta Nen Nahow nabafe ubang,honi hee Na horo ubang.
50
. Med,O'parentaho fetang so em,Na a'hol. honife,nabafe Na ubang eh hoo,Na umateng mang fede'Nimang u Nara mateng eh honi.