MELKISEDEK HO, IMAM ¹ Fede, Melkisedek ho, Salem o' afen, med Lahtal o' imam so mi lafining, Abraham afen ernu a' mine sabor ho' honi hee, Melkisedek ho' a' hol, satang ta a' habu no' ham med en. ² Na ernu ba Abraham utot med nun ho, Sa a'pite' habuden med Melkisedek en. Aai nanang, a' niba Melkisedek ho, o' lel honi hee a' bul ernu o' afen, o' a'taain hee Salem o' afen, o' lel honi hee, tining talaj o' afen. ³ Sariho o' fo o' mang a' ai, bap taro femi safain sahel ho' Sari ho mimeng hodi a' hol nene, ei fetang ho aainang homi sam o' a' mujmi hodi a' ai. Honi sobo mang fede' Lahtal Ai honi, sel numi Sa sano' imam em sam so em ho a' meng. ⁴ E'dun, ai hoo so a' tino', pi bap Abraham horodi, Sa mali om mi na ernu utot med ho, Sa habuden kaai med en. ⁵ Taurat o' hukung a' taain honi hee, Lewi ai bar ho, pangka imam ho med honie, supi so di ail bar ei karesang baleta o' hir o' pa' ho, habuden kaai ta' unung masiki supi ho, e' Abraham o' diing o' bap nene. ⁶ Sobo, Melkisedek hoo e' Abraham o' diing o' bap nene sobo, Sa Abraham a' bung na habuden kaai med, no' honi hee Aiba Lahtal O' paha' puin ho Sa no' ham med a' rita. ⁷ Fede, ukalufe sah, o' mi lamang honi hee, o' mi lafining no' ham en. ⁸ Baang nu hee, na ernu o' habuden kaai ho, name doc ba min no' horo med. Sobo na hoo om mi hee, aiba fetang med ei name horofe na habuden kaai hoo med. ⁹ Honife, umateng no' sari ho, Lewi hinung ba na ernu o' habuden kaai med o' name, honi sobo supidi sei na ernu o' habuden kaai ho mana Abrahan a' lai, ¹⁰ fede,' Melkisedek ho' a' hol honi hee, Lewi hinung dai o' bap bale a' fah a' hir om mi eh. ¹¹ Fed hoo, mang fede' Lewi ei udume horo lol fe no' ham ho med no'( sari horo femi Israel hinung Taurat o' hukung med), honi so hee, naba ei a' raham sofe, Melkisedek ei parenta a' taain honi hee, imam beng horofe a' no' fetang no' sobo, imam ba Harun ei fol heb ho sah? ¹² Mang fede' meng taro'ba udume ei ho tiling am so honi hee, Taurat ei hukung hodi tiling. ¹³ Nameba pi umateng eh hoo lelang beng, sobo Ei lelang ho, name pirnudi e' Lahtal O' dor bu' ang nene. ¹⁴ Fede' lel am, sariho pi Tuhan hoo, Yehuda o' lelang femi ho', no' lelang hoo ei a' raham horoba, Musa imam hinung ei a' raham ho foil nanu bit di a' ai ho. YESUS HORO IMAM MANG FEDE' MELKISEDEK HONI ¹⁵ Mang fede' pi dunfe Imam bengnuso a' ra latel mang fede Melkisedek honi, ho hee, ne ernu ho lel madal mang ta eh, ¹⁶ o'ba sano' imam feho, e' safain sahel bo' mate lol horo sano' pilang nene sobo, tutung kufa' ba min a' hol nene horofe sano' pilang. ¹⁷ Fede, Sura' Bolang Sari Aiho umateng: "Melkisedek ei meng ei taro' a' taain, Ari horofe imam em sam so em ho a' meng." ¹⁸ Foil baang nu, taro' alap emho,sam a' mij am, fede' kurang bo' no' ham a' ra om mi nene, ¹⁹ fede' sari hukung ho, nanudi a' no' no' ham nene. Sobo, foil beng numi hee, udume somino' nu a' ra, sari udumeho tara fa Lahtal o' lap fa A' bung A' lolang. ²⁰ Fede' sari udume hoo bel basa nu a' ra fit tolap ma -- imam bengnu so foil sano' imam sobo, o' bel basa a' ai. ²¹ Sobo, Sa sano' imam, bel basa Sariso panen, Sa ubangho, "Tuhan Sa bel basa am, med Sa e' So tanut tiling nene: " Ari horofe Imam sam so em ho a' meng." ²² Sari bel basa horo ei soba, Yesus sano' paha' so mino' ho o' tu ei. ²³ Dai ehta, imam tofang a' ra, honie sa imam den min hee, den a' ri tiling no'. ²⁴ Sobo, Yesus udume ho a' puin dume so em nene, fede' Sa fetang sei msing sam so em ho a' meng. ²⁵ Honie sa supiba Yesus lol ma Lahtal o' lap maho, Yesus il luling no' med supi en, fede' Sa fetang sei masing, honie a' ome supi a' ra ham. ²⁶ Imam Mate o' honi horofe tom uma empir, sariho Imam Mate bolang manep, na kome abir nene, name doc e' let, med a' no' lafining mid sorga o' fang tofang a' lai. ²⁷ Yesus e' mang fede' imam mate beng honi nene. Supiho sel a' ri an na ernu fit ho puin doc hafo', o' aainang supi ei doc, no honi hee jumaat o' doc. Sobo, Yesus e' sari naho panen nene. Sa doc uhafo' minu sam em a' meg, sariho Safah Sahir femi. ²⁸ Musa ei hukungmi ubang ho, name kurang bo' horofe a' no' imam mate. Honi sobo Musa ei hukung no' honi hee, Lahtal Ei bel basa ho' O' Ai Sa utub honie, sa O' Ai a' no' an sam so em ho a'meng