IBRANI O' SURA' ASEL ERNU FALING TOW
1
Esah ukarang gariang med di' ai'bar ara so sam am.
2
Som ma ma'eh honi e atang med name hota fede' naho panen ho name pirden den malaikat ah sobo sipi e' ahol nene.
3
Name mong hukung bang mi di u'ma fe mang fede' i'ri di name ho ara ham-ham mong hukung bang mi honi, honin sobo name ba name ano' sah-sah hodi i'uma fede' i'ri di ba i'bo' ba ham ho.
4
A'da' hol hormat afeng-afeng med sari med sari puin afoh atel name barpi araham, inang alo i'de' ho u'bu'ang honi e sa sobolang eh, fede' name no' ba om abul nene name-name asahain Lahtal hukung en o fetang om mi.
5
Seng esah ho med elet elihing, med naba so ara abung horo ei o'sel Sari so ubang:
"Na e' i'ad nene,
med e' i'tain nene."
6
Honin fe pinaba fe ubang di pi u'dume omi sanari bu'ang:
"Na e' baroic nene, fede' Tuhan horo no'u'dume.
Naba fe name panen na'raham?"
7
Name o ba i' lafung ho uma, sipi honin horo i'ri sakolah Firman Tuhan mateng bolang alai med i'en sipi alol dun panen o'aten o'lame o'toh mi o'fetang om mi ho alol dun o'bung o'pir honin e sipi o'u'dume sano' mang fede' u'tub udam med tahou ahol.
8
Yesus Kristus so honin eh, ufami fede' sam so em.
9
I' a'ai se sah lol e' fom sah afang-afang ba i' e' hol eh nene; fede' naho no' so nom ho otutung o kufa' fe puin, a'ai panen den nene na' ade ei araham nene name id ba e no' neneam ba sipi ba naho ano' lame e ho.
10
Piri ho altar o bang bolang ara name ba ari mi baleta e ho dup harah bolang mi ho ano' sey ade e.
11
Fede' binanta e nu oba' ho ofoiy imam mate Fit mong Maha Kudus obang om mi,
12
Yesus di susa mala ahol gerbang o nai ho mi kota abung O'fui her med Soname no' ho araham.
13
Honin fe, mae pi perkemahan luling mi Yesus O'lap sam, med A'ra ham-ham osah o karang ho tefang med osah o karang ba Sa sona tefang honin.
14
Fede', pali' mate ho ta ho piri pi bang mate lelang lai a'ai sobo uil-uil ara em sam so em, sobo pi' bang mate lelang lai ho adanang omi kota ba ho' e ho.
15
Honin fe, mae pi Kristus fe lol ata'ain sa sam dal orang med Lahtal araham, taming tapo so A'ni' no' mate A'ni' U'tarain.
16
I' a'ai nano' panen u sibung e, naba so ara i bung honi he dalam, fede' honin horo Lahtal om tamuj.
17
I' lafung ho alol ema eh li' sipi ata'ain fede' sipi horo i'laman buang sipi i'laman ho tanggo e. Honin fe, sipi na'ernun ho panen bad herang om mi om sa malo nene fede' naho esah lalapun nene omta a'ai.
A'OME BANG
18
Niri u' a'ome fede' ni' a'hol honi e tanut no' ham, ono' horo, karesang baleta araham panen ano' ham horo puin.
19
Na foil i'ramateng a'ome ano' kufa' honin e Na hano'ang Na'bor i'bung.
20
Lahtal il'luling oasel, Sa Yesus Kristus ano' fetang am, pi Tuhan, pi bu'ang o' tino' nub aibar A'raham, fui bolang med em so em
21
med a'ri u'taro' ernu turlo ho om mi, honin e, ono' fe panen om mi femi. Honin fe, Sa tari u'baleta Om ano' senang Kristus Yesus alai, fede' Sari horo mi em sam so em Amin.
O' AMUJ MI
22
O' nodi a'il bar, na i'do'do' honin e fom mateng ono' ho' i'ma'eh bala a'mone puin no i'fom om homi fede' na sura' hul i'en ho pite' le.
23
Na foil i'ra hu'tang ho pidi a'il, Timotius, sapiri mi holong am. Honin e sa ho' nolap ho' am fe, ninang alo sam i'o lap sam.
24
No' il' luling med i'bu'ang ernu ara mateng med name om abul. Med pidi a'il bar ba mong Italia mi ho il' luling med sipi ara mateng.
25
Lahtal O' il O' luling ho' pi barpi taraham.