1
Sel o mitur mi mang no', Lahtal ulang kor nabi nun alaiy pi bap bale ara hu'tang,
2
Ma sel o amuj mi ho'o, Lahtal so'aiy ba sa tara' hunie na afang rat nun ho u alang ano' Seiy fe ho, Sa lol hu'tang ma taraham, ba ma Saridi lol, Lahtal pali' mate ho'o aten.
3
Sari ho he'e, Lahtal o lel bolang med O la-la man abulta mong O panen aten ho mi, Sari horo fe So mateng pa' o malang puin afang rat ho tu'eiy. Sa mang doc ahal ho ano' bolang no', Sa eleme lafining mi, Mate Lafining atang tani alol mih,
4
hunie Sa sano' mi lafining fa malaikat nun emota, asel Sa ani u alang med ho mi lafining supi eiy ani mi emota.
5
Asel, Lahtal ma' malaikat ara hu'tang am em ha'aiy,
"Ari ho he'e No Aiy.
sel fed ho'o, Na nano' Imang am"?
Mazmur 2;7 (Mazmur o sura' asel alo o bang ka'aiy itito)
Eme, ma' Sa supi ara hu'tang am em ha'aiy,
"Na nano' Omang fa araham,
med Sa sano' No aiy."? 2 Samuel 7:14 (Alo Samuel o sura' asel itito, o bang ka'aiy ernu faling ut)
6
Honi sobo, ho araham Lahtal so aiy matu ho med pali' mate ahow ahol, Sa ubang ho,
"So hunie Lahtal o malaikat barpi E'fa fan." Ulangan 32:43 (Ulangan o sura' asel er tow faling alo, o bang ka'aiy er ut faling tow)
7
Fa malaikat nun eiy araham ho Lahtal ubang bite,
"Sa malaikat nun ho ano' hamoiy,
o u baleta Eiy nun ho ano' afaiy." Mazmur 104:4 (Mazmur o sura' asel rat nu ut, o bang ka'aiy ut)
8
Huni sobo fa O Aiy eiy araham, Sa ubang ho,
"Eleme-ho, o Lahtal, ara em so em.
Dopang o abul he'e Eleme E lafeng o dopang.
9
Na o no' A u apano' med na o sah Apang u sah.
Horo eiy fe, Lahtal, ba O Lahtal ho, iping bad herang mi lafoh ano' hal tafoiy med ari ta fa O tenang el bar eiy mi emota." Mazmur 45:6-7 (Mazmur o sura' asel er ut faling ifihing, o bang ka'aiy talang sam itito mi meng)
10
No' he'e,
"Ari, Tuhan, O a'ai nang mi A pali' mate o pilang meng am,
med burang ho he'e A tang pa'.
11
Pali' mate med burang ma' suhuin, sobo ari ho ma' so ara eh.
Pali' mate med burang ma' ta ma'ain fen huni.
12
Orupa kod laiy honi A ma' pali',
med o rupa fen honi, supi ma' tiling.
Honi sobo, Ari ma' e Ari tiling nene,
med O tun nun ho e hi' alorang eh nene." Mazmur 102:25-27 (Mazmur o sura' asel rat nu alo, o bang ka'aiy eralo faling ifihing sam er alo faling itito mi meng)
13
Med, fa malaikat taro ro araham, Lahtal ubang ho' oni am,
"Natang tani alol ho' o mi mih
sam na so no falefang nun med O malang efar meng"? Mazmur 110:1 (Mazmur o sura' asel rat nu nu, o bang ka'aiy nu)
14
Ahal bite Malaikat ho he'e roh nun so u baleta, ba u ahow honie name ba ma' il luling, fetang so em med fe ho tulang eiy?