RASUL HINUNG O SURA' ASEL AAINANG
1
Teofilus, sura'ba dai ehta Nahul o'omho miho, na ernuba Yesus panen a'ten utub udam,
2
sam name a'tel mid o'selhomi, Roh bolang a'lai Sa uparenta med rasul hinungba, Sa sona tara' medho e'nam.
3
Sa maar mahip a'lai sam o'a'mujmi, Safah sahir sa med supi e'tub ubang Sa sofetangam. Sa fetangho, o'ta'hol ta maeh tofang a'lai, Safah sahir sa med supi e'tub tareng erut om mi, Lahtal o'parenta bang hodi sa umateng.
4
Supi dai sara tohuil lame eh homi, Sa supi parenta honie, supihaai Yerusalem ad a'tain nene sobo, Omang o'paha' a'danang ubangho; "i Nei alepang,
5
fede' Yohanis sei puin name a'foil sobo fed hoomi fa, e'lufang nene honi hee, name Roh Bolang puin ifoilam."
YESUS LIL SORGA LEAM
6
Horofe, supi sara ta'u'nung a'rahan hee, supi A'tan; "Tuhan, a bang pali' a'no' tining med Israel e're'engho o'selba hooroso?"
7
Sa supi a'ra mateng, "Sel hairba Nimang sokufa' mi ubang a'tining am ho, i e'a'hol ei nene.
8
Honi sobo, Roh Bolang hel irita honi hee, i o'kufa' med, i ta'hol ta ma'eh, i Nari umateng ulurung, mong Yerusalem mi, Yudea med Samaria pali' mipir, sam pali'mate o'alomang o'tapor mimeng."
9
Sa na ernu umateng no' supi e'dun eh hee, sa latel mid, tafiing mate A'ri baloil a'ra sam supi e'fail mi suhuin.
10
No'supi Ai samho e'dun burang tamid eh hee, name lote piralo fen afel puin supi a'bung homi tufeh,
11
name aloho supi a'ra mateng, "Hoi, Galilea hinug, i naba eife, toh burang udun mid eh? Yesusba inai homi latel Sorga lemid am hoo, Sa foil sabor ho'di, o'rupa mang fede' Sa Sorga leamba, i toh e'dun eh honi."
RASUL HABARNU MED
12
No' horo hee, supi tong Zaitun doyba Yerusalem abung homi sabor Yerusalem leho' o'let kilonu.
13
Supi ho' bang mi, supi mid seleme mimih mitar eiba tong lafining ho lemid. Supiho;
Petrus,
med Yohanis,
med Yakobus,
med Andreas,
Filipus,
med Tomas,
Bertolemeus,
med Matius,
Yakobusba Alfeus
o'aiho, med Simonba
Zelot o'nameho,
med Yudasba Yakobus
o'ai ho.
14
Supi barpi somnu supi a'ome, ob bardi supi ara, sariho, Yesus o'fo Maria, med O'diailbar beng foilta.
15
Sel a'ri'an Petrus sa diailbarba udumenu o'a'nai homi toh (name o'tofang pir ratnu eralo), sa ubangho,
16
"No diailbar, Sura' Bolang om ano'an feho, dai ehta hee, Yudas ei a'rahamho, Roh bolang umaten Daud a'lai ubangho; sari horofe, nameba Yesus a'puinho o' se'bur puin.
17
Fede' sari hodi tara taan, no' hee saridi karesang baleta hoo panen.
18
Fede' ai hoo sa nasah panen, o'faliho sa puin faai bo'nu fel, horo hee e'lafung sotur muj, o'bo' mateho kalung, a'to'om miho barpi hufa'her oh.
19
Na hoo, name mong Yerusalem miho barpi a'hol oh horofe, sari faai bo'nu hoo, supi o'mateng honi hee, ubang, Hakal Dama, sobo o'lel honi hee, 'Faai Fui uher'.
20
Fede', Mazmur (Dal orang Sura') mihul ubangho:
'Sei honie sa o'mih o'tar elemeho tining rameng, name nudi e'a'ra homi nene,
med,
'Sei honi sa o'karesang o'baleta ho name beng foil med.'
21
Honife, supiba a'ra tara sei masing, Tuhan Yesus o'karesang mid hel om homi,
22
aainang Yohanis name a'foil homi, sam name piham homi name a'tel mid sam homi mengho, pi nu med honie, satara Yesus sofetang honame ta'hol ta maeh."
23
No' hee, supi name piralo ani med, sariho; Yusup name ubang Barsabas, den ubang Yustus, med pirnuho Matias.
24
No' supi aome ubangho; Tuhan, Ariso nameno' om ah barpi a'hol.
Name piralo hoo taro horo A u i'nung hee, Anietub'
25
honie, sa rasul o'karesangba Yudas a'lahain panen e sam seleme leamam hoo sa foil panen."
26
No' rasul hinung supi name piralo hoo u a'lol honi hee, Matias fe tamuj, horo Matis supi eita a'no' pir ernu falingalo.