PAULUS SURA' TAHOW KORINTUS HINUNG EN
O' MI ALO MI, ASEL MATE O' A'AI NANG
1
Paulus, Kristus Yeseus O' rasul, med Timotius pi di ail Lahtal u i'nung, med Lahtal O' jumaat ba a' ra Korintus mi, med name om bolang ernu a' ra Akhaya pali' mi sobarpi en.
2
Pimang Lahtal med Tuhan Yesus Kristus O' no' O' ham, O' loil O' asal, O' bad O' herang med O' tofang lu ung a' ra iri ta.
LAHTAL O' LOIL ASAL HO,
O' MAHEN BIT A' RAHAM
3
Pimang Lahtal med pi Yesus Kristus, Omang Om tesah afeng, med Lahtal loil asal bad herang o' asel,
4
ni a' ra maar mahip tofang om mi, Sa loil asal bad herang nien, horo ni foil puin supi ba maar mahip tofang om miho ano' loil asal bad herang, fede' Lahtal nino' bad herang am.
5
Mang fede' Kristus O' maar mahip a' ra niri mi a' lihing her honi hee, niei bad herang hodi Kristus fe lol a' lihing her.
6
Mang fede' ni maar mahip a' hol honi hee, sari ho'o, iei bad herang med iei il luling e' re eng. Eme, meng fede' ni loil asal honi hee, sari na hoo iei bad herang horo karesang iom a' no' dume, puin maar mahip ba iridi a' hol med niridi a' hol ho u tahang.
7
Ni udume fa iri miho dume, fede' ni a' hol ho, iridi nira maar mahip ho tefang horo ba, o' loil o' asal, o' bad o' herang niridi med.
8
Di ail bar, maar mahip ba ni mong Asia mi a' hol ho, i ha' ai nira a' hol e'.
Ni tarofe ernu tefang ni kufa' ho a'lihing horofe, ni min fe u i' nung, sobo fetang ho nipang sah.
9
O' mitata, hukung min med ho, a' ra niafah mi,honie ni haai ni bo' mate o' a' tino' bit nene sobo Lahtal ba name min a' no' fetang horo ni O' a' tino' bit.
10
Min tabang tafah u aloil ho, Sa o' om homi niri med niad nitain am, Sa foil niad nitain. Sari horo ni ududme, Sari horo foil il luling med nien.
11
Iri di niri ukarang, sariho i a'ome om mi honie, tofang niani puin mahen bit, fede' ukarang ni med ho, name tofang o' a'ome fe lol.
PAULUS SO TANUT TILING
12
Ho o'ro niei nipa no' sariho niom kakaai homi ubangho, ni pali' mate hoo ta fetang eh hoo,o' mita med ira ham ho, Lahtal Ei om a'bul med Ei om bolang horo puin, e' pali' mate ei na' hol dil ma eh ei nene, honi sobo Lahtal Ei no' ham femi.
13
Fede, ni e' nabeng hul ien nene, sobo i ta an no' med i a' hol horo. E' beng nene. Na udume ho,i o' lel a' hol sobarpi,
14
sariho, niei nira ham ho, i habuden a' hol am sari ho, niri hoo sano' i ta rain pa', mang fede' iri hodi sano' niei tarain pa' med Tuhan Yesus O' sel O' hair homi.
15
Udume om hoo mi, nei nom ho, na notur ho' ieleme homi honie, i Lahtal O' tofang lu ung ho med o' mi alomi.
16
Na sam Makedonia leam hoo, nom sam iedun uma, honie na sam Makedonia mi no' honi hee
na foil nabor ho' ibung honie, na Yudea leho' ho i neita namot mi no'.
17
Honife, maa nabafe na utanut eh hoo, na u nom a' tan? Eme, maa nabafe na utanut eh hoo, pali' mate ei tanut fe lol horofe nei ho a' ra sara ham ham "ya, hee ya, med a' ai hee a' ai"?
18
Mang fede' Lahtal ho ma eh alepang o' asel, honi hee, ni ira mateng ho e' "ya" med e' "a ai" nene.
19
Fede, Lahtal O' Ai, Yesus Kristus ba, ni inai homi umateng eh ho, sari ho nari, Silas med Timotius horo femi "ya" md "a ai' nene sobo, Sari horo femi "ya".
20
Fede, Lahtal O' paha' barpi Kristus om femi "ya".
Horo ei soba, Sari fe a' lai ni a' tino' bit med Lahtal O' mate o' lafining a' ra ham.
21
Med, Lahtal niri med iri ham ham tano' kufa' med Kristus om mi, Sa satang tari tabaring,
22
foil tari tel dafail, So Roh med tom mi a' no' udume mate.
23
Sobo na Lahtal o' lofe a' no' no laman ho ta a' hol, puin nari tahang fede' na foil ho' Korintus leho' bit sobo dai eh.
24
Haai ubang iei udume ho, ni uparenta honi sobo, niri hoo di ira ham ham karesang puin ino' bad herang fede' i udume om homi itoh dume.