¹ Torus, Bacakaplah Yesus samotan-motannyo ke orang tu "Ado babarapo orang nang togak disini, takkan mati dio, sampe orang tu manengok Kerajaan Allah datang dengan kuaso. (Yesus Basamo Musa dan Elia) ² Torus, onam hari besoknyo, Yesus mangajak Petrus, Jakobus dan Johanes untuk manyandiri ke gunung nan tinggi. torus DIO pun barubah muko di mukak orang tu. ³ Sasudah tu baju-NYO pun barubah manjadi corah dan nang putihan. Tak ado orang di dunia ni pun nang bisa mambikin putih macam tu. ⁴ Nah jadi, tibo-tibo muncullah Elia dengan Musa dan orangtu pun bacakap-cakap samo Yesus. ⁵ Torus tu, dibilang Petrus lah ke Yesus, "Rabi, camano agaknyo kalo kubuatkan tigo tenda untuk KAU sabiji, untuk Musa sabijik dan untuk Elia sabijik." ⁶ Lantaran si Petrus tak tau lagi ondak bakato apo, lantaran samuo orang tu sudah katakutan kali. ⁷ Tibo-tibo timbul lah awan mamayungi orang-orang sambil basuaro kek gini kato-NYO, "Ininlah Anak-KU nang KU sayangi tu, kalean dongar DIO elok-elok!" ⁸ Dongan sakojap mato, tak nampak orang tu lagi antah siapapun sakitar orang tu, cuman Yesus lah nang ado. ⁹ Pas Sambil turun gunung orang tu, di posankan Yesus lah samo orang tu supayo diam-diam sajo orang tu korno kajadian nang tadi tu, sampe hidup dulu Anak Manusia Tu dari kubur-NYO. ¹⁰ Bajanjilah orang tu untuk cakap tadi tu, sakalipun masih poning orang tu tontang pakaro hidup dari kamatian tu ¹¹ Ditanyo orang tu Yesus, "Kanapo dibilang orang ahli taurat tu kalok si Elia harus datang? ¹² Torus dijawab Yesus lah orang tu, " Sudah duluan pun si Elia datang, agar disombuhkannyo lah apo nang bisa di sombuhkan. Camano tontang nang ado tatulis tumangonoi maki-maki-makian dan siksaan tontang Anak Manusia tu? ¹³ Inilah yo, bak AKU kasih tau ka kalian, sudah tibo nyo sabotul nyo duluan si Elia, tapi di pabuat orang tu si Elia dengan sasuko hati orang tu, pas kayak nang ao tatulis." ¹⁴ Torus, pas Yesus, Petrus, Yakobus balek ka murid-murid, banyak orang mangarumuni orang tu, dan ahli taurat batokak samo orang tu. ¹⁵ Pas manengok Yesus, lanjar tasontaklah orang banyak itu dan balarian manyambut DIO. ¹⁶ Batanyolah Yesus ka orang tu, "Apo nang kamu tokak kan samo Ahli-ahli Taurat tu? ¹⁷ Saorang dari orang nang banyak tu pun manyahut-NYO, "Guru, ku bawak ka KAU anak bujang ku korno bisu dio dibikin ta'un. ¹⁸ Asal di masu'i ta'un tu, dibantingkannyo ka tanah sampe babusa muncung nyo dan gigi nyo mangguratak sampe manggalepor. ¹⁹ Dan di jawab Yesus lah "Hey katurunan nan tak bariman! barapo lamo lagi pulak AKU botah samo kamu, sinin lah, bawakan ka AKU budak tu!" ²⁰ Lalu dibawak orang tu lah budak tu ka YESUS, dan begitu ta'un tu manengok Yesus, di guncang-guncang nyo budak tu, budak tu pun ta jatuh baguling-guling di tanah, muncung nyo pun babuih. ²¹ Torus, ditanyo Yesus lah ka ayah budak tu, sojak bilo budak ni bagini? "Dari kociklah," saut ayah budak tu. ²² Dan sudah soring ta'un tu malutarkan dio ka api, ka dalam aer ondak mambunuh nyo. Tapi, kalo KAU bisa mangelokkannyo, tolong, bantulah kami baya ²³ Bacak lah Yesus ka ayah budak tu," Kolo Engkau bisa? samuonyo bisa kolo orang tu pacayo" ²⁴ Langsung managis ayah budak tu dan basoru, "Aku pacayo, tolong ala aku nang tak pacayo ni!". ²⁵ Pas di tengok Yesus sudah jobu, di bontak-NYO lah ta'un tu sambil bacakap, "Kau ta'un bisu dan pokak, Ku parentahkan kau kaluar dari budak ni dan jangan masuk balek!" ²⁶ Sahabis manjorit dan mangguncang-guncang budak tu, kaluarlah ta'un tu, budak tu jadi macam orang mati, sampe bacakan orang tu, "mati dio woi!" ²⁷ Tapi, di pegang Yesus lah tangan budak tu dan mambangkitkan nyo, budak tu pun bangkir sandiri. ²⁸ Pas Yesus masuk ka Rumah, ditanyo murid-murid- NYO lah DIO," Kami tak bisa mangusir nyo, kanapi nyo? ²⁹ Diajawab-NYO lah, "Jonis ni tak bisa kaluar salaen pakek do'a." ³⁰ Samo murid-murid-NYO, Yesus pun pogi dari sanan malewati Galilea, dan DIO tak ondak ado nang tau. ³¹ Lantaran DIO lagi mangajari Murid-murid-NYO. Bacakap lah DIO ka murid-murid-NYO tu," Anak manusio ondak di sorahkan ka tangan orang, torus, orang tu mambunuh-NYO, dan sasudah dibunuh, tigo hari lagi hidup balek lah DIO. ³² Tapi, tu pun tak paham apo cakap Yesus tu, dan sogan pulak murid-murid mananyokan. ³³ Torus, sampelah Yesus samo murid-murid-NYO di Kapernaun, sasampe di rumah, batanyolah Yesus ka murid-murid-NYO, "Apo nang kamu cakapkan pas di jalan tadi?" ³⁴ Tapi, orang tu tadiam, lantaran pas dijalan tadi orang tu batokak, antah siapo nang paling togap. ³⁵ Lalu Yesus pun duduk dan di panggil-NYO lah kaduo bolas murid-NYO. Dan DIO pun bacakap, "Kalo sasaorang ondak jadi nang utamo, dio harus ondak jadi nang parincit dan jadi babu buek samuonyo." ³⁶ Torus, diambek Yesus lah saorang budak kocik dan di togakkan nyo diantara orang tu. Dan sambil mamoluk budak tu, bacakaplah DIO, ³⁷ "Siapo sajo nang manarimo budak kocik macam bagini dalam namo-KU, dio pun manarimo AKU. Ondak siapo pun manarima AKU, padahal bukan manarimo AKU, AYAH KU lah nang manyuruh AKU. ³⁸ Bacakap lah Yohanes ka Yesus,"Guru, ado kami tengok orang mangusir ta'un mamakek namo-KAU, kami halangi lah, lantaran dio bukan pangikut kito." ³⁹ Tapi, dibilang Yesus lah,"tak usah larang, korno siapo sajo nang mambuek Mukjizat mamakek namo-KU, saat itu jugo tak bisa dio mangejek AKU ⁴⁰ Korno nang tak malawan kito, kawan kito tu, ⁴¹ Korno KU bilangkan ka kamu nang samotannyo," Siapo sajo nang mangasi kamu sagolas air mamakek namo-KU, bapahalo jugonyo bah ⁴² "Siapo sajo nang manyosatkan salah satu dari budak kocik nang pacayo ka AKU, eloklah lehernyo di gantung pakek batu togap, dicampakkan sajo ka laut. ⁴³ Kolok tangnanmu nang mambikin badoso, potong sajo, elok lah tak batangan katimbang batangan, tapi masuk narako nang tak padam-padam apinyo. ⁴⁴ Tompat ulat samo api nang tak mati-mati. ⁴⁵ Dan kalo kaki kau nang bikin doso, potong sajo, elo'an lah hidup bakaki pincang, katimbang bakaki tapi masuk narako. ⁴⁶ Tompat ulat samo api nang tak mati-mati. ⁴⁷ Kalo mato kau nang bikin badoso, eloklah ko cungkil. Elo'an lah bamato sabijik tapi masuk surgo, katimbang duo mato tapi di lutarkan ka narako. ⁴⁸ Tompat ulat samo api nang tak mati-mati. ⁴⁹ Lantaran, samuo orang ondak di garami pakek api. ⁵⁰ Eloknyo garam tu, tapi kalo ilang asinnyo, camano kamu mangasinkannyo balek? Kau garamilah diri kau dan badamelah samo nang laen.