¹ Sampailah orang tu disaborang dano, di wilayoh orang Gadara. ² Barusan Yesus kaluar dari sampan, tatibo kaluarlah orang gilo nang kamasukan roh najis dari tano pakuburan mandatangi Yesus. ³ Orang gilo tu tinggal disanan karono tak ada nang sanggup mangiktanyo,dirante pun tak biso. ⁴ karono udah soring dia dipasung dan dirante, tapi dirontapkannyo rante samo pasung tu. hinggo tak larat saorangpun manundukkannyo. ⁵ Siang, malam batariak dio ditanoh kuran samo di bukit-bukit, dipakeknyo batu malukai dirinyo sandiri. ⁶ Pas ditengoknyo Yesus dari jauh, balarilah dio tasungkur manyombah Yesus. ⁷ Lalu, sambil monjorit tacokak bacakaplah dio, apo urusan Kau samo aku, Yesus . Anak Allah Nang Mahatinggi? Sombahku samo Kau demi Allah,tolong jangan Kau siksa aku!" ⁸ Karono udah dibilang Yesus samo dio, "Kaluarlah dari orang ni ,hoi hantu najis!" ⁹ Lalu ditanyo Yesus samo orang tu, "Siapo namamu?" Namoku Legion, karono kami banyak." ¹⁰ Manyombah-nyombah dio mamohon samo Yesus bak tak diusir dio dari wilayah tu. ¹¹ Disanan ado sagarombolan babi nang lagi makan di dokst bukit. ¹² Torus manyombah-nyombah hantu najis tu mamohon samo Yesus katanyo, "Parintahkan lah kami bak masuk kami kadalam babi-babi tu samuo." ¹³ Yesus mangabulkannyo. Jadi pogilah hantu-hantu najis tu mamasuki babi-babi tu. Garombolan babi tu sakiro duo ribu ekor banyaknyo,balari katopi jurang masuk tanggolam gombung di tongah dano. ¹⁴ Lalu pogi hambuslah panjago babi-babi tu mancaritokannyo,ka kota samo deso. Jadi kaluarlah orang-orang tu manengok apo nang tarjadi. ¹⁵ Lantas datanglah orang- orang tu manjumpoi Yesus, ditengok orang tulah dio nang takono legion, sudah sombuh dan rapi bajunyo duduk elok dio. Hinggo katakutanlah orang tu. ¹⁶ Lantas, orang nang malihat sandiri kajadian tu, mancaritokan samo nang laennyo, macam mano duduk kajadiannyo samo orang nang takono hantu najis tu, jugo apo nang tarjadi samo babi-babi tu. ¹⁷ Karono kajadian tu, dimintak orangtu lah supayo Yesus maninggalkan tompat orang tu. ¹⁸ Pas waktu Yesus naek ka dalam sampan, mamohanlah orang nang karasukan ta'un tu, bak boleh mangikuti Dio. ¹⁹ Tak dibolehkan Yesus dio, tapi bacakaplah Dio samo orang tu: "Baleklah kau ka rumahmu samo kaluargamu, jugo orang kampungmu, caritokan kaulah apo nang sudah dikorjokan Tuhan samo kau, nang sayangnyo Tuhan samo kau." ²⁰ Lantas orang tu pun pogilah dimulokannyo mancaritokan apo sajo nang dikarojokan Yesus samo doi, sama orang Dekapolis. Sahinggo orang tu pun taheran-heran. ²¹ Sasudahnyo basampanlah Yesus manyaborang, orang banyak bakumpul datang mangalilingi dokat-Nyo. Dio ditopi dano. ²² Lantas datang saorang pamimpin rumah ibadat Yairus namonyo. Bak ditengoknyo Yesus, tasungkur dio dopan kaki Yesus. ²³ dimintaknyo sama Yesus: "Anak gadis ku sakit, udah ondak mati, tolong datanglah, tarokkan tangan-Mu samo dio, bak sehat dan totap hidup dio.'' ²⁴ Jadi pogilah Yesus basamo Yairus. Ado jugo babodong orang mangikut-Nyo. ²⁵ Adolah disitu anak daro nang sakit pandarahan , sudah dua bolas tahun lamonyo . ²⁶ Udah barulang dio diubati tabib, sahinggo dihabiskannyo hartanyo, tapi tak ado tando parubahannyo lanjar batambah buruk kaadaannyo. ²⁷ Sasudah didongarnyo kabar tontang Yesus, Jadi didokatinyo lah Yesus ditongah-tongah orang banyak, dari balakang dipogangnyolah jubah-Nyo. ²⁸ Karono katanyo: "Asal kupogang sajo jubah-Nyo,pasti aku sombuh." ²⁹ Sakojap tu jugo barontilah pandarahannyo dan dirasakannyo, kalo badannyo sudah sombuh dari panyakitnyo. ³⁰ Langsung jugo tau Yesus, nang ado tanago kaluar dari badan-Nyo, mambalik badan Dio ditongah orang tu, kata-Nyo: "Siapo nang mamogang jabah-Ku?" ³¹ Murid-murid-Nyo manjawab: "Kau tengoklah macam mano orang ni badosak-dosak dokat-Mu, batanyak kau: "Siapo nang mamogang Aku?" ³² Torus dipandangi-Nyo lah ka sakaliling, manengok siapa nang malakukannyo. ³³ Anak daro tu, manjadi katakutan, manggalotar pas atu dio apo nang sudah tarjadi kapado dirinyo, datang tasungkur dio dopan Yesus dan jujurlah dio mancaritokan sagalanyo nang tarjadi samo dio. ³⁴ Lantas kata-Nyo samo anak daro tu: "Wahai anak-Ku, imanmu nang manyalamatkan kau. Pogilah dan salamat basamo kau, sombuh dari sakitmu." ³⁵ Salagi Yesus bacakap datanglah orang dari kaluargo kapala rumah ibadat tu dibilangkannyo: "Anak tuan udah mati, tak palalah lagi kau manyusah-nyusahkan guru tu?" ³⁶ Akan totapi,bak mandongarkan apo nang orang tu cakapkan, bacakaplah Yesus samo katuo sinagoge tu: "Jangat takut, porcayo sajo." ³⁷ Torus, tak dibolehkan Yesus lah saorang pun nang mangikut-Nyo kacuali Petrus , Yakobus, samo Yohanes, sudaro Yakobus. ³⁸ Bagitu tibo di rumah katuo sinagoge tu, dan Dio manengok bising orang- orang tu, manangis dan maratapi nang mati tu. ³⁹ Bagitu Yesus masuk, dibilangkan-Nyo lah samo orang tu: "Kenapo pulak kamu bising da manangis? Budak tu tidak mati, tapi nang tatidornyo dio." ⁴⁰ Tapi, kekeh lah orang tu manggolaki Yesus. Lantas, diusir-Nyo lah orang tu kaluar dan diajak-Nyo ayah sama omak budak tu, jugo orang nang basamo-samo Dio, masuk kadalam kamar dimano budak tu tagalotak. ⁴¹ Lantas, dipogang-Nyo tangan budak tu, bacakap Dia padonyo: "Talitakum!" (Artinyo, "Anak daro, Aku bilang sama kau, bangkitlah!") ⁴² Anak daro tu langsung bangkit badiri jugo mulai bajalan-jalan, karono udah dua bolas tahun, tacongang-conganlah samuo orang. ⁴³ Lantas, diparintahkan Yesus secaro lantang samo orang tu supayo jangan ado saorang pun nang tau hal itu, disuruh-Nyo jugo orang tu mangasi budak tu makan.