(Khotbah Yohanes Pambaptis) ¹ Pas hari-hari tu, munculah Yohanes Pambabtis, bacaramah di padang balantaro Yudea. ² Dio bacakap, "Batobatlah, korno Karajaan Surgo dan dokat," ³ Korno, diolah nan diucapkan Nabi Yesaya, bacakap, "Ado suaro basoru-soru :'Siapkanlah jalan di padang balantaro samo Tuhan!, ratokanlah jalan di padang gurun bagi Allah kito'. ⁴ Dan, Yohanes sandiri, mamake baju dari bulu onta dan ikat pinggang kulit di pinggangnyo. Makanannyo adolah balalang-balalang dan madu hutan. ⁵ Torus tu, orang-orang Yerusalem datang samo dio, dan saluruh Yudea, dan saluruh daerah di sakitar Yordan. ⁶ Trus, orang tu dibaptis samo dio di sunge Yordan, sambil mangaku doso-doso orang tu. ⁷ Namun, pas Yohanes manengok banyak orang Farisi dan Saduki datang samo baptisannyo, dio bacakap samo orang tu, "Kamu katurunan ular baludak, siapo nan mangingatkan kamu ondak lari dari murka nan akan datang?" ⁸ Karono tu, hasilkanlah buah-buah nan sasue samo partobatan, ⁹ Dan tak usah bapikir ondak bacakap samo diri kau sandiri, 'Kami mampunyoi Abraham, bapak leluhur kami, 'Korno aku mangatokan samo kamu, kolok dari batu-batu ni, Allah tolap mambangkitkan anak-anak untuk Abraham.' ¹⁰ Bahkan, kinin, kampak dilotakkan di akar pohon-pohon, dan satiap pohon nan tak manghasilkan buah nan elok, pasti ditobang dan dicampakkan ka dalam api ¹¹ Sabotulnyo aku mambaptis kamu dengan air untuk partobatan, tatapi Dio nan datang sasudah aku, adolah lobih bakuaso dari padoku, nan mambawa sandal-Nyo pun aku tak layak. Dio akan mambaptis kamu samo Roh Kudus dan samo api. ¹² Alat panampi ado ditangan-Nyo, dan Dio akan mamborsihkan tompat pangirikan-Nyo, dan akan mangumpulkan gandum kadalam lumbung, Namun, Dio akan mambakar rabuknyo dengan api nan tak dapat di padamkan. ¹³ Torus tu, Yesus datang dari Galilea ka Yordan kapado Yohanes ondak dibaptis samo dio. ¹⁴ Namun, Yohanes barusaho manolak-Nyo dan bacakap, "Akunyo nan porlu dibaptis samo-Kau, tatapi Kau pulak nan datang samoku?" ¹⁵ Trus, Yesus manjawab dan bacakap samonyo, "Udahlah, biarlah ini tajadi samo kito baduo, bak supayo manggonapi saluruh kabonarannyo." Dan, Yohanes pun mambabtis Dio. ¹⁶ Sasudah di Baptis, Yesus langsung kaluar dari air, dan tengoklah, surgo tabuko dan Dio manengok Roh Allah turun macam burung merpati datang kaatas-Nyo. ¹⁷ Dan, kadongaranlah suaro dari surgo bacakap, "Inilah Anak-Ku nan Kukasihi, Samo-Nyolah Aku bakonan."