(Taladan Abraham) ¹ Jadi, apakah nan nak kita kataen tentang Abraham, bopak laluhur kita manurut daging? ² Kaena bila Abraham diboneen malalui pabuatennyeh, dia mamunyai alasen untu bamegah, topi idak di hadapen Allah. ³ Sebab, apa nan dikataen oleh kitab Suci? ”Abraham pacaya kapada Tuhan dan Tuhan mampaitungen hal otou kapadanyeh sabagei kaboneen.” ⁴ Kapada urang nan bakaeja, upah nan dibagien kapada mareka bukanlah suatu hadiah, malainen hak mareka. ⁵ Dan, kapada nan idak bakaeja, topi pacaya kapada Allah nan mamboneen urang fasik, iman mareka dipahitungen sabagei suatu kaboneen. ⁶ Bahkan Daud pun mangataen batapa dibekatinyeh sasaurang katika Allah mampahitungen kaboneen kapadanyeh tanpa mamandang hal-hal nan telah dia pabuat: ⁷ ”Babahagialah urang nan diampuni palangge-palanggeennyeh, dan nan ditutupi dosa-dosanyeh. ⁸ Babahagialah urang-urang nan dosanyeh idak dipahitungen oleh Tuhan! ⁹ Apakah berkat ikok henyeh untu urang nan basunat? Atoukah juga untu urang nan idak basunat? Sebab kami sudah mangataen bahwa ”Iman Abraham tahitung sabagei kaboneen.” ¹⁰ lalu, bageimona otou dipahitungen kapadanyeh? Sabolum atou sasudah dia disunat? Bukan satelah dia disunat, malainen sabolum dia disunat. ¹¹ Abraham manarima tanda sunat sabagei materai kaboneen iman sabolum dia basunat supaya dia dapat manjadi bopak bagi samua urang nan pacaya tak basunat sahingga kaboneen otou juga dipahitungen kapada mareka; ¹² Sakaligus manjadi bopak bagi urang-urang basunat nan idak hanya basunat topi juga bajalan dalam jalan iman nan paenah dilalui oleh bopak kita, Abraham, sabolum dia disunat. (Abraham Manarima Janji Allah Malalui Imannyeh) ¹³ Janji kapada Abraham dan kapada katurunannyeh bahwa mareka nak mamunyai saluruh bumi idak nak diponuhi malalui Hukum Taurat, topi malalui kaboneen iman. ¹⁴ Sebab, bila mareka nan baasal dai Hukum Taurat dapat manjadi ahli waris, maka iman manjadi sia-sia dan janji Allah dibatalen; ¹⁵ Sebab Hukum Taurat manibaen murka, topi bila idak ada Hukum Taurat, maka di sotou juga idak ada palanggeen. ¹⁶ Ikoklah mangapa janji otou baasal dai iman, supaya janji otou badasaren kasih karunia sahingga janji otou juga sampei kapada saluruh katurunen Abraham; bukan henyeh nan baasal dai Hukum taurat, topi juga nan baasal dai iman Abraham, nan adalah bopak kita samua, ¹⁷ (sapaeti nan tatulis, ”Aku telah manjadienmu bopak bagi banyak bangsa") Dihadapen Allah, nan dia pacayai, yaitu Allah nan mambagien kahidupen kapada urang mati dan nan manyobut nan bolum ada manjadi ada. ¹⁸ Dalam pangharapen di tas pangharapen dia pacaya, sahingga dia boleh manjadi bopak dai banyak bangsa sasuei dengan nan telah dikataen, ”Nak manjadi demikianlah katurunenmu.” ¹⁹ Dan, dengan idak manjadi lomah dalam iman, meskipun dia manontui tubuhnyeh dewek hampe mati kaena umurnyeh kira-kira 100 tahun dan rahim Sara juga sudah mati; ²⁰ Dia idak dibimbangen tahadap janji Allah oleh katidakpacayaan. Sabaliknyeh, imannyeh dikuaten sahingga dia mambagien kamuliaen kapada Allah, ²¹ dan marasa yakin bahwa Allah bakuasa malakuen apa nan telah dijanjien-Nyeh. ²² Kaena otoulah, imannyeh ”Dipahitungen sabagei kaboneen.” ²³ Namun, hal otou idak henyeh ditulis demi kapentingen Abraham saja, ²⁴ topi juga bagi kita. Hal otou nak dipahitungen kapada mareka nan pacaya kapada Dia nan mambangkiten Yesus, Tuhan kita, dai hantara urang mati. ²⁵ Yaitu, Yesus nan tolah diserahen untu mati kaena dosa kita, dan nan telah dibangkiten demi pamboneen kita.