¹ Kamudien, malaikat otou manunjuen kapadaku muaro ayek kahidupen, nan baesih sapaeti kristal, mangale dai tahta Allah dan Budak Domba ² di tongah-tongah jalan kota otou. Di kadua sisi sungai, tumbuh pohon kahidupen nan manghasilen dua belas jenis buah dan manghasilen buahnyeh satiap bulan. Daun-daun pohon otou digunaen untu manyembuhen bangsa-bangsa. ³ Idak nak ada lagi kutuk, topi tahta Allah dan Budak Domba nak ada di dalam kota otou. Hamba-hamba-Nyeh nak manyembah Dia. ⁴ Mareka nak mandang wajah-Nyeh dan nama-Nyeh nak tatulis pada dahi mareka. ⁵ Malam idak nak ada lagi sahingga mareka idak mameluen cahaya lampu atou matahari kaena Tuhan Allah nak manorangi mareka, dan mareka nak mamaentah salama-lamanyeh. (Katibaen Yesus Kristus) ⁶ Malaikat otou bakata kapadaku, "Samua pakataen ikok dapat dipacaya dan bone. Tuhan, Allah dai roh para nabi, manyuruh malaikat-Nyeh untu manunjuen kapada hamba-hamba-Nyeh apa nan haus sagera tajadi. ⁷ Dongelah, Aku sagera tiba! Diberkatilah urang nan manaati pakataen-pakataen nubuat kitab ikok." ⁸ Aku, Yohanes, nan tolah mandonge dan mandang samuanyeh otou. Katika aku mandonge dan mandang samuanyeh, aku basujud untu manyembah di kaki malaikat nan tolah manunjuen samua otou kapadaku. ⁹ Namun, dia bakata kapadaku, "Jangan lakuen otou! Aku adalah hamba sama sapaeti kamu dan dulo-dulomu, para nabi, saeta sapaeti mareka nan manaati pakataen-pakataen dalam kitab ikok. Sembahlah Allah!" ¹⁰ Kamudien, malaikat otou bakata kapadaku, "Jangan manyegel pakataen-pakataen naubuat dalam kitab ikok kaena waktunyeh sudah dokat." ¹¹ Biaken urang nan babuat jahat totap babuat jahat, urang nan idak suci totap idak suci, urang nan babuat bone totap malakuen kaboneen, dan urang nan suci totap manyucien dirinyeh." ¹² "Dongelah, Aku segera tiba! Dan, aku mambawak upah-Ku, untu mambalas satiap urang manurut pabuatennyeh. ¹³ Aku adalah Alfa dan Omega, Nan Patama dan Nan Taahir, Nan Awal dan Nan Ahir. ¹⁴ Diberkatilah mareka nan mambasuk jubah mareka sahingga mareka mamunyai pohon kahidupen otou dan masu ka kota otou malalui pintu-pintu gerbangnyeh. ¹⁵ Nan di lue kota otou adalah anjing-anjing, urang nan malakuen sihi, urang-urang cabul, para pambunuh, para panyembah bahala, dan urang-urang nan manyukai panyombongen. ¹⁶ Aku, Yesus, tolah manyuruh malaikat-Ku untu basaksi kapadamu tentang samuanyeh ikok bagi jemaat-jemaat. Akulah tunas dan katurunen Daud, Sang Bintang Timur nan benderang." ¹⁷ Roh dan pangantin batina otou bakata, "Maelah!" Biaklah urang nan mandonge ikok bakata, "Maelah!" Biaklah urang nan haus tiba; biaklah urang nan basedia mangambik ayek kahidupen sacara cuma-cuma." (Panutup) ¹⁸ Aku basaksi kapada samua urang nan mandonge pakataen nubuat kitab ikok: "Kalu ada nan manambahen sasuatu pada pakataen-pakataen ikok, Allah nak manambahen kapadanyeh samua bencana nan tatulis dalam kitab ikok. ¹⁹ Dan, kalu ada nan mangurangi sasuatu dai pakataen-pakataen dalam kitab nubuat ikok, Allah nak mangambik bagiannyeh dai pohon kahidupen, dai kota suci, dan dai hal-al nan tatulis dalam kitab ikok." ²⁰ Dia nan basaksi mangonai hal-hal ikok bakata, "Ya, Aku sagera tiba." Amin! Tibalah, Tuhan Yesus! ²¹ Anugerah Tuhan Yesus manyetai kamu samua. Amin.