(Jangan Menghakimi) ¹ "Jangan mahakimi supaya kamu idak dihakimi. ² Kaena dengan panghakimen nan kamu gunaen untu manghakimi, kamu nak dihakimi, dan dengan ukoen nan kamu gunaen untu manguko nak diukoen kadapamu. ³ Dan, mangapa kamu mandang sepihen kayu di mata dulomu, topi idak manontui balok nan ada di matamu dewek? ⁴ Atou, bageimona bisa kamu bacakap kapada dulomu, 'Biak aku mangaluen sepihen kayu otou dai matamu,' topi pandang, ada balok di matamu dewek? ⁵ Hai, urang munafik, kaluen deheluh balok otou dai matamu, dan kamudien kamu nak mandang dengan jelas untu mangaluen sepihen kayu dai mata dulomu. ⁶ Jangan mambagien barang nan suci kapada anjing-anjing, jangan pulak mancampaen mutiaramu ka hadapen babi supaya mareka idak mahijak otou dengan kakinyeh dan babalik mancabik-cabik kamu." (Mintalah, Cailah, dan Ketuklah) ⁷ "Mintaklah, dan hal otou nak dibagien kapadamu. Cailah, dan kamu nak mandapat. Ketuklah, dan hal otou nak dibukaen bagimu. ⁸ Sebab, satiap urang nan mamintak, Dia manarima, dan urang nan mancai nak mandapaten, dan bagi dia nan mangetuk nak dibukaen. ⁹ Atou, siapakah dai hantara kamu, nan bila budaknyeh mamintak roti nak mambagi batu kapada budaknyeh otou? ¹⁰ Atou, bila budaknyeh mamintak ikan, dia idak nak mambagien ule kapada budaknyeh otou, bukan? ¹¹ Jadi, bila kamu nan jahat tontu bageimona mambagien budak-budakmu pambagien-pambagien nan baik, talobih lagi Bopakmu nan di saruga, Dia nak mambagien nan baik kapada nan mamintak kapada-Nya." (Hukum yang Terutama) ¹² "Kaena otou, sagala sasuatu nan kamu ingin urang lakuen kapadamu, demikian juga kamu lakuen kapada mareka kaena ikoklah isi Hukum Taurat dan kitab para nabi." (Jalan Manuju Kahidupen) ¹³ "Masuklah malalui gerbang nan sempit kaena lebelah gerbang dan luaslah jalan nan manuju kapada kabinasaan, dan ada banyak nan masuk malaluinyeh. ¹⁴ Sebab, sempitlah gerbang dan sosaklah jalan nan manuju kapada kahidupen, dan sedikit nan manemuinyeh." (Paringaten tentang Nabi-nabi Palsu) ¹⁵ "Namun, waspadalah tahadap nabi-nabi palsu nan tiba kapadamu dengan bapokein domba, topi saboneenyeh mareka adalah serigala-serigala nan ganas. ¹⁶ Dai buahnyelah kamu nak mangenali mareka. Dapatkah mangumpulen buah-buah anggur dai somak-somak duri dan buah-buah ara dai tumbuhen-tumbuhen baduri? ¹⁷ Demikian juga, satiap pohon nan baik mahasilen buah nan baik, topi pohon nan idak baik mahasilen buah nan idak baik. ¹⁸ Pohon nan baik idak mungkin mahasilen buah nan idak baik, dan pohon nan idak baik idak mungkin mahasilen buah nan baik. ¹⁹ Satiap nan idak mahasilen buah nan baik nak ditobang dan dicampak ka dalam api. ²⁰ Jadi, dai buah-buahnyeh kamu nak mangenali mareka. ²¹ Idak samu urang nan bacakap kapada-Ku, 'Tuhan, Tuhan, ' nak masuk ka dalam karajaen Saruga, malainen dia nan malakuen kahondak Bopakku nan di saruga. ²² Pada hai otou, banyak urang nak bacakap kapada-Ku, 'Tuhan, Tuhan, bukankah kami banubuat dalam nama-Mu, dan manguse roh-roh jahat dalam nama-Mu, dan malakuen banyak mukjijat dalam nama-Mu? ' ²³ Lalu, Aku nak manyataen kapada mareka, 'Aku idak pernah mangenal kamu! Enyahlah dai-Ku, kamu nan mangajaen kasalahan!"' (Mandonge dan Malakuen) ²⁴ "Kaena otou, samua urang nan mandonge pakataen-pakataen-Ku ikok dan malakuennyeh nak manjadi sapaeti urang bijaksana nan mambangun rumahnyeh di atas batu. ²⁵ Lalu turunlah hujan dan tibalah banjir, dan angin batiup manarpa rumah otou, dan rumah otou idak rubuh kaena ditogaken di atas batu. ²⁶ Dan, satiap urang nan mandonge pakataen-Ku ikok dan idak malakuennyeh nak manjadi sapaeti urang bengak nan mambangun rumahnyeh di atas pase. ²⁷ Lalu, turuhlah hujan dan tibalah banjir, dan angin batiup manarpa rumah otou, dan rumah otou rubuh dan sangat bose karusakannyeh." ²⁸ Katika Yesus salosei mangataen hal-hal ikok, urang banyak taheran-heran pada pangajaen-Nyeh, ²⁹ kaena Dia mangaje mareka sabagei urang nan bakuasa, dan idak sapaeti ahli-ahli Taurat mareka.