Salam dai Yudas ¹ Dai Yudas, palayan Yesus Kristus dan saudara Yakobus, kapada mareka nan dipilih dan disayangi Allah Bopak, saeta nan dipalihara bagi Yesus Kristus. ² Kiranyeh belas sayang, damei sajahtera, dan sayang malimpah atasmu. (Allah Nak Manghukum Mareka nan Babuat Salah) ³ Dulo-dulo tersayang, samantara aku bausaha koras manulis kapadamu tentang kasalamaten kita basama, aku marasa paelu manulis kapadamu dan mamintakmu supaya kamu bajuang sungguh-sungguh untu iman nan disampeien sakali untu salamanyeh kapada urang-urang suci. ⁴ Sebab, urang-urang tatentu tolah manyusup tanpa disadari, yaitu mareka nan sejak dahulu tolah ditentuen untu dihukum, urang-urang tak baiman nan manyalahgunaen anugerah Allah kita untu mamuasen nafsu dan manolak satu-satunye Panguasa dan Tuhan kita, Yesus Kristus. ⁵ Aku mau mangingatkanmu meskipun kamu tolah manontuinyeh saponuhnyeh, bahwa Tuhan tolah manyalamaten umat-Nyeh dengan mangalueen mareka dai tanoh Mesir, topi kamudien Dia mambinasaen mareka nan idak pacaya. ⁶ Dan, malaikat-malaikat nan idak taat pada batas-batas kakuasaen mareka, malainen maninggalen tompat kadiamen mareka, tolah Dia ikat dengan rantai abadi dalam kagelapen nan paling gelap untu panghakiman pada hai bose nanti. ⁷ Demikian juga Sodom dan Gomora saeta kota-kota di sakitarnyeh, nan mamuasen diri dalam dosa seksual dan mangeje nafsu nan idak wajar, tolah mananggung hukuman api kekal sabagei contoh. ⁸ Sapaeti otou jugalah urang-urang ikok, mangandalen mimpi-mimpi mareka, macemaen bodan, manolak kakuasaen dan manghina samua nan mulia. ⁹ Mikhael saja, sang panghulu malaikat, katika batengke dengan Setan tentang mayat Musa, idak datang mangucapen kata-kata hujatan kapadanyeh, malainen hanya bakata, "Kiranyeh Tuhan mamarahi kamu!" ¹⁰ Topi, para panyosat ikok manghujat hal-hal nan idak mareka tontui, nan hanya mareka tontui badasaren naluri, sapaeti binatang nan idak mamunyai akal. Oleh hal-hal ikoklah mareka nak dihancoen. ¹¹ Cilakalah mareka! Mareka tolah mangikuti jalan nan ditempuh Kain, dan mangaje dengan sarakah kasalahen nan dilakuen Bileam, dan binasa kaena pambarontaen sapaeti Korah. ¹² Mareka ikok sapaeti noda dalam pajamuen sayangmu, nan malahap mokonen basamamu tanpa rasa takut, paduli hanya pada diri dewek. Mareka sapaeti awan nan idak mambawa hujan, nan ditiup angin ka sotou kamai. Mareka sapaeti pohon-pohon nan idak babuah pada musimnyeh, mati dua kali, dan dicabut saake-akenyeh. ¹³ Mareka sapaeti galombang laut nan ganas, nan mambuihen kahinaen mareka dewek. Mareka sapaeti bintang-bintang nan mambara, nan baginyeh kagelapen nan pekat nan tolah disediaen untu salamanyeh. ¹⁴ Juga tentang urang-urang ikoklah Henokh, katurunen katujuh dai Adam, banubuat, "Pandanglah, Tuhan tiba basama baribu-ribu urang suci-Nyeh, ¹⁵ untu manjalanen panghakiman atas samua urang; manghukum samua urang fasik atas samua pabuaten fasik nan mareka lakuen dengan cara nan fasik, dan atas samua pakataen kase nan tolah ucapen oleh urang-urang badosa nan fasik tahadap Allah." ¹⁶ Mareka adalah urang-urang nan suka mangeluh, mancai-cai kasalahen, dan manuruti hawa nafsu mareka dewek; mareka bamulut bose dan manjilat urang lain demi mandapaten kauntungen. (Paingaten dan Nasehat) ¹⁷ Dulo-dulo nan kusayangi, kamu haus mangingat apa nan tolah dikataen rasul-rasul Tuhan kita, Yesus Kristus. ¹⁸ Mareka tolah bakata kapadamu, "Pada jaman ahir, nak ada para pancemooh nan hanya mangikuti nafsu mareka nan fasik." ¹⁹ Mareka adalah urang-urang nan manyebaben papocahen, mangikuti nafsu duniawi, dan idak mamunyai Roh. ²⁰ Topi, kamu, Dulo-dulo nan kusayangi, bangunlah dirimu dewek di atas imanmu nan paling suci dan badoalah dalam Roh Suci. ²¹ Paliharalah dirimu dalam sayang Allah sambil manantien rahmat Tuhan kita, Yesus Kristus, nan manuntun kapada hidup kekal. ²² Punyailah kamurahen hati bagi mareka nan ragu-ragu, ²³ salamatenlah urang lain dengan marobut mareka dai api. Kapada nan lain, palihatenlah belas sayang nan disetai rasa takut, dengan mambenci pokeien mareka nan dicemari hawa nafsu duniawi. (Puji-Pujian kapada Allah) ²⁴ Bagi Dia, nan bakuasa manjagamu idak jatuh dan manghadirenmu tanpa cacat di hadapen takhta kamuliaen-Nye dengan senang nian bose. ²⁵ Bagi satu-satunyeh Allah, Juru Salamat kita, malalui Kristus Yesus, Tuhan kita, kamuliaen, kaagungen, kakuaten, dan kuasa sapanjang masa: dahulu, sakarang, sampei salama-lamanyeh. Amin.