¹ Dan, katiko hari Sabat balalu, Maria Magdalena, Maria ibu Yakobus, serta Salome, ala mambali rampah-rampah sahinggo sidak dapek pai dan maminyaki Yesus. ² Pagi-pagi bana, pado hari partamo minggu tu, katika matohari tabik, sidak datang ka kuburan. ³ Sidak mangecce sabua samo lain, "Siapo nan nandak manggulingkan batu dari pintu masuk kuburan tu?" ⁴ Namun, salase mamandang ka ate, sidak maliek batu nan agak gadang tu salase digulingkan. ⁵ Dan, salase masuk kadalam kuburan, sidak maliek saurang pamudo nan mamakke jubah putih sadang duduk di sabala kanan, dan sidak takajut. ⁶ Lalu, inyo mangecce kapado sidak, "Jangan takajut, kau mancari Yesus urang Nazaret nan ala disalibkan. Inyo ala bangkik. Inyo indak ado disikko. liek tampek sidak mambaringkan-Nyo. ⁷ Akan tatapi, pailah, katokan kapado murid-murid-Nyo samo kapado Petrus bahwa INyo sadang mandahului ka ka Galilea. Di sinun, kau akkan basuo inyo, sakiro nan ala Inyo katokan ka kau." ⁸ Kamudian, sidak kalua dan malarikan diri dari kuburan tu karano sidak manggigi dan takajub, dan sidak indak mangatokan apo-apo samo siapo pun karano sidak katakkutan. Dan, sagalo sasuatu nan ala diparintahkan supayo sidak katokan kapado Petrus dan kawan-kawan-Nyo, sidak sampekan jongon singkat. manyatokan barita nan kudus dan nan indak dapek binasa tantang kaselamatan kekal. Amin ⁹ Katika Yesus jago pagi-pagi pado hari partamo dalam minggu tu, Inyo partamo-tamo nampak kapado Maria Magdalena nan darinyo Yesus ala mangusir tujuh roh jahek. ¹⁰ Lalu, inyo pai dan mangagitaukan kapado sidak nan ala basamo jongon Yesus, samantaro sidak sadang berduka dan manangi. ¹¹ Dan, katika sidak mandanga bahwa Yesus hidup dan ala diliek olehnyo, sidak indak piccayo. ¹² Salase kajadian tu, Yesus juo nampak dalam bentuk lain kapado duo urang dari sidak nan sadang bajalan manuju ka desa. ¹³ Lalu, sidak babalik dan mangagitaukan kapado nan lainnyo, tatapi nan lainnyo tu juo indak mampiccayoi sidak. ¹⁴ Salase tu, Inyo nampak sorang kapado kasabale murid-Nyo katika sidak sadang duduk makkan dan Inyo managur sidak karano kaindakpiccayoan dan kakarean ati sidak. Sabab, sidak indak piccayo kapado urang-urang nan ala maliek-Nyo sasudah Inyo bangkik. ¹⁵ Dan, Inyo mangecce kapado sidak, "Pailah kasadonyo dunia dan baritokanlah Injil kapado sadonyo ciptaan. ¹⁶ Siapo nan ala piccayo dan ala dibaptis akkan diselamatkan, tatapi sidak indak piccayo akkan dihukkum. ¹⁷ Dan, tando-tando ko akkan mangikkuti sidak nan piccayo: Dalam namo-Ambo sidak akkan mangusir roh-roh jahek; sidak akkan mangecce dalam bahaso-bahaso baru; ¹⁸ sidak akkan mamaccik ula jongon tangan sidak; dan jikasidak minum raccun nan mamatikan, hal tu indak akkan mancelakakan sidak; sidak akkan malatakkan tangan sidak atas urang-urang sakkik, dan urang-urang tu akkan cegak." ¹⁹ Lalu, salase Tuhan Yesus mangatokannyo kapado sidak, Inyo tahangkek ka surgo dan duduk di sabala kanan Allah. ²⁰ Lalu, sidak pai dan bakhotbah di mano-mano, samantaro Tuhan bakarajo basamo sidak dan managuhkan firman-Nyo malalui tando-tando nan manyertainyo.