¹ Subuh tu, iman-iman kapalo mengadokan sabuah parundingan samo paro orang tuo dan ahli-ahli taurat, serta samuo Sanhedrin. Dan orang-orang tu mangikat Yesus, mambawa-Nyo pogi, dan manyorahkan-Nyo pogi samo Pilatus. ² Lalu Pilatus batanyo samo Dio, "Apakah awak ni Rajo orang Yahudi?" Lalu Dio manjawabnyo , "Kaulah yang mambilangkannyo." ³ Salopas tu, paro imam kapalo manuduh Yesus batubi-tubi. ⁴ Lagi, Pilatus batanyo lagi samo Dio, "Apokah kau tak manjawabnyo? Tengok banyak sangat tuduhan orang tu malawan mu." ⁵ Tapi, Yesus tak lagi manjawab sahinggo Pilatus tacongan. ⁶ Saat hari rayo paskah, Pilatus biasanyo mambebaskan bagi orang tu saorang tahanan yang dimintanyo. ⁷ Adolah saorang yang namonyo Barabas tolah ditahan basamo paro pambarontakan. ⁸ Orang rame tibo dan maminta samo pilatus tuk mambuat manurut kabiasoan yang dio buat bagi orang tu. ⁹ Pilatus manjawab orang tu katonyo, "Apokah kamu ondak supayo awak bobaskan bagimu Rajo orang Yahudi ni ?" ¹⁰ Sobab, dio tau bahwa paro iman kapalo sudah sorahkan Yesus karna iri dongki. ¹¹ Tapi imam-imam kapalo pangaruhi banyak orang supayo Pilatus Bobaskan Barabas. ¹² Lalu, Pilatus bacakap lagi ka orang tu, "Jadi, apokah yang ondak awak buat samo orang yang kamu sobut Rajo orang Yahudi ni? ¹³ Dan orang tu batariak-tariak lagi, "Salibkan Dio!" ¹⁴ Lalu Pilatus bacakap samo orang tu, "Mangapo? Kajahatan apo yang Dio buat?" Namun, orang tu batariak-tariak dongan koras," Salibkan Dio!" ¹⁵ Karono ondak manyonangkan hari orang banayk, Pilatus bebaskan Barabas bagi orang tiu, satolah mancambuk Yesus, dio manyorahkan tuk disalibkan. ¹⁶ Paro prajurit mambawa Yesus masuk ka istana, yaitu godung pangadilan, dan orang tu mamanggil samuo pasukan bakumpul. ¹⁷ Orang tu pun mamakainyo junah ungu, satolah manganyam sabuah mahkota baduri, orang tu pun mamakainyo samo Yesus. ¹⁸ Kamudian orang rame muloi manyampaikan salam samo-Nyo, "Salam, Rajo orang Yahudi!" ¹⁹ Dan orang rame mamukul kapalo-Nyo dengan sabuah buluh, dan maludahi-Nyo, lalu sujud manyombah-Nyo. ²⁰ Satolah orang rame mangejek-ejek Yesus, orang tu malopaskan jubah ungu dari Yesus, dan mamakai pakainan-Nyo sandiri. Lalu, orang tu mambawa Yesus kaluar tuk disalibkan-Nyo. (Panyaliban Yesus) ²¹ Orang tu pun mamaksa orang yang sodang lewat, Simon orang kirene, yang soadang datang dari kampung, Ayah dari Aleksander dan Rufus, untuk mamikul salib-Nyo. ²² Lalu, orang tu pun mambawak Yesus ka tompat yang namonyo Golgota yang artinyo "Tompat Tangkorak". ²³ Lalu orang tu mangasih-Nyo anggur bacampur mur, tapi Dio tak ²⁴ mangambeknyo. lu, orang tu manyalibkan Dio dan mambagi-bagikan pakean-Nyo di antaro orang tu, sambil malemparkan undian untuk manontukan bagian apo yang biso diambek. ²⁵ Dan, saat tu jam tigo waktu orang tu manyalibkan-Nyo. ²⁶ Dan, tulisan mangonoi tuduhan tahadap Yesus tatulis, "Rajo Orang Yahudi." ²⁷ Lalu orang tu manyalibkan duo orang parampok basamo-Nyo, saorang di sabolah kanan-Nyo, saorang di sabolah kiri-Nyo. ²⁸ Jadi gonap lah Kitab Suci yang mangatokan, "Dan, Dio tahitung di antaro orang-orang durhako." ²⁹ Kamudian, orang-orang yang lagi lewat manghujat Yesus manggelengkan kapalo orang tuh katonyo, "Hoi Kau yang ondak maruntuhkan Bait Allah dan mambangunnyo kambali dalam tigo hari, ³⁰ Salamatkanlah diri-Mu sandiri dan turunlah dari salib!" ³¹ Bagitu jugo imam-imam kapalo, samo paro orang yang jago-jago Taurat, mangejek Yesus dengan bacakap satu samo lain, Dio manyalamatkan orang lain, tapi Dio tak biso manyalamatkan diri-Nyo sandiri! ³² Biarlah Mesias, Sang Rajo Israel, kinin turun dari salib supayo kito dapat manengok dan pacayo. orang tu yang di salibkan basamo Yesus jugo manejek Dio. ³³ Waktu jam onam, tajadilah kagolapan di saluru tanah tu sampek jam sambilan. ³⁴ Waktu jam sambilan, Yesus manjorit, "Eloi, Eloi, lama sabakhtani, "yang artinyo" Alah-Ku, Allah-Ku, mangapo kau maninggalkan ku?" ³⁵ Dan, sasudah mandongarnyo, babarapo orang yang badiri di dokat-Nyo bacakap, "Tengok! Dio mamanggil Elia." ³⁶ Lalu, sasaorang balari, dan mangisih sabuah bungo karang dengan anggur asam, dan manompatkannyo pada sabuah buluh, dan mangkasihkannyo pado Yesus supayo diminum, sambil bacakap, "Kito tengok dulu apokah Elia akan datang untuk manurunkan-Nyo." ³⁷ Kamudian, Yesus manjorit dan manghombuskan nafas tarakhir-Nyo. ³⁸ Waktu tu, tirai Bait Allah kuyak manjadi duo, dari atas sampek ka bawah. ³⁹ Dan waktu kapalo pasukannyo, badiri manghadap Yesus, manengok camano Yesus manghombuskan nafas tarakhir-Nyo, Dio bacakap, "Sungguh orang ni adalah anak Allah!" ⁴⁰ Di sano jugo ado anak parampuan manengok dari jauh, diantaro orang tu adalah Maria Magdalena, dan Maria omak Yakobus Mudo dan yoses, serta salomo. ⁴¹ Saat Yesus ado di daerah Galilea,orang tu mangikuti Dio dan malayani Dio. Dan, di sano ado anak parampuan lainnyo tibo basamo Yesus ka Yerusalem. ⁴² Waktu hari sudah malam, karono hari tu adalah hari parsiapan, yaitu hari sabolum hari sabat. ⁴³ Yusuf orang Arimatea tibo, saorang anggota majolis bosar yang di hormati, yang darinyo jugo manunggu-nunggu kadatangan Allah, mambaranikan diri dan pogi samo Pilatus dan mamintak badan Yesus. ⁴⁴ Pilatus takojut mandongar Yesus sudah maninggal. Dio mamanggil kaduo katuo pasukan dan katonyo pado-Nyo, apokah bonar Yesus udah maninggal. ⁴⁵ Sasudah Pilatus tau dari katuo pasukan, dio mambarikan mayat tu samo Yusuf. ⁴⁶ Dan Yusuf mambolikkan kaen linen tu dan manurunkan mayat Yesus, sasudah mambungkus-Nyo dalam kaen linen tu, dio mambaringkan-Nyo di dalam kuburan yang di gali di bukit batu. Dan, dio manggulingkan sabuah batu ka pintu masuk kuburan. ⁴⁷ Mari Magdalena dan Maria omak Yoses manengok tompat Yesus dibaringkan