¹ Lalu, waktu orang tu ondak sampek di Yerusalem, dokat Betfage dan Betania, di Bukit Zaitun, Yesus manyuruh duo murid-Nyo, ² dan bacakap samo orang tu, b"Pogilah ka kampung di dopanmu, dan sagora kamu mamasukinyo, kamu akan bajumpo saekor kalodai mudo nang tarikat, nang bolum paronah di tunggangi orang. Bawaklah kalodai tu. ³ Kalau ado orang batanyo samomu, 'Mangapo kamu malakukannyo?', cakapkan, 'Tuhan ni porlunyo kalodai tu dan sacopatnyo dikirimkan ka sini balek .'" ⁴ Lalu, orang tu pogi dan manjumpoi saekor kalodai mudo yang tarikat di pintu, di luar, lalu orang tu malopaskannyo. ⁵ Babarapo orang yang badiri di situ batanyo ka orang tu, "Apo yang kamu karojokan dengan malopaskan kalodai tu?" ⁶ Orang tu manjawa macam yang sudah Yesus katokan ka orang tu, lalu orang-orang tu mambiarkan orang tu pogi. ⁷ Kamudian, orang tu mambawak kalodai tu ka Yesus, malotakkan jubah orang tu di punggung kalodai tu, lalu Yesus duduk di atasnyo. ⁸ Lalu, banyak orang mambontangkan jubah orang tu di jalan, lalu yang laennyo manyerakkan ranting-ranting yang orang tu bawak dari ladang. ⁹ Orang banyak yang bajalan di dopan dan mangikuti batariak, "Hosana! Diborkatilah Dio yang datang dalam namo Tuhan. ¹⁰ Diborkatilah kadatangan karajaan Daud, nenek moyang kito! Hosana, di tompat yang mahatinggi!" ¹¹ Kamudian, Yesus masuk ka Yerusalem lalu pogi ka bait Allah. Lalu, sasudah manengok samuo di sakalilingnyo, Dio pogi ka Betania samo kaduo bolas murid-Nyo karono haru sudah larut. (Yesus Mangutuk Pohon Ara) ¹² Lalu, besoknyo, waktu orang tu maninggalkan Betania yesus maraso lapar. ¹³ Sasudah manengok sapokok pohon ara yang rindang dari kajauhan, Dio pogi ondak manengok manotau ado buah yang Dio jumpoi dari pohon tu. Waktu dio sampek ka pohon tu, Dio tak manomukan apo-apo, kacuali daunnyo yang lobat karono waktu tu bolum musim buah ara. ¹⁴ Karono tu, Yesus bacakap ka pohon tu, "Jangan ado lagi yang mamakan buahmu untuk salamo-lamonyo".Lalu, murid-murid-Nyo mandongar. ¹⁵ Kamudian, orang tu sampek ka Yerusalem. Lalu, Yesus masuk ka Bait Allah dan mangusir orang-orang yang bajualan di Bait Allah tu. Dio mambalikkan meja-meja panukar uang dan bangku-bangku panjual burung marpati, ¹⁶ lalu Dio tak mangizinkan orang-orang bajualan di dalam Bait Allah. ¹⁷ Kamudian, Yesus mangajar orang tu dan bacakap, "Bukankah tatulis, Rumah-Ku disobut rumah doa bagi samuo bangso?" Tapi, kamu sudah mangubahnyo manjadi sarang parampok. ¹⁸ Lalu, imam-imam kapalo dan jago-jago Taurat mandongarnyo lalu orang tu mancarik caro camana ondak mambunuh-Nyo. Sobab orang tu takut ka-Dio karono banyak orang takjub akan pangajaran-Nyo. ¹⁹ Lalu, waktu hari muloi malam, Yesus samo murid-murid-Nyo maninggalkan kota tu. ²⁰ Lalu, pagi-pagi waktu orang tu lewat, orang tu manengok pohon ara yang sudah koring sampek ka akarnyo. ²¹ Petrus taringat lalu backap ka yesus, "Rabi, tengok! pohon ara yang kau kutuk tu udah manjadi koring!" ²² Lalu, Yesus manjawab orang tu, "Punyoilah iman di dalam Allah. ²³ Aku mambilang kan yang sabonarnyo ka kamu, siapo sajo yang bajakap ka gunung ni, 'Tarangkatlah dan tajampaklah ka dalam laut,' dan tak ado karaguan di dalam hatinyo, tapi pacayo bahwa apo yang dio cakapkan akan tajadi, maka hal itu pasti akan tajadi. ²⁴ Sobab tu, Awak bacakap ka kamu, apo sajo yang kamu doa kan dan kamu pintak, dan pacayo kalo kamu sudah manarimonyo, mako hal tu pasti dikasikan ka kamu. ²⁵ Lalu, apabilo kamu badiri dan badoa, amounilah dahulu bilo kamu ado manyimpan sasuatu di dalam hatimu, supaya Ayahmu yang ado di surgo jugo mau mangampuni kasalahan-kasalahanmu. ²⁶ Tapi, bilo kamu tak mangampuni, Ayah mu yang ado di sorga pun tak akan mangampuni kasalahan-kasalahanmu." ²⁷ Kamudian, orang tu datang lagi ka Yerusalem. samantaro Yesus bajalan ka Bait Allah, imam-imam kapalo, jago-jago Taurat, dan orang-orang tuo Yahudi datang ka-Dio. ²⁸ Lalu, orang tu bacakap ka-Dio, "Dengan kuaso apo Kau mangkarojokan samuonyo tu, atau siapo yang mangkasikan-Kau kuaso untuk mangkarojokannyo?" ²⁹ Yesus bacakap ka orang tu, "Awak akan batanyo satu partanyoan ka kamu. Jawablah Awak, baru awak akan mangkasihtau kamu dengan kuaso apo Awak mangkarojokan samuonyo tu. ³⁰ Apokah baptisan Yohanes barasal dari surgo atau dari manusio? Jawablah Awak!" ³¹ Orang tu pun bapokat satu samo laen dan mambilang, "Bilo kito manjawab 'Dari surgo', Dio akan mambilang, lalu, mangapo kamu tak pacayo ka Dio?' ³² Tapi, bilo kito manjawab, 'Dari manusio'?" Para pamimpin tu takut ka orang banyak karono orang tu samuo manganggap kalau Yohanes botul-botul saorang nabi. ³³ Karono tu, orang tu manjawab Yesus, "Kami tak tau". Kamudian, Yesus bacakap ka orang tu, "bagitu jugo Awak, Awak pun tak akan mangkasi tau kamu dengan kuaso apokah Awak mangkarojokan samuonyo tu".