¹ Aki bara' pala' ketu' tu'a ya un neng a'ang ikam, ikam na tuyang e' ya' mena'at dite penuyen Kristus ti, mung ileu ta ya' ke un peniga ya' ufa' kenai tula' ni o. ² Petubo na mung kelunan ira' lepek mengelan pala' Allah ti, nyem ngan atai nem ya' laset, aken ngan tiga tawai keba'an daau kadep Allah ti. Nyem ngan kimet ya' ja'at, aken ngan gayeng ya' tangen. ³ Nyem ufa jadi tuen usun ire, aken petula' na' ketu' puyan ra tiga apan ra baya' a. ⁴ Buk Gembala Ya' Empau ti nai o, ikam ke ala' mahkota ya' ence tai kuko. ⁵ Nginye pa'am kelunan-kelunan ira' muat, tunuk na pala' tu'a-tua' nem. Menena' na pala' ikam serepe' apan, ufanna: "Allah ti menyakat kelunan ira' bang ke pempau ngaran ra, aken Iye leseu kelunan ira' selima'." ⁶ Neng a mengiti, pelibe' na use nem neng enta' usu' Tuhan ti, apana pempau ikam neng tuken ya' un dalem kadep-A. ⁷ Bara' na pala' Iye, ketu' ineu ya' uyai ikam tai i'ot atai, ufanna Iye ya' petubo ikam. ⁸ Tage' ngan jaga' na lemuto! Balei ja'at ya' kua ngan lencau iti, bang nuyau nia, ufa' ke den kelunan ira' iye sinteng menyelu'. ⁹ Ikam sinteng menyakat iye ngan iman ya' teneng, ufanna ikam lepek tisen, mung senganak lu ko sukung usun tana' ni siu' penuyen ira' menginye. ¹⁰ Allah ti ya' sangan ngan pengelesau, ya' lepek bai ikam dalem Kristus pala' kemuliaan-A ya' ence un tai mo'o, Iye tia' ke mebo' ikam, pedeng ngan puat atai nem, seng kasan nem siu penuyen. ¹¹ Iye ya' un kuasa ya' ence tai deram. ¹² Sedingan Silwanus ti, senganak e, ya' aki mengenal daau isiu a, aki menyurat pala' ikam, ufa' ke bara' katuk ngan puat atai nem, ini na pengelesai ya' atek lan na, ya lepek nai met Allah ti. Nengkedeng na ku dalem a! ¹³ Un tuyang nem met Babilon ni, na' salam mikam mung, ngan un pa salam met Markus, anak e ko ini. ¹⁴ Na' salam kume ira' se. Peniga urip met Allah ti un ngan ikam mung ira' lepek mengelan pala' Kristus. Amin.