¹ Met Petrus, Rasul Yesus Kristus, ku pala kelunan-kelunan ira nai, ngan pura ko Pontus, Galatia, Kapadokia, Asia, ngan Bitinia, ² yaiti kelunan-kelunan ya lepek menile, kuwa neng pengufa Allah, amai lu ti, ngan lepek muwi neng roh kudus, apana tunuk pada yesus kristus ngan ala bertit da”a Yesus Yristus. Apana pengelesau ngan tiga tawai nai sangan usun ikam. ³ Bangen tawai allah ngan amai amai tuhan yesus kristus, ya ufan tiga tawai ya ngan jau lepek menganak ileu peluwet met kena’a beti Yesus Kristus met neng a'ang kelunan matai, ko pa se’ urip ya sangan tegen pengufa lu, ⁴ ileu ka ala se’ urip ya nce senteng tai taru, ya nce senteng jaat ngan nce senteng koko, ya ye pedemon ko surga ti kume ikam, ⁵ yaiti ikam, ye petubo dalem pengayeng Allah ufan pengelan nem sengkasan nem pekena keselamatan ya lepek un ya Ye ka bara neng tai ko’o uman ini (akhir zaman). ⁶ Bangen tawai na usun ira iti, ineu pia nak kini ikam danie ka asitawai ufana kadu pengesek. ⁷ Neng ketu dete puyan ira iti ka bara dete lan pengelan nem ya su’ ngan empau dite ya neng o emas ya ko usun tana ni, ya ileu ke den peniga a ngan apui, apana ikam ka un ngaran tiga ngan peniga, daleu tuken Yesus Kristus ti ke bara use Ya. ⁸ Na pa’am ence un dite Ye’, nye’ nem lesau Ye’ ta. Ikam mengelan pala Ye’, nu’ pa’am ence mena’at Iye’. Ikam bangen neng usun dite peniga tawai ya’ ja’au, ya’ ileu ence sinteng ka pisiu’, ⁹ ufana ikam lepek pafie neng pengelan nem, yaiti keselamatan beruwe nem. ¹⁰ Keselamatan iti ya lepek pedekep ngan pesiu met nabi-nabi, ya lepek nebara dite pengelesau ya lepek nai pala ikam. ¹¹ Ngan pele’ e ire lepek pekelung ya empei ngan mengempei pengufa ya ire ka kume’ soon Roh Kristus ya un dalem ire, yaiti Roh ya’ met kena nai bara’ isiu met ketu penuyen ya ka pelepuk Kristus ti ngan ketu peniga ya kenai lepek iti. ¹² Kume’ ire lepek tula’, ufanna empei ra pegayeng kume use’ ra tengen un, aken bang ka pegayeng kume ikam neng usun dite ketu’ isiu ya’ lepek nai pala’ ikam na’ kini. Roh Kudus ti ya lepek nai met sorga, tai so’on ire nai bara’ isiu ya’ tiga kume ikam, yaiti isiu ya’ malaikat-malaikat biti ufa ke tisen. ¹³ Dalem a mengiti, petenup kimet penawai nem, jikit na ngan pelek na ketu’ tebelom nem neng usun pengelesau ya’ Ye mencai pala’ ikam ngan daleu Yesus Kristus petula Ye’. ¹⁴ Murip na ku kebaan anak-anak ya’ tunuk ngan nyem tai baya pengufa’ nem ya’ ngkang ikam daleu ketai nem murip ngan puyan mabi nem da, ¹⁵ masa tiga naam menuken neng urip nem ya’ bue’, ku’ kebaan dite Iye ya lepek bai ikam, ¹⁶ ufana un un neng surat: Ngebuwe use nem, ufana Aki buwe’. ¹⁷ Buk ikam bai ye Amai, yaiti Ye’ ya ence menile’ penyilung kelunan, ke mukum mung dulu neng usun puyan ra, buk mengiti, tiga na’am murip dalem penuken nem sengkasan ko usun tana ni. ¹⁸ Nye na’am tisen, ufanna ikam lepek ditebus met urip nem ya’ ence sepu’un, ya ikam menuken met sepun nem mena’a’. Empei ngan ineu ya ketai lenyo un, ngan plee empei ngan perak ngiri ta emas. ¹⁹ Aken ngan da’a Kristus ti ya maan, kua’ kubaan da’a anak domba ya nce un penyala’ ngan kepe’. ²⁰ Amai ti lepek menile’ Iye neng kena un tana ni, na’ kini lu A nai bara use A pala’ ikam neng ketai ko’o usun tana’ ni. ²¹ Met Iye ta ikam nai mengelan pala’ Allah, ya lepek pebeti’ Iye neng aang kelunan matai ngan lepak pempau Iye, apana pengelan ngan tebelom nem bang un pala Allah ti. ²² Ufana ikam lepek mui’ use nem neng dite pengufa nem nai tunuk pala katuk ya lan (kebenaran), nga ta’am senteng bara’ pengelesau ya’ lan neng ata ikam panak, tiga na’am lan-lan bara’ dite pengelesau itu ngan ketu’ atai nem neng ikam selepe apan. ²³ Ufana ikam lepek nai murip peluwet, empei so’on ineu ya’ melai ketai lenyo un, aken met beni’ ya’ ence sinteng tai lenyo, yaiti met isiu Tuhan ya murib ngan ence sinteng tai matai. ²⁴ Ufana mung ya’ murib kebaan dite ureu da ngan ketu’ peniga a kebaan sapuk ureu da, ureu tai mengkang, ngan sapuk tai labu, ²⁵ aken isiu Tuhan ti un seng kasan urip ya ence tai matai (kekal). Ini na isiu Tuhan ya lepek nai pala ikam.