¹ Dari Yudas palayan Yesus Kristus dahan samadikan Yakobus, agan sia nya dipilih dahan dikasihai Allah Bapa, dahan nya diplihara akai Yesus Kristus. ² Semoga belas kasih, damai sejahtera, dahan kasih malimpah akai kolai. ³ Bala Samadikan nya kukasihai, samantara aku bausaha koras manulis akai kolai mangonaai kaslamatan kita sasama, aku maasa perlu manulis akai kolai dahan mohon kolai bajuang bonar-bonar akai iman nya disampaian sakali akai salamanya ka bala urang kudus. ⁴ Sobab, bala urang tatontu jadi manyusup ntah disadarai, inyanam sia nya dari holu tai jadi ditontuan akai dihukum, bala urang ntah baiman manyalahgunaan anugerah Allah kita akai mamuasan nafsu dahan manulak satu-satunya panguasa dahan Tuhan kita, Yesus Kristus. ⁵ Aku hona maingatan kolai biar pan kolai jadi tahuam saponuhnya, obai Tuhan jadi manyalamatan umat-Nya agan mangaluaran sia dari tanah Mesir, tapi jadi inyan Inya mambinasaan sia nya ntah percaya. ⁶ Dahan, bala malaikat nya ntah patuh agan bala batas kakuasaan sia, ongka maningalan tompat sia badiap,jadi Inya kobat agan rantai abadi dalam kagolapan nya maha golap akai panghakipan pas ari bosar nona. ⁷ Uba inyan jam Sodom agan Gomora dahan bala kota disakilingnya, nya mamuasan diri dalam dosa seksual dahan manyasah nafsu ntah wajar, jadi manangung hukupan api kekal sabagai contoh. ⁸ Uba inyan jam bala urang ini, maandalan bala mimpi sia, mengotorai tubuh, manulak kakuasaan, dahan mahina samua jolu nya mulia. ⁹ Mikhael ja,nya sang panghulu malaikat, waktu kalahi agan Setan mangonaai mayat Musa, ntah barani mangaluaran bala kata hujatan ka inya, tapi baya bapanir, "Mudah-mudahan Tuhan ngagodiai kolai!" ¹⁰ Tapi, bala panyosat ini mahujat bala jolu nya ntah sia katahuai, nya baya sia katahuai badasaran naluri, uba binatang nya ntah ada akalnya. Obai bala jolu iniam sia pacaan dihancuran. ¹¹ Calaka tiam sia ni! Sia ni nyurutan jalan nya dititi Kain, dahan baambisi manyasah kasalahan nya dilabuhan Bileam, lalu binasa obai mambarontak uba Korah. ¹² Sia ni uba noda dalam perjamuan kasih kolai, nya malahap makatan agan kolai ntah Ada asa gola, baya maurus diri siku ma. Sia uba awan nya ntah mambaba hujan, nya ditiup angin ka koyan ka koni. Sia ni uba bala kayu nya ntah babuah padahal musim nyam, mati dua kali, dahan dicabut agan bala akarnya. ¹³ Sia uba galumang laut nya ganas, nya babuihan kahinaan sia siku. Sia uba bala binatang nya pamparoyapan, nya akai sia kagolap'an nya potang kabut nya jadi disadiaan akai salamanya. ¹⁴ Dahan mangonaai bala urang ini am Henokh, katurutan katujuh dari Adam, bernubuat, "Tiat am, Tuhan datang sasama agan baribu-ribu urang kudus-Nya, ¹⁵ Akai manjalatan panghakipan akai samua urang; mahukum samua urang fasik obai samua kalakuan fasik nya sia labuhan agan cara nya fasik, dahan akai samua pamaniran kasar nya jadi dikaluaran bala urang badosa nya fasik agan Allah." ¹⁶ Sia nan bala urang nya gala mangeluh, mangoyap kasalahan, dahan manurutai hawa nafsu sia siku; sia banyawa bosar dahan manjilat urang bukai akai dapat kauntukan. ¹⁷ Bala samadikan nya kukasihai, kolai harus maingat apa kata bala rasul Tuhan kita, Yesus Kristus. ¹⁸ Sia jadi bapanir agan kolai, "Pas zaman ahir, pacaan ada para pancamooh nya baya manurutai nafsu sia nya fasik." ¹⁹ Sia nan bala urang nya manyobaban papocahan, manurutai nafsu duniawi, dahan tidak ada Rohnya. ²⁰ Tapi, kolai, bala samadikan nya kukasihai, bangun tam diri kolai agan iman kolai nya maha suci dahan badoa dalam Roh Kudus. ²¹ Pelihara tam diri kolai dalam kasih Allah kaping manantian rahmat Tuhan kita, Yesus Kristus, nya mairikan ka hidupnya kekal. ²² Bamurah hati tam akai sia nya ragu-ragu nan. ²³ Slamatan tam urang bukai agan marobut sia dari api. Agan nya bukai, tunyuan tam belas kasihan disarotaai asa gola, agan boncian pakaian nya sia comarai hawa nafsu duniawi. ²⁴ Bagi Inya, nya bakuasa manjaga kolai akai ntah jatu dahan mahadiran kolai ntah ada cacat di hadapan takhta kamuliaan-Nya agan sukacita bosar. ²⁵ Akai satu-satunya Allah, Juru Slamat kita malaluai Kristus Yesus, Tuhan kita, kamuliaan, kaagungan, kakuatan, dahan kuasa sapanyang masa: daholu tai, dahan inini, sampai salama-lamanya. Amin.