¹ Inini mangonaai pangumpulan duit akai bala urang kudus, labuhan tam sasuai agan bala patunyuk nya aku konyu ka jemaat di Galatia. ² Di ari pertama satiap minggu, tiap-tiap kolai manyisihan jolu dahan manyimpannya sasuai nya kolai pangulihan supaya jangan pas aku datang horu diadaan pangunpulan. ³ Pas aku datang, aku pacaan mautus siaan, sopa pan nya kolai satujuai, disarotaai agan bala surat akai mambaba pangonyu kolai ka Yerusalem. ⁴ Dahan, kapan perlu aku pan hingkas jam, siaan pacaan hingkas sasama agan aku. ⁵ Tapi, aku pacaan datang ka kolai, nanti aku jadi malaluai Makedonia. ⁶ Dahan, mungkin aku pacaan diap di hunin atau mahabisan waktu samanah musim colap supaya kolai dapat manamahaiku dalam pajalatanku, ka muna pan aku hingkas. ⁷ Sobab, aku tidak hona maniat kolai inini baya sapintas lalu. Aku baharap diap agan hunin babaropa waktu, amun Tuhan maizitan. ⁸ Tapi, aku pacaan diap di Efesus sampai ari Pentakosta, ⁹ obai pintu nya lebar akai mangarojaan pakarojaan nya penting jadi tabuka bagi aku sakali pan banyak nya manentang. ¹⁰ Inini, amun Timotus datang, perhatian tam akai inya ntah maasa gola waktu sasama agan kolai obai inya malabuhan pakarojaan Tuhan, sama uba aku jam. ¹¹ Jadi, jangan sampai ada urang nya mamandangnya rendah. Tamahainya dalam pajalatannya agan damai akai inya dapat babali ka aku lagi. Aku mananti inya sasama agan bala samadikan di sini. ¹² Inini, mangonaai samadikan kita Apolos, aku maha mamosanya akai manatakai hunin sasama bala samadikan nya bukai, tapi inya sama sakali ntah hona datang inini. Tapi inya pacaan datang ma amun ada kasompatan. ¹³ Hati-hati tam, badiri teguh tam dalam iman. Dahan Batinak tam uba lalaki dahan jadi tam nya kuat. ¹⁴ Kahonanya samua nya kolai krojaan, dilabuhan dalam kasih. ¹⁵ Aku mandesak kolai Bala samadikanku, [kolai pan tahu ma bahawa saluruh isi rumah Stefanus inyanan bala buah pertama di Akhaya, dahan sia jadi mangabdian diri sia akai palayan bala urang kudus], ¹⁶ supaya kolai pan tunuk agan bala urang uba ini dahan agan satiap urang nya bakroja sama dahan bajorih payah. ¹⁷ Aku bersukacita atas kadatakan Stefanus, Fortunatus, dahan Akhaikus obai sia jadi malengkapai apa nya kurang dari hunin. ¹⁸ Sobab, sia manyegaran rohku dahan roh kolai. Karna inyan, hargaai tam bala urang nya uba inyani. ¹⁹ Bala jemaat di Asia manyampaian salam akai hunin. Akwila dahan Priskila manyampaian salam hangat dalam Tuhan akai hunin, sasama agan jemaat di rumah sia. ²⁰ Samua samadikan di sini mangirim salam akai hunun. Ucap'an salam siku agan nya bukai nya agan ciupan kudus. ²¹ Aku, Paulus, manulis salam ini agan tanganku siku. ²² Amun ada urang nya ntah mangasihai Tuhan, terkutuk tam inya. Oy Tuhan, datang tam! ²³ Anugrah Tuhan Yesus manyarotaai kolai. ²⁴ Kasihku manyarotaai hunin samua dalam Yesus kristus. Amin .