¹ Sasah tam kasih dahan kahonaai tam agan bonar-bonar bala karunia rohani, terutama akai kolai dapat banubuat. ² Sobab, sopa nya bapanir dalam bahasa lidah, ntah bapanira agan mansia, tapi ka Allah; obai ntah ada urang nya mangaroti, tapi inya mangataan bala jolu nya rahasia dala roh. ³ Tapi, urang nya banubuat bapanir ka mansia akai mambangun, nasehat, dahan penghiburan. ⁴ Bala urang nya bapanir dalam bahasa lidah mambangun dirinya sendiri, tapi urang nya banubuat mambangun jemaat. ⁵ Harapanku kolai samua bapanir dalam bahasa-bahasa lidah, tapi talobih lagi supaya kolai banubuat. Urang nya banubuat lobih bosar daripada urang nya bapanir dalam bahasa lidah, kacuali amun inya maartiannya sampai jemaat dapat manarima paneguhan. ⁶ Bala samadikan, amun aku datang ka kolai dan bapanir dalam bala bahasa roh, apa untungnya akai kolai, kacuali amun aku bapanir ka kolai agan pernyataan, pangatahuan, nubuatan, atau pangajaran? ⁷ Bahkan, bala jolu nya ntah banyawa, uba suling atau kacapi nya mangaluaran bunyi, amun ntah mangaluaran perbedaan dalam bunyinya, uba apa urang dapat mangatahuai alat apa nya tongahan dimainan, suling atau kacapi? ⁸ Atau, trompet mangaluaran suara nya ntah jelas, sopa nya pacaan mempersiapan diri akai baprang? ⁹ Uba inyan jam kolai. Amun agan lidah kolai, kolai mangataan kata-kata nya ntah dapat dimangerti, uba apa urang tahu apa nya dikataan? Saolah-olah kolai bapanir agan angin. ¹⁰ Mungkin, maha banyak jenis bahasa di dunia dahan ntah satu pan dari bahasa inyan nya ntah bamakna. ¹¹ Tapi, amun aku ntah tahu arti bahasa inyan, aku pacaan nyadi urang asing bagi urang nya bapanir, dahan urang nya bapanir inyan nyadi urang asing bagiku. ¹² Uba inyan jam kolai, obai kolai bausaha bonar-bonar akai bala karunia rohani, usahaan tam supaya bakalimpahan akai mambangun jemaat. ¹³ Obai inyan, kahonanya urang nya bapanir agan bahasa lidah badoa supaya inya dapat maartiannya. ¹⁴ Sobab, amun aku badoa dalam bahasa lidah, rohku badoa, tapi pikiranku ntah babuah. ¹⁵ Jadi, apa nya harus aku labuhan? Aku pacaan badoa agan rohku dahan aku pan pacaan badoa agan pikiranku. Aku pacaan manyanyi agan rohku dahan aku pan pacaan manyanyi agan pikiranku. ¹⁶ Amun aku baya maucap syukur agan roh kolai, uba apa agan urang, nya ada dalam posisi ntah ada karunia inyan, dapat bakata, "Amin," agan ucapan syukur kolai inyan obai inya ntah mangerti apa nya kolai kataan? ¹⁷ Biarpan kilai maucap syukur dengan baik, tapi urang bukai ntah dibangun. ¹⁸ Aku basyukur agan Allah bahwa aku bapanir dalam bala bahasa lidah lobih dari hunin samuanya. ¹⁹ Tapi, dalam jemaat, aku lobih baik bapanir lima kata agan pikiranku supaya aku pan dapat mangajar urang bukai, daripada sapuluh ribu kata dalam bahasa lidah. ²⁰ Bala samadikan jangan nyadi bala biak dalam pikiran kolai. Nyadi bala bayi tam dala kajahaian, tapi dalam pamikiran kolai nyadi nya dewasa! ²¹ Uba tatulis dalam Hukum Taurat, "Obai bala urang nya ada bahasa asing dahan obai nyawa bala urang asing, Aku pacaan bapanir agan bangsa ini, tapi sia pacaan ntah maningaan Aku, firman Tuhan. ²² Jadi, bala bahasa lidah inyanan tana, bilanya akai urang nya percaya, tapi akai urang nya ntah percaya, sodakan banubuat inyanan tana, bilanya akai urang nya ntah percaya. ²³ Amun samua jemaat bakumpul sasama dalam sabuah tompat, dahan samuanya bapanir dalam bahasa lidah, lalu ada bala urang nya ntah mangerti atau bala urang ntah percaya mansuk, tidak bi sia mangataan bahawa kolai ni gilaam? ²⁴ Tapi, amun samuanya banubuat, jadi inyan ada urang nya ntah percaya atau urang nya ntah mangerti mansuk, inya pacaan disadaran agan samuanya dahan dinilai agan samuanya. ²⁵ Rahasia dalam hatinya pacaan nyata, inya pacaan takasungkam, manyomah Allah, mangakuai bahawa sabonarnya Allah ada di antara hunin. ²⁶ Jadi, salanyutnya uba apa, Bala samadikan? Waktu kolai bakumpul, masing-masing ada mazmur, pangajaran, panyataan, bahasa lidah, atau sabuah panafsiran. Kahonanya samua ini dilabuhan akai mambangun. ²⁷ Amun ada urang nya babahasa lidah, kahonanya baya dua atau paling banyak banyak tiga urang, dahan masing-masing bagiliran, dahan harus ada urang bukai nya maartiannya, inya harus diap dalam jemaat dahan kahonanya inya bapanir agan dirinya siku dan agan Allah. ²⁹ Kahonanya baya dua atau tiga nabi nya bapanir dahan nya bukai mampertimakannya. ³⁰ Tapi, amun panyataan dijawat akai urang bukai nya duduk di sian, urang nya pertama harus diam. ³¹ Sobab, kolai samua dapat banubuat satu demi satu, supaya samuanya dapat balajar dahan samuanya dapat dikuatan. ³² Roh-roh para nabi tunuk agan para nabi. ³³ Sobab,Allah bukainya Allah dari kakacauan, tapi damai sejahtra, sama uba dalam samua jemaat bala urang kudus. ³⁴ Batina harus totap diap dala jemaat obai sia ntah diizitan akai bapanir, tapi harus tunuk ubanya dikataan Hukum Taurat. ³⁵ Amun ada nya hona sia palajarai, kahonanya sia batanya agan lakinya di rumah obai inyanan jolu nya mamaluan bagi batina akai bapanir dalam jemaat. ³⁶ Apa firman Allah baasal dari kolai? Atau, apa baya pakai kolai ma firman inyan disampaian? ³⁷ Amun ada nya bapikir bahawa inyanan nabi jam atau urang nya rohani, kahonanya inya mangenalai bahawa bala jolu nya aku tulis akai kolai inyanan printah Tuhan. ³⁸ Amun ada urang nya ntah mangenalai ini, inya ntah dikenal. ³⁹ Jadi, Bala samadikanku, usahaan bonar-bonar tam akai banubuat, dahan jangan malarang urang bapanir dalam bala bahasa lidah. ⁴⁰ Tapi, samuanya harus dilabuhan agan sopan dahan taatur.