¹ Jadi apo utan te kok dipadah Abraham, apak leluhur kito nurut dagin? ² Ute bilo Abraham dibenar ngelalu pempulah neh, neh mpu alasan ngau bermegah, tapi ndo dimuo Allah. ³ Kebok apo te dipadah uleh Kitab Suci? "Abraham pecayok ngau Tuhan serto Tuhan ngitu hal yok ngau neh upo te benar." ⁴ Ngau ura te kerjo, upah te diberik ngau sidok bukan hadiah, tapi hak sidok. ⁵ Tapi, ngau ura te endo kerjo, tapi pecayok ngau Allah te menar ura fasik, iman sidok diperito upo utan te benar. ⁶ Upo Daud madah bahagio ura te dibenar uleh Allah tapi ndo mantau macam hal te udah neh pulah: ⁷ "Sunguh bahagio ura te diampun penyalahneh tamai te ditutup duso-dusoneh. ⁸ Sunguh bahagio ura te bangat duso tapi ndo diperito uleh Tuhan!" ⁹ Apo berkat tuk ngau ura te besunat? atau gok ngau ura te ndo besunat? Kebok kami udah madah utan "Iman Abraham diito ngau te benar." ¹⁰ Lalu, upo keti utan yok diperito ngau neh? seapan atau seudah neh disunat? Bukan seudah neh disunar tapi seapan neh disunat. ¹¹ Tano sunat yok diterimok neh sebagai meterai te benar uleh iman seapan neh besunat isok neh tauk jadi apak ngau semuo ura te pecayok ndo besunat sampai te benar yok diperito ngau sidok; ¹² piyok gok jadi apak ngau ura-ura besunat te ndo besunat geno tapi bejalai dalam jalai iman te suah dipansok uleh apak kito, Abraham, seapan neh disunat. ¹³ Janyi ngau Abraham tamai ngau keturun neh anti'k sidok mpu seluruh bumi ndo dipenuh ngelalu Hukum Taurat, tapi ngelalu iman te benar. ¹⁴ Kebok, bilo sidok te berasal re Hukum Taurat tauk jadi mpu waris, iman jadi pecumo serto janyi Allah dibatal; ¹⁵ sebab Hukum Taurat natai ke peluat, tapi antik ndo bisik Hukum Taurat, diok gok ndo bisik te ngelangar. ¹⁶ Tuk am ngapo janyi tuk berasal re iman, isok janyi yok bisi'k dasar kasih karunio sampai janyi yok datai ngau seluruh keturun Abraham; bukan geno te berasal re Ukum Taurat, tapi gok te berasal re iman Abraham, apak kito semuo, ¹⁷ (upo te di tulis, "Aku udah nyadi ke ikam, apak ngau bangat banso") di muo Allah, te neh pecayok, yok neh Allah te merik pengidup ngau ura mati tamai te nyebut semuo utan te apan bisik jadi bisik. ¹⁸ Dalam pengarap di atau te diarap neh pecayok, sampai neh tauk jadi apak re bangat banso upo te udah dipadah, "Sajo piok am bangat keturun ikam." ¹⁹ Imanneh ndo jadi lemah, sekironeh ketauk tubuhneh kedirik ampir mati ute umurneh kiro-kiro 100 taun serto perut Sara gok udah ketutup; ²⁰ neh endo ragu ngau janyi Allah uleh ndo pecayok. Sebalekneh, imanneh dikuat sampai neh merik te mulio nguso Allah, ²¹ serto ngeraso yakin antik Allah bekuaso ngelaku apo te udah dijanyi-Neh. ²² Ute yok am, imanneh "diperito arus jadi te benar." ²³ Tapi, utan yok ndo ditulis ngau kepentin Abraham geno, ²⁴ tapi ngau kito gok. Hal yok diperito ngau sidok te pecayok ngau Neh te ngemangkit Yesus, Tuhan kito, re sentaro ura mati. ²⁵ Yok am, Yesus te udah diserah uleh penyalah tamai duso kito, isok kito tauk dibenar di muo Tuhan.