¹ Paulus, hamba ² te udah Allah janyi seapan yok ngelalu nabi-nabi Neh enta Kitab Suci ³ tenta anak Neh te nurut dagin diperanak re keturun Daud, ⁴ Te udah di nyato ngau Anak Allah te bekuaso ngelalu pemangkit re sentaro ura mati nurut Roh kudus, yok am Kristus Yesus, Tuhan kito. ⁵ Ngelalu neh, kami nerimok pemerik tamai perangkat rasul ngau ngemaik te taat iman di tengah semuo banso bukan Yahudi demi damo-Neh, ⁶ termasuk kitak te dikumai jadi empu Kristus Yesus. ⁷ Ngau kitak semuo te bisi'k di Roma, te dikaseh Allah, te di kumai ngau jadi ura-ura kudus : kasih karunio serto damai sejahtero bagi kitak re Allah, Apak kito, re Tuhan Yesus Kristus! ⁸ Pertamo-tamo, aku bersyukur ngau Allahku ngelalu Kristus Yesus ngau kitak semuo ute iman kitak udah dipadah ke seluruh dunio. ⁹ Allah te aku layan ngau rohku dalam Injil Anak Neh, jadi saksi aku ute aku endo suah berenti ngingat kitak semuo; ¹⁰ dalam du'o aku, aku seruntik mohon isok sekironeh pituk, uleh kemau'k Allah, udah yok aku berasil ngunyo kitak. ¹¹ Aku nyan benar betemu ngau kitak isok aku tauk merik karunio rohani ngau nguat ke kitak, ¹² Yokneh isok kito tauk dikuat bersamo-samo ulih iman kedirik, baek iman kitak atau gok iman aku. ¹³ Balo-menyanak, aku mau'k kitak ketauk ute aku udah bekalik-kalik bisi'k rencano nguso kitak, tapi bisi'k te ngala sampai pituk, isok aku tauk gok nuai asil panen re sentaro kitak upo re sentaro banso-banso bukan Yahudi te lain. ¹⁴ Aku beruta ngau ura Yunani tamai ura barbar, ngau te berhikmat tamai ngau te budu. ¹⁵ ute nyok am aku sanagat mau'k benar madah Injil ngau kitak te adai di Roma. ¹⁶ Aku endo malu ulih Injil, ute Injil yok kuaso Allah ngau nyelamat tiap ura te pecayok; pertamo ngau ura Yahudi, udah yok ngau ura Yunani. ¹⁷ kebok di dalamneh tebenar dinyato ulih Allah re iman ngau iman, upo ado te ditulis: "Ura benar tentuidup ulih Iman." ¹⁸ Kebok, keluat Allah di nyato re surgo ngau semuo duso tamai mensio te jai'i te nekan tebenar ngau pempulah tejai'i ulih sidok. ¹⁹ Ute nyok, apo te tauk diketauk ulih Allah udah jelas bagi sidok ute Allah udah nunyuk ngau sidok. ²⁰ Watu dunio dipulah, sifat-sifat Allah te endo tauk dipantau, kuaso Neh te kekal tamai keilahian Neh, udah di pantau jelas ngau dingerti ngelalu hal-hal te Neh pulah sampai sidok endo tauk bedalih. ²¹ Tapi,sidok ngelalo Allah tapi sidok endo hormat ngau Neh sebagai Allah atau besukur ngau Neh; malah pemikir sidok jadi endo beguno tamai ati sidok te budu jadi keleman. ²² Sidok nganggap dirik numut tapi sangat budu, ²³ serto nukar kemulio Allah te endo kutur ngau utan te begamar. ²⁴ ute yok, Allah nyerah sidok ngau te dimau'k ati sidok te kok nyemar sampai sidok ngeruh tubuh sidok di sentaro sidok kedirik. ²⁵ Ute, sidok nukar kebenar Allah ngau pemulok,serto sujud tamai nyemah balo benata te dipulah, bukan nyemah Sang Pencipta te tepuji selamah-lamahneh. Amin! ²⁶ Kebok, Allah nyerah sidok ngau nafsu-nafsu te jai'i, ute betinok-betinok sidok nukar hubungan te wajar ngau hubungan te ndo wajar. ²⁷ Piyok gok te laki, sidok nudi ke hubungan te wajar ngau betinok, tapi benafsu sikuk ngau te lain; te laki tamai te laki mulah pempulah te mulah malu; serto di dalam tubuh sidok kedirik, sidok nerimok ukum uleh duso-duso sidok. ²⁸ Ute sidok ngai ngakuk Allah bisi'k pengetauk re sidok, kebok Allah nyerah sidok ngau pemikir te jai'i sampai sidok ngelaku hal-hal te endo searusneh sidok pulah. ²⁹ Sidok dipenuh ngau segalo macam te endo benar, pempulah jai, rangkok, serto bencik; penuh ngau iri ati, munuh, bekelai, ngemulok, dengki; sidok yok pengampur, ³⁰ ngumung ura, bencik ngau Allah, kasar, sumung, besai mulut, penemu pempulah jai'i, endo nurut ngau ura tuo, ³¹ budu, endo setio, endo empu peraso, tamai kejam. ³² Sekalik sidok ketauk peratur Allah te madah anti'k ura te mulah hal-hal semacam yok pantas mati, sidok bukan genno ngelakuneh, tapi nuko ura-ura te ngelaku utan hal-hal yok.