¹ Enam ari seapan ari Rayo Paska, Yesus angkat ke Betania, tempat Lazarus nungau, ura te dibangkit keh Neh. ² Din, ado acaro makai malam ngau Yesus, Marta te ngelayanan neh, sura te makai semejo namai Yesus nyok Lazarus. ³ Udah nyok, Maria ngamik setengah kati minyak wangi murni te mahal hego neh, lalu ngeminyak kaki Yesus udah nyok ngering neh ngau ramut, rumah nyok pun dipnuh bau wangi minyak nyok. ⁴ Tapi, Yudas Iskariot, sura dintaro murid Yesus te kok nyerah Yesus, ngumung, ⁵ "Ngapo minyak wangi nyok nado dijual geno hego neh tigo ratos dinar lalu duit neh berik ke ura-ura miskin?" ⁶ Neh ngumung piok bukai empadai neh peduli ngai ura miskin, tapi empadai neh nyok pencuri kerno biaso ngamik duit te biaso ditamok ura kedalam kotak te dipegai neh. ⁷ Udah nyok Yesus nyawab te diumung Yudas, "Isok neh mulah utai nyok ngau pesiapan ngau ngubur-ku. ⁸ Kerno, ura miskin selalu ado tamai kitak, tapi Aku ndo selalu ado tamai kitak." ⁹ Watu bangat ura Yahudi mening kalau Yesus ado di Betania, sidok angkat kin bukan hanyo ado Yesus tapi ugok kok mantau Lazarus te udah dibangkit ke Yesus dari pemati. ¹⁰ Udah nyok, imam-imam kepalo mulah rencano ngau munuh Lazarus ugok. ¹¹ Empadai Lazarus bangat ura Yahudi nudi kesidok lalu pecayok ke Yesus. ¹² Pagi ari piok, bangat ura te datai ke pesta nyok, watu mening Yesus kok datai ke Yerusalem, ¹³ sidok ngamik daun palem udah nyok angkat keluar ngau nyamut Neh samil berseru, "Hosana! Diberkati Neh te datai dalam namo Tuhan, Rajo Israel!" ¹⁴ Yesus nemu sikuk kedelai mudok, lalu duduk diatau neh, bako te ditulis : ¹⁵ "Nusah takut, ui kebalo betinok Sion! Pantau em! Rajo kitak datai duduk diatau sikuk kedelai mudok." ¹⁶ Mulo neh, Murid- murid Yesus nado ngerti semuo utai nyok, tapi watu Yesus dimulio sidok udik ngerti kalau semuo te ditulis tenta Neh, lalu ngerti kalau sidok mulah semuo te udah ngau Neh. ¹⁷ Jadi piok, ura-ura te namai yesus watu Neh ngumai Lazarus keluar dari kubur lalu mangkit keh neh dari pemati trus becerito. ¹⁸ Empadai nyok, bangat ura te nyamut Yesus kerno sidok mening kalau Neh nyok te udah mulah tando ajaib. ¹⁹ Kebok mek, ura-ura Farisi ngumung sura ngau te lain, "Ikam pantau, apo te direncano kito nado behasil. Pantau mek, semuo dunio udah nurut Neh!" ²⁰ Pado watu nyok, ado ugok ura-ura Yahudi di ntaro sidok te angkat semaya pado ari rayo nyok. ²¹ Kebalo sidok nguso Filipus te asal neh dari Betsaida nta Galilea , lalu ngumung keneh, "Tuan kami kok betemu ngau Yesus." ²² Filipus angkat ngau madah Andreas; udah nyok Andreas seduo Filipus angat ngau madah Yesus. ²³ Yesus nyawab seduo, "Watu tuk udah datai Anak Mensio ngau dimulio keh. ²⁴ sunguh, Aku madah kitak, kecuali igik ganum jatuk ketanah lalu mati, igik nyok tetap sutik em; tapi kalau igik nyok mati, neh nyok bangat bebuah ²⁵ Ura te cinto nyawo neh, pasti ayap nyawo neh, tapi ura te ndo saya ke nyawo neh didunia tuk, pasti meliaro neh ngau idup kekal. ²⁶ ura te ngelayan Aku, neh arus nurut Aku; dini aku ado, diok ugok bisik pelayan ku; ura te ngelayan Aku, Bapa merik hurmat ke neh." ²⁷ "saat tuk, jiwo ku nado tena. Apo te arus ku umung? 'Bapa selamat keh Aku dari tuk?' Tapi, ngau tujuan tuk em Aku datai pituk. ²⁸ Bapa, mulio keh nama Nuan!" udah nyok te pening suaro dari surgo, "Aku udah memulio nama-ku, lalu aku ngemulio keh neh agik." ²⁹ Bangat ura te bediri diok ningo suaro nyok lalu madah nyok suaro guntur, tapi te lain madah, "Sura malaikat dah ngumung ke -Neh!" ³⁰ Yesus nyawab sidok, "Suaro nyok te pening bukan ngau kepentin-Ku tapi ngau kepentin kitak. ³¹ Pituk em pengakiman ngau dunia tuk, watu tuk em penguaso dunia tuk kok diusir. ³² Udah nyok, kalau Aku ditingik dari dunia tuk, Aku kok narek ura ke Aku." ³³ Yesus ngumung piok ngau madah pemati neh keti caro Neh mati. ³⁴ Ura bangat nyok nyawab Yesus, "Kami udah mening nyok dari ukum Taurat kalau Kristus tetap tingal selamo lamo; kok tipo nuan ngumung bako nyok, 'Anak Mensio arus ditingik?' Lalu sapo Anak Mensio nyok?" ³⁵ Yesus nyawab sidok, "Nado lamok agik tera nyok ado tamai kitak. Bejalai mek selagi tera nyok ado isok keleman nado tau'k nguasa kitak; empadai ura te bejalai nta te keleman nado ketau'k neh kok kini. ³⁶ Watu kitak mpu tera nyok, pecayok mek ketera nyok isok kita jadi kebalo anak tera." Udah madah piok Yesus angkat udik napok kedirik dari sidok. ³⁷ Meskipun Yesus dah bangat mulah tando ajaib dimuo sidok, sidok tetap nado pecayok ke Neh, ³⁸ utai nyok isok ngenap ke apo te diumung Nabi Yesaya, "Tuhan, sapo te pecayok ke pemberitaan kami? Lalu nguso sapo jari Tuhan udah dinyatakan?" ³⁹ Empadai nyok, sidok nado tau'k pecayok kerno Yesaya ugok ngumung, ⁴⁰ "Neh udah ngemutok mato sidok udik ngeras ke ati sidok, isok sidok nusah mantau ngau mato sidok udik paham ngau ati sidok, lalu bekalih sehingo Aku ngentamo sidok." ⁴¹ Yesaya madah semuo tuk kerno neh udah mantau kemulian Yesus udik neh ngumung tenta Yesus. ⁴² Bangat ugok kebalo pemimpin te pecayok ke Yesus, tapi empadai takut ngau ura Farisi sidok nado ngumung trus tera isok nado dikucilkan. ⁴³ empadai, sidok lebih gago nerimok kemuliam dari mensio daripado kemulian Allah ⁴⁴ Udah nyok, Yesus beteriak, "Tiap ura te pecayok ke Aku, nado pecayok ke Aku, tapi ngau Neh te ngutus Aku. ⁴⁵ Udik, tiap ura te udah mantau Aku, udah mantau Neh te ngutus Aku ⁴⁶ Aku udah datai jadi tera kedunia tuk, isok tiap ura te pecayok ke Aku nado nungau nta keleman. ⁴⁷ Ura te mening pemadah Aku tapi neh ndo nurut, Aku ndo ngakim neh; empadai Aku datai bukan ngau ngakim dunia, tapi ngau nyelamat ke dunia. ⁴⁸ Sapo te nulak Aku udik nado nerimok pemadah-Ku, Firman te Aku padah nyok mek te ngakim ke neh pado ujo zaman. ⁴⁹ Kerno Aku nado ngumung ngau penekok-Ku, tapi empadai Bapa te ngutus Aku merik perintah ke apo te arus Aku padah lalu kuumung. ⁵⁰ Udik, Aku ketau'k kalau perintah Neh nyok mek idup kekal. Empadai, hal te udah Ku padah, Aku padah bako te udah dipadah Bapa nguso Aku."