¹ Salam dari Yakobus, pelayan Allah danYesus Kristus, ngau keduo belas suku te tesebar de seluruh dunio. ² Balo menyanak, angaplah ngau suatu sukacita antik kitak jatuk ke dalam berbagai pencobaan. ³ Sebab, kitak ketauk bahwa ujian ngau iman neh ngasil ketabahan ⁴ Biarlah ketabahan merik asil te penuh supayo kitak nyadi sempurna dan utuh, ndo sik kura apo-apo. ⁵ Tapi yok, antik de antaro kitak bisik te kura hikmat, tauklah neh mintok ngau Allah, te ngau murah ati merik ke semuo ura ndo mencelo, yok te kok de berik ngau neh. ⁶ Yoklah, neh arus mintok neh ngau iman te ndo bimbang kerno ura te bimbang adalah macam geluma laut, te de tiup angin kin kituk. ⁷ Ura macam yok nang lah ngiro kok nerimok sesuatu dari Tuhan. ⁸ Ura te menduo ati ndo akan tenang dalam semuo jalai hidup neh. ⁹ Biarlah menyadik te idop apo ado bangga saat neh de tinggik, ¹⁰ Ura kayo saat neh de tempatkan ngau keadaan te renah kerno macam bungo rumput, neh kok lenyap. ¹¹ Sebab, matoari terbit ngau panas neh te semakin terik, ngelayuk rumput, bungo neh gugur, keindahan neh pun lenyau. Demikian ugok, ura kayo akan lenyap de tengah-tengah usaho neh. ¹² De berkatilah ura te tabah dalam pencobaan kerno se udah neh tebukti tahan uji, neh akan nerimok mahkota kehidupan te de janjikan ngau te ngasih Neh. ¹³ Antik seura decobai, nanglah neh ngumung, ''Aku agik de cobai Allah.'' Sebab, Allah ndo tauk de cobai uleh si Jahat dan Yesus kedirik ndo mencobai sapo pun. ¹⁴ Tiap ura decubo saat neh desiret dan de pikat uleh keinginan neh kedirik. ¹⁵ Saat keinginan debuahi, neh akan beranak dosa dan saat dosa nyadi mansak, neh akan beranak ke maut. ¹⁶ Balo menyanak te aku kaseh, nang sesat. ¹⁷ Tiap pemerik te baek dan tiap pemerik te sempurna datai dari darat, deturun dari Bapa semuo tera, pada-Neh ndo bisik perubah atau penukar bayangan. ¹⁸ Ngau kehendak-Neh kedirik, Neh nyadikan kito Firman* tebenar agar kito nyadi buah petamo dari semuo ciptaan-Neh. ¹⁹ Balo menyanak te aku kaseh, pantau tuk: hendaklah tiap-tiap ura cepat ngau menin, tapi lubah ngau ngumung, dan lubah ngau ringat. ²⁰ Sebab, peringat mensio ndo ngerjo kebenaran Allah. ²¹ Kerno yok, buailah segalo ute ndo suci te bangat ute jai, lalu terimoklah ngau kelemahlembutan Firman Allah te udah de tanam de dalam kitak, te sangup nyelamat jiwo kitak. ²² Jadilah pelaku Firman dan bukan pemenin sajo; kalau ndo, kitak nipu dirik kedirik. ²³ Sebab, kalau ura menin Firman, tapi ndo nurut Firman yok, neh macam ura te agik mantau mo neh de cermin. ²⁴ Udah mantau dirik neh lalu turun, neh kelupo macam apo mo neh tadik. ²⁵ Namun ura te neliti ukom te sempurna, yoklah ukom te memerdekakan, betekun de dalam neh, neh ndo nyadi pemenin te kelupo, tapi njadi pelaku Firman. Neh akan de berkati ngau apo te de kerjo neh. ²⁶ Kalau seseura ngiro bahwa neh adalah ura te taat semaya, tapi neh ndo dapat mengendalikan lidah neh, neh nipu ati dirik neh. ketaatan neh yok sio-sio. ²⁷ Ibadah te murni dan ndo tercela de hadapan Allah dan Bapa kito adalah ngansau nebiak-nebiak te nisik inai apai agik dan balu-balu dalam pemedeh sidok, dan nyago dirik neh kedirik agar ndo de cemar uleh dunio