¹ Kebok aku mau'k, kitak ketauk sajo berat aku bejua keras ngau kitak, serto ngau sidok te bisi'k di Laodikia, serto ngau semuo ura te apan suah betemu ngau aku. ² Isok ati sidok te ibur serto sidok besatu dalam kasih sampai sidok empu semuo kekayo te berasal re pengerti tamai penauk re rasio Allah, yok em neh Kristus kedirik. ³ Enta Neh, belapok semuo reto re penumut tamai penauk. ⁴ Aku madah utan tuk isok endo bisi'k ura te mau'k nipu kitak serto bepadu di pednin jekuk neh beguno. ⁵ Meski tubuh aku endo bisi'k besamo kitak, tapi aku besamo kitak dalam roh, serto aku gago mantau kitak seati idup teratur te bae'k tamai iman kitak te kuat dalam Kristus ⁶ Jadi, kitak udah nerimok Yesus Kristus sebagai Tuhan kitak, iduplah selampur dalam Neh, ⁷ Arus beakar tamai pulah dirik kitak dalam Neh, di teguh benar iman kitak upo te udah di ajar ngau kitak, serto belimpah ruah ati kitak ngau ngucap syukur. ⁸ Ati-ati isok nang sampai bisi'k ura te mau'k nyebak kitak ngau ajar te pua tauk nyesat, te asal neh re budayo mensio tamai dasar roh dunio serto bukan ngau atur Kristus. ⁹ kebok, aro Neh nugau semuo te di penuh ilahi te idup dalam bentuk rago tubuh biaso. ¹⁰ Kitak udah de penuh de dalam-Neh, Neh yok kepalo re semuo petingi pemeritah tamai penguaso. ¹¹ Enta Neh, kitak udah de sunat, endo ngau sunat jari mensio, tapi ngau sunat te laku uleh Kristus, yok neh ngelecut tubuh dagin te beduso. ¹² Dalam baptis, kitak dikubo'r bereto ngau Kristus, Piyok gok dibangkit besamo-samo ngau Neh ngelalu iman kitak dalam kuaso Allah te mangkit Neh re sentaro ura mati. ¹³ Meski subok kitak mati dalam penyalah-penyalah kitak serto dalam kemau'k dagin kitak te endo besunat, Allah nyuruh kitak idup besamo-samo ngau Neh, te udah Neh ampun semuo penyalah kito. ¹⁴ Neh udah ngapus balo surat uta tamai atur te de tuntut serto ngaral ubo'u entaro Allah tamai kito. udah de amik-Neh serto di paku dedarat kayu salib. ¹⁵ Neh ngelepas balo petingi tamai penguaso, lalu nyuruh sidok de tuntun te mulah malu uleh Neh te menang de darat kayu salib. ¹⁶ Kebok piyok, nang ngisok seura pun ngakim kitak ngau utan te demakai tamai deminum atau ari rayo, perayo bulan baru atau ari sabat ¹⁷ Semuo yok bayangan genno ute hal-hal te kok datai, tapi gamar te asli yok neh Kristus. ¹⁸ Nusah ngisok ura te senang secaro ngerenah ati te palsu serto nyemah ngau balo malaikat te ngakim kitak. sidok yok ura-ura te mau'k ngau pemantau te hal khusus isok nyuruh pemikir sidok summo uleh penapat dunio. ¹⁹ Ura macam nyok endo bepegai teguh ngau kepalo. Kepalo yok te nupa semuo tubuh, serto semuo tubuh di sutik uleh urat-urat tamai bukuk-bukuk tula, semuonyok betumuh te berasal re Allah. ²⁰ Bilo kitak udah mati besamo ngau Kristus nudi atur pekaro dunio, ngapo kitak agik mikir pempulah dunio, tunuk ngau atur pekaro upo te dididah: ²¹ "Nusah nyeput, nusah ngaso, nusah enculit"? ²² Semuo atur nyok punas te udah nurut, ute atur pekaro yok de pulah jekuk ngau pemadah tamai ajar mensio. ²³ Atur upo yok de perati bangat penumut nampak kedirik rajin semaya te nuju pemikir dirik ngau renah ati te palsu serto nyiso tubuh dirik, semuo nyok endo sik guno, endo lebih ngau muas idup didunio.