¹ Paulus mantau Sanhedrin lalu ngumung, "Menyanak-menyanak, aku udah nyalai ke idup ngau ati te baik di depan Allah sampai ari tuk." ² Lalu, Imam Besai Ananias merintah ura-ura te bediri semak Paulus sok tauk nampar mulut Paulus. ³ Udah yok, Paulus ngumung ngau neh, "Allah te tauk nampar kitak, ui kitak dinen te dicat putih! Apo kitak dudok ngau ngakim aku nurut ke Hukum taurat, tapi ngelangar ukum yok ngau nyuruh sok aku ditampar?" ⁴ Ura-ura te bediri semak neh ngumung, "Apa ikam tuk ngina Imam Besar Allah?" ⁵ Lalu Paulus ngumung, "Aku ndo ketauk menyanak-menyanak, antik neh yok Imam Besai. Bisik tertulis, 'Ndo sah kitak ngumung te jai tenta seura pemimpin bangsa."' ⁶ Tapi, ketiko Paulus ketauk antik sebagi re sidok yok ura-ura Saduki, Paulus ngumung di dalam Sanhedrin, "Menyanak-menyanak, aku tuk am orang Farisi, anak ura Farisi. Aku tengah diakim mpadai pengarap tamai pemangkit ura mati!" ⁷ Ketiko Paulus madah hal tuk, bepadu mulut antaro ura-ura Farisi tamai ura-ura Saduki, tebagi-bagi ura bangat yok. ⁸ Kereno ura-ura Saduki madah antik ndo sik pemangkit, ndo sik malaikat tamai roh, tapi ura-ura Farisi ngakuk yok semuo. ⁹ Terjadi keributan te besai, beberapo ahli Taurat re kerumun Farisi bediri lalu mantah, "Kami ndo nemu utan te salah ngau ura tuk. Keti antik roh tamai malaikat udah ngumung ngau neh?" ¹⁰ Ketiko bepadu mulut makin besai, kepalo pasukan takut antik paulus diransik mpadai ura bangat yok, lalu nyuruh balo prajurit turun ngamik Paulus re tengah sidok caro pakso serto maik neh ke markas. ¹¹ Pada malam pagi, Tuhan bediri disamping Paulus lalu ngumung, "Kuatkan ati ikam, karena ikam udah bersaksi ngau benar-benar tenta aku di Yerusalem, ikam arus ugok bersaksi di Roma." ¹² Ketiko ari sia, ura-ura Yahudi kerjo samo lalu ngikat dirik ngau sumpah ndo makai atau minum sampai sidok munuh Paulus. ¹³ Bisik lebih re empat puloh ura te kerjo samo. ¹⁴ Sidok datai ngau imam-imam kepalo tamai tuo-tuo lalu ngumung, "Kami udah ngikat dirik kami ngau sumpah sok ndo bepusam sampai kami munuh Paulus. ¹⁵ Jadi pituk, nuan tamai Sanhedrin, padah ke kepalo pasukan sok tauk ngemaik neh ngau nuan, bako nuan kok mutus ke pekaro neh ngau teliti agik, kami siap munuh neh seapan neh semak ngau tempat tuk." ¹⁶ Tapi, nemiak laki re menyanak betinok Paulus menin tenta yok, neh angkat lalu tamok ke markas, serto madah Paulus. ¹⁷ Paulus ngumai sura perwira lalu ngumung, "Baek nemiak mudok tuk ngusung kepala pasukan kereno bisik hal te kok dilapor ngau neh." ¹⁸ Perwira yok ngemaik neh ngusung kepala pasukan lalu ngumung, "Paulus, tahanan yok, ngumai lalu mintok ngau aku ngemaik nemiak mudok tuk ngau nuan, bisik hal te kok dipadah ngau nuan. ¹⁹ Kepalo pasukan megai jari nemiak mudok yok lalu narek neh ke samping, mulai nanyok nemiak mudok yok, "Apo te arus ikam padah ngau aku?" ²⁰ Lalu neh madah, "Ura-ura Yahudi udah bepekat mintok nuan ngau ngemaik Paulus turun ke Sanhedrin pagi, purok-purok sidok kok nanyok sesuatu te lebih teliti tenta neh. ²¹ Jadi ndo sah menin sidok kereno bisik lebih re empat puloh ura re sidok tengah ngincar Paulus, te besumpah ndo makai atau minum sampai sidok munuh Paulus. Pituk sidok udah siap dan tengah nunguk persetujuan nuan." ²² Kepalo pasukan nyuruh nemiak mudok yok angkat, samil bepesan ngau neh, "Ndo sah madah sapa-sapa kalo ikam udah madah aku tenta hal tuk." ²³ Kepalo pasukan yok ngumai duo ura perwira lalu madah, "Siap ke duo ratus tentara, ngau tujuh puloh te nunga kuda tamai duo ratus prajurit maik senapa sok angkat ke Kaisarea pada jam 9 malam tuk. ²⁴ Siap ke ugok binata ngau maik Paulus lalu antar neh dengan aman ngusung Feliks, gubernur yok." ²⁵ Neh nulis surat te bako tuk : ²⁶ Dari Klaudius Lisias. Ngau Gubernur Feliks te mulia. Salam, ²⁷ Ura tuk ditangkap uleh ura-ura Yahudi dan ampir dibunuh uleh sidok ketiko aku datai bereto prajurit-prajurit dan nyelamat ke neh, seudah ketauk antik neh yok seura banso Roma. ²⁸ Kereno aku kok ketauk apo alasan sidok nuduh neh, aku maik neh turun ngau Sanhedrin sidok. ²⁹ Aku nemu antik neh tuk dituduh re pekaro-pekaro tenta Hukum Taurat sidok, tapi ndo sik alasan apo-apo pantas ngau ukum mati atau penyaro. ³⁰ Ketiko dipadah ngau aku antik bisik kerjo samo ngau ngelawan ura tuk, aku segero merintah ke balo penuduh sok tauk madah tuntutan sidok ngau neh didepan nuan. ³¹ Balo prajurit sesuai te de perintah ngau sidok, ngamik Paulus lalu ngemaik neh ke Antipatris pada malam ari. ³² Pada ari pagi, sidok miar ke balo pemaik kuda yok angkat bereto neh, lalu sidok bebalek ke markas. ³³ Ketiko sidok udah datai ke Kaisarea dan merik surat yok ngau gubernur, sidok ugak ngadap ke Paulus ngau neh. ³⁴ Seudah gubernur maca surat yok, re daerah ni asal Paulus. Ketiko neh ketauk antik Paulus berasal re Kilikia, ³⁵ neh ngumung, "Aku kok menin ikam seudah balo penuduh ikam datai ugok." Udah yok, neh merintah sok ngawal Paulus di dalam markas besai Herodes.