¹ Ari Paulus, hamba Kristus Yesus, te dekumai jadi rasul udik dekudus ke ngau madah ke Injil Allah. ² Injil yak udah dejanyi ke-Ya seapan ngau perentara nabi-nabi-Ya alam kitab-kitab suci, ³ ngau anak-Ya, jekuk dagin te deperanak ke ari keturun Daud. ⁴ Udik jekuk Roh kekudusan dibenar ke ngau ke idup-Ya ari sentara urang mati, kalau ya me anak Allah te bekuasa, Yesus Kristus Tuhan kita. ⁵ Ngau perentara-Ya kami nerimak kasih karunia udik jabatan rasul ngau ngiring semua bansa, isak sidak pecayak udik taat ngau nama-Ya. ⁶ Kitak ugak temasuk ari sidak, kita te udah dekumai jadi empu Kristus. ⁷ Ngau kitak semua te nugau de Roma, te dekasih Allah, te dekumai udik dejadi ke urang-urang kudus: Kasih karunia nyereta kitak udik damai sejahtera ari Allah, Bapa kita, udik ari Tuhan Yesus Kristus. ⁸ Petama-tama aku ngucap sukur ngau Allah aku empadai Yesus Kristus ngau kitak semua, kerena udah tekebur kabar iman kitak de seluruh dunia. ⁹ Kerena Allah, te aku layan ngau sepenuh ati alam pemadah Injil Anak-Ya, yak me saksi aku, kalau alam doa aku, aku seruntik ngingat kitak: ¹⁰ Aku bedoa, semuga ngau kedekak Allah aku tau bulih kesempatan ngau nguang kitak. ¹¹ Kerena aku kak medak kitak ngau merik ke karunia rohani ke kitak isak nguat ke kitak, ¹² yak me, isak aku isik de sentara kitak udik tau teibur empadai iman kitak semua, baik empadai iman kitak atau empadai iman aku. ¹³ Bala menyadik, aku kak, isak kitak ketau kalau aku udah runtik berusaha nguang kitak - tapi sampai pituk aku seruntik nai sempat - isak de tengah-tengah kitak, aku nemu ke buah, upa yak ugak de tengah-tengah bansa te bukai Yahudi te lain. ¹⁴ Aku terutang, baik ngau urang Yunani atau ngau urang te bukai Yunani, baik ngau te bepelajar atau ngau urang te nai bepelajar. ¹⁵ Yak me te nyuruh aku kak madah ke Injil ngau kitak ugak te nugau de Roma. ¹⁶ Aku bisik keyakin te kukuh alam Injil, kerena Injil me kekuat Allah te nyelamat ke semua urang te pecayak, petama-tama urang Yahudi, tapi urang Yunani ugak. ¹⁷ Sebab de dalam yak nyata kebenar Allah, te betulak ari iman udik memimpin ngau iman, upa isik tetulis: "Urang benar tau idup empadai iman". ¹⁸ Kerena peluat Allah nyata ari sorga ngau semua penyaik udik pengejam mensia, te mulah kebenar ngau pengejam. ¹⁹ Kerena nama te tau sidak ketau ngau Allah nyata ngau sidak, kerena Allah udah nyata kedirik ya ngau sidak. ²⁰ Kerena nama te nai nampak ari-Ya, yak me kekuat-Ya te kekal udik keilahian-Ya, tau nampak ke pikir ari pemulah-Ya rama dunia depulah, isak sidak nai dapat ngelapan kedirik. ²¹ Kerena sekalikpun sidak ngelala Allah, sidak nai ngangap Ya Allah atau ngucap sukur ngau Ya. Sebalik lagik pemikir sidak jadi nisik reti udi ati sidak te budu jadi keleman. ²² Sidak mulah seulah-ulah sidak matang baik, tapi sidak udah jadi budu. ²³ Sidak nganti kemulia Allah te netau mati ngau besemak upa mensia te tau mati, kebala burung, kebala benatang te bekaki empat atau kebala benatang te ngelantar. ²⁴ Kerena yak Allah beserah ke sidak ngau penekak ati sidak te kak pengutur, isak sidak sama-sama ngutur ke tubuh sidak. ²⁵ Kerena sidak nganti kebenar Allah ngau ngampur udik muja ngau nyemah amak sampai kelupa ngau Pencipta ya te arus depuji selamak-lamak, amin. ²⁶ Kerena yak Allah nyerah ke sidak ngau hawa nafsu te nyuruh malu, kerena bala bini sidak nganti ke persetubuhan te wajar ngau te nai wajar. ²⁷ Piak ugak bala laki nudi ke persetubuhan te wajar ngau bini sidak udik bekawang-kawang nafsu sidak surang ngau te lain, udik sidak mulah mesum, bakas ngau bakas, udik empadai yak me sidak bulih balas te setimpal ngau kesesat sidak. ²⁸ Udik kerena sidak nai ngasai perlu ngakuk Allah, mangka Allah nyerah ke sidak ngau pemikir te tekutuk, udik sidak mulah nama te nai pantas: ²⁹ Penuh ngau te kejam, kejaik, serakah, buntau, mayuh dengki, pemunuh, beselisih, ngakal udik dusa. ³⁰ Sidak me te mulah pengutur, pengasut, te mencik Allah, nisik ajar, sumung, numut mulah penyaik, nai taat ngau urang tuai, ³¹ nai beperakal, nai setia, nai penyayang, nai ngelala kasih. ³² Kerena biar me piak, sidak ketau tuntut-tuntut ukum Allah, yak me kalau semua urang te mulah hal yak, tau de ukum mati, sidak nai angak ngereja kedirik, tapi sidak ugak setuju ngau sidak te mulah yak.