KHOTBAH DE BUKIT Ucapan bahagia ¹ Rama Yeusus medak urang mayuh yak, naik me-Ya katau bukit, seudah Ya duduk, datai me bala murid ngau Ya. ² Yesus mulai banai ngau ngajar sidak, jekuh-Ya: ³ Gagalah urang te meskin dadap Allah, empadai sidak yak me te ngempu kerajaan surga. ⁴ Gagalah urang te piluk, empadai sidak bakal delimpau. ⁵ Gagalah urang te lemah lembut, empadai sidak bakal empu bumi. ⁶ Gagalah urang te lapar, aus akan kebenar, empadai sidak bakal depuas'ke ⁷ Gagalah urang te murah ati, empadai sidak bulih kemurah ugak. ⁸ Gagalah urang te suci ati, empadai sidak bakal medak Allah. ⁹ Gagalah urang te ngemaik damai, empadai sidak bakal detelah anak-anak Allah. ¹⁰ Gagalah urang te keteridak empadai kebenar, empadai sidak yak me te empu kerajaan surga. ¹¹ Gagalah kitak, kalau empadai aku kitak decela ngau keteridak urang ¹² Gagalah, empadai upah kitak besai de surga, empadai upa yak ugak udah keteridak nabi-nabi seapan kitak." ¹³ "Kita yak garam denia. Antik garam yak udah tabar, ngau nama agik ngemasin ke? Ndai sik guna agik selain debuai ngau detijak urang. ¹⁴ Kita yak terang denia. Kuta te teletak datau bukit ndai patut tepelabuk. ¹⁵ Urang ndai suah ngidup ke pelita lalu dengkah de babah gantang, tapi datau kaki dian isak nerang ke semua urang alam langkau yak. ¹⁶ Upa yak me terang kitak mancak de mua urang, isak sidak medak pempulah kitak te baik ngau memulia ke Apai kita de surga." ¹⁷ Nang kitak nyangkak, kalau aku datai untuk ngapus ukum Taurat atau kitab bala nabi. Aku bukai ngapus yak ngenap ke yak. ¹⁸ Aku madah kitak: antik pan lenyap langit ngau bumi tuk, setitik sik ndai bakal dapus ari ukum Taurat, seapan semua terjadi. ¹⁹ Empadai yak, sapa te ngayap ke salah sutik perintah ukum Taurat sekalikpun te paling mit, ngau ngajar ke piyak ngau urang bukai, ya bakal bulih penuduk te palin babah alam kerajaan surga; tapi sapa te ngelaksana ngau ngajar ke semua perintah-perintah ukum Taurat, ya bakal bulih penuduk te tingik alam kerajaan surga. ²⁰ Kebak kumadah kitak: Antik keagamaan kitak ndai lebih ndai lebih benar ari pada idup keagamaan ahli-ahli Taurat ngau bala uraang farisi, kitak ndai dapat masuk kalam kerajaan surga. ²¹ Kitak udah ninga te defirman ke ngau inik puyang kitak: Nang munuh; sapa te munuh kalah dukum. ²² Tapi aku madah kitak: Sapa urang te luat ngau menyadik ya kalah dukum; sapa te banai ngau menyadik ya: Kafir! kalah dadap ke Mahkamah Agama ngau sapa te banai: Jahil! kalah deserah kalam neraka te bedaur-daur. ²³ Empadai yak, antik kitak nganyung persembahan katau mezbah, kitak tekingat bisik utai te alam ati menyadik kitak teradap kitak, ²⁴ Dudi ke persembahan kitak de depan mezbah, udek angkat bedamai dulai ngau menyadik kitak, udek bekalih agik mempersembahkan persembahan kitak yak. ²⁵ sigat me bedamai ngau lawan kitak selamak kita bereta ngau ya detengah jalai, isak lawan kitak ndai nyerah ke kitak ngau hakim, udek hakim nyerah ke kitak ngau pemantuk-pemantuk ya, udek kitak desempalung kalam penyara. ²⁶ Aku madah kitak: Kitak ndai dapat keluar rin seapan kitak mayar utang sampai lunas. ²⁷ Kitak udah ninga firman: Nang bezinah. ²⁸ Tapi aku madah kitak: Setiap urang te ngelinir inuk ngau ining ke ya udah bezinah ngau ya alam ati. ²⁹ Maka antik mata sepiak kanan nyesat ke kitak, cukit ngau buai yak, lebih baik bagi kitak antik sutik ari tubuh kitak benasa, ari pada tubuh kitak utuh desempalung kalam neraka. ³⁰ Ngau antik jari te kanan nyesat ke kitak, tungkung ngau buai yak, empadai lebih baik bagi kitak antik sutik ari tubuh kitaak benasa aripada tubuh kitak utuh tamak neraka. ³¹ Udah defirman ke ugak: Sapa te nyarak ke bini ya kalah merik surat sarak ngau ya. ³² Tapi aku madah kitak: Setiap urang te nyarak ke bini ya, kecuali empadai zinah, ya mulah bini ya bezinah; ngau sapa te kawin ngau inuk te desarak, ya mulah zinah. ³³ Kitak udah ninga ugak te defirmankan ngau inik puyang kitak: Nang besumpah pelesu, pegai me sumpah dadap Tuhan. ³⁴ Tapi Aku madah kitak: Nang sekalik-kalik besumpah, baik demi langit, empadai langit takhta Allah, ³⁵ ataupun demi bumi, empadai bumi yak penijak kaki-Ya, ataupun demi Yerusalem, empadai Yerusalem yak kuta Raja Besar; ³⁶ Nang ugak kitak besumpah demi kepalak kitak, empadai kitak ndai bekuasa ngemutih ngau ngitam ke buk sutikpun. ³⁷ Antik auk madah ke auk, antik ndai madah ke ndai. Nama te lebih re yak, berasal ari te jaik. ³⁸ Kitak udah ninga firman: Mata ganti mata ngau gigi ganti gigi. ³⁹ Tapi aku madah kitak: Nang kitak ngelawan urang te jaik ngau kitak, malah sapa pun te nampar kuyuk kanan kitak, berik ke ugak kuyuk sepiak kibak. ⁴⁰ Ngau bala urang te kak nyabung ke kitak empadai ining ke baju kitak, berik ke ugak jubah kitak. ⁴¹ Ngau sapa te ngumuk kitak bejalai sejauh se mil, bejalai me tamai ya sejauh dua mil. ⁴² Berik ke urang te mintak ngau kitak, ngau nang ngai ngau urang te kak minyau ngau kitak. ⁴³ Kitak udah ninga firman: kasih ke sama dirik mensia, ngau bencik ke munsuh kitak. ⁴⁴ Tapi aku madah kitak: Kasih ke munsuh kitak, ngau bedoa ke urang te teridak ke kitak. ⁴⁵ Empadai piak mek kitak jadi anak-anak Apak kitak te de Surga, te nerbit ke mata panas bagi urang te jaik ngau urang te awas, ngau nurun ke ujan bagi urang te benar ngau urang te ndai benar. ⁴⁶ Antik kitak ngasih urang te ngasih kitak, nama upah kitak? Ndai kah pemungut cukai upa yak ugak? ⁴⁷ Ngau antik kitak hanya merik salam ngau bala menyanak kitak, nama kelebih kitak ari urang bukai? ndai mek urang te ndai ngelala Allah pun piyak ugak? ⁴⁸ Empadai yak mek kitak kalah sempurna, upa apai kitak de surga sempurna.